1. Gurhe abantu bimana bakahamagala Yehova?

OMULALA gw’abanaharamya Yehova guheberemo Yesu, oli “muburhwa murhanzi w’ebilemwa by’oshi,” na bamalayika banene. (Kol. 1:15; Zb. 103:20) Amango Yesu aliri oku gulu, aliyerekene okw’abantu bimana bakahamagala Yehova Darha. Amango aliri ashambala n’abanafunzi bage, Yesu aliri ahamagala Yehova “Darha na Isho.” (Yoh. 20:17) N’amango rhuchihaana emwa Yehova n’okubatizwa, rhwaba baguma b’omu mulala g’obuzigire gwa bene-berhu na bali-berhu.​—Mk. 10:29, 30.

2. Bichi rhwashamabalako mu gunola mwazi?

² Bantu baguma banabona oku bibakomerere okubona Yehova nka Darha w’obuzigire. Nkabaga abandi barhenji nka gurhe bakayereka bene-babo na bali-babo obuzigire. Mu gunola mwazi, rhwabona nka gurhe Yesu arhurhabere rhubone Yehova nka Darha w’obuzigire n’oku rhwakamuyegera. Rhwashuba yiga nka gurhe rhwakayiganya Yehova omu kuntu rhunakolera bene-berhu na bali-berhu.

3. Nka gurhe esala ly’omufano linarhurhabala rhuyinje rhwayegera Yehova?

³ Yehova ali Darha w’obuzigire. Yesu alonzeze rhubone Yehova nk’oku naye anamubona nka muzere mwinja onagwerhe obuzigire eyi rhwakashambala naye omu kasanzi koshi-koshi; s’aliko rhurhamubonaga nk’orhali muntu mwinja orhubwira konyine ebi rhukwanene kukola. Echola chibonekene omu kuntu Yesu ayigirizaga abanafunzi bage baleme basalira. Ahwanzisaga esala ly’omufano omu kuderha ntya: “Darha.” (Mt. 6:9) Yesu akarhubwirire rhuyinje rhwahamagala Yehova “Mugala-byoshi,” “Mulemi,” changwa “Mwami w’esiku n’amango.” Okola kurhakabere kubi bulala Ebiblia enakolesa amola mazino moshi omu kuderha  Yehova. (Mwa. 49:25; Isa. 40:28; 1 Ti. 1:17) Aliko Yesu arhubwira rhuleme rhwahamagala Yehova “Darha.”

4. Bichi birhuyerekere oku Yehova alonzeze rhumuyegere?

⁴ K’onabona oku bikukomerere okubona Yehova oku ali Darha w’obuzigire? Baguma mu rhwabo banabona ntyo. Nka darha arhaliri muntu mwinja, byakarhukomerere okubona oku rhwakagwarha darha orhusimire. Bili bintu bihebere omurhima bwenene okumenya oku Yehova ab’amenyere bwinja okuntu rhunachiyunva! Alonzeze kurhuyegera. Che chirhumire Echinwa chage chirhuhebere omurhima ntya: “Muyegere Mungu, naye abayegera.” (Yak. 4:8) Yehova anarhuzigira anarhubwirire oku aba Darha mwinja bwenene kulusha abandi badarha boshi rhwakaba rhugwerhe.

5. Nk’oku olwandiko lwa Luka 10:22 luderhere, nka gurhe Yesu akarhurhabala rhuyegere Yehova?

⁵ Yesu akarhurhabala rhuyegere Yehova. Yesu amenyere Yehova bwinja kandi anayerekana engeso zage zinja oku bushinganyanya. N’echola charhuma aderha ntya: “Owambwene ey’anabwene Darha naye.” (Yoh. 14:9) Yewe nka mukulu werhu, Yesu arhuyigirize okuntu rhwakakenga Darha, okuntu rhwakaleka kumugayisa n’ebi rhwakajira y’arhuyemera. Aliko ahanene Yesu arhurhabere rhumenye oku Yehova ali mwinja bwenene anagwerhe obuzigire. (Osome Luka 10:22.) Rhushambalage ku mifano miguma.

6. Lerha emifano eyerekene okuntu Yehova aliri ayunviriza Yesu.

⁶ Yehova anayunviriza abana bage. Waza okuntu Yehova aliri ayunviriza Omugala murhanzi. Kweri Yehova aliri ayunviriza masala manene Omugala aliri amubwira amango aliri oku gulu. (Lu. 5:16) Aliyunvirize Yesu amango aliri asalira oku bilolere omuhigo gw’akamaro nk’amango achishogaga entumwa zage 12. (Lu. 6:12, 13) Kandi Yehova aliyunvirize esala lya Yesu amango aligwerhe mugayo gunene. N’embere katyu bamulenganye, Yesu alisalirire bwenene Eshe oku bilolere echigeregezo chikomere aliri hofi kuhurana. Yehova arhayunvirizaga esala lya Yesu konyine s’aliko arhuma na malayika w’okumuheba emisi.​—Lu. 22:41-44.

7. Nka gurhe rhukwanene kuchiyunva omu kumenya oku Yehova anayunviriza amasala merhu?

 ⁷ Zene, Yehova ali agenderera kuyunviriza amasala m’abakozi bage, anabashubiza omu kasanzi kakwanene n’omu njira nyinja barhaliwazize. (Zb. 116:1, 2) Mwali-werhu muguma w’omu Inde alichibwenere okuntu Yehova ashubizaga amasala mage. Alichiyunvirhe alagire bwenene omu bwenge, anasalira n’omurhima goshi emwa Yehova eju y’echola chibazo. Ayandikire ntya: “Eprograme ya JW Télédiffusion ya Mwezi gwa 5, 2019 yaliyerekene okuntu rhwakalwisa emilago, che chaliri chintu nalikenere. Chaliri chishubizo oku masala mani.”

8. Mu njira zihe Yehova aliyerekene oku azigiire Yesu?

⁸ Yehova anarhuzigira n’okurhushishikala, nka kulala alizigiire Yesu n’okumulagako amango aliri ahurana ebibazo omu kalamo kage hanola oku gulu. (Yoh. 5:20) Alirhabere Yesu y’agendereza kukomeza obwemere bwage, amuheba omurhima amango alibabere, n’okujira okwage koshi yi Yesu abone eby’alikenere omu kalamo. Na Yehova abwira Omugala oku amuzigiire n’oku achivugireye. (Mt. 3:16, 17) Bulala Yesu alinihire oku Eshe w’embingu w’obuzigire amurhabala, nta mango akachiyunvirhe alekererwe.​—Yoh. 8:16.

9. Nka gurhe rhumenyere oku Yehova arhuzigiire?

⁹ Kuguma na Yesu rhwachibonera obuzigire bwa Yehova mu njira zinene. Obe nka wawaza: Yehova arhukulwire emunda ali, anarhuhere bene-berhu na bali-berhu barhuzigiire banarhuma rhwagwarha omwishingo n’okurhuheba omurhima amango rhuli omu milago. (Yoh. 6:44) Kandi Yehova ali arhuha buli chintu choshi rhukenere y’obwemere bwerhu bugenderera kukomera. Kandi arhurhabere rhugwarhe ebintu rhukenere yi rhulama. (Mt. 6:31, 32) Amango rhwamawaza oku buzigire Yehova arhugwerheko, obuzigire bwerhu kuye, bwanaluga.

10. Bichi rhwakayiga kugerera okuntu Yehova anakolera bene-berhu na bali-berhu?

¹⁰ Yehova azigiire bene-berhu na bali-berhu. Aliko mango maguma binarhukomerera okubazigira n’okubayereka oku rhubazigiire. Byakarhukomerera bulala emicho yerhu elengene changwa rhurhanakuliraga omu hali zili kuguma. Kandi rhweshi rhunajira amagosa makababaza n’okuvuna abandi omurhima. Chiro akaba ntyo, rhweshi rhwakachihangana kukomeza obuzigire omu mulala gwerhu gw’ekiroho. Nka gurhe? Omu kuyiganya Darha amango rhuli rhwayereka bene-berhu na bali-berhu oku rhubazigiire. (Efe. 5:1, 2; 1 Yo. 4:19) Leka rhulole bichi rhwakayiga kugerera omufano gwa Yehova.

11. Nka gurhe Yesu ayiganyaga “olukogo lunene lwa Yehova”?

¹¹ Yehova anayerekana “lukogo lunene” (Lu. 1:78) Omuntu w’olukogo anayerekana oku alagire oku bandi amango aly’ababona yi balibuka anaj’alola mu njira zihe akabarhabalamo. Kugerera ezola njira z’okukolera abantu, Yesu ayiganyize Yehova omu kubayereka olukogo. (Yoh. 5:19) Amango abona echigusho ch’abantu mu mango maguma, Yesu “abayunvira obonjo bulala baliri nk’abakulirwe k’oluhu n’okukabulwa eyi n’eyi nka ntama zirhaherhe mungeri.” (Mt. 9:36) Yesu alijirire binene olekere okubayereka obuzigire konyine, anajira ech’akola y’abarhabala. Alifumizye abalwala, anarhabala balala “balibukire banalemererwe n’emizigo.”​—Mt. 11:28-30; 14:14.

12. Nka gurhe rhwakayereka bene-berhu na bali-berhu olukogo?

¹² Nka rhwamawaza oku bibazo bene-berhu na bali-berhu bagwerhe, echola charhuma rhwagala kubayereka olukogo. Omufano, mwali-werhu muguma akaba agwerhe ebibazo by’amagala bikomere. Arhasaga kuderha oku  bilolere echibazo chage aliko nkabaga akayunva asimire nka muntu mulebe amamurhabala. K’anagala shishikala oku by’omulala gwage gukenere? Ka byakagalikana rhumurhabale kuvuya ebilyo changwa kukola obusafi omu nju yage? Mwene-werhu akaba ey’ahezeze akasi kage. Rwakamurhabala omu kumuha lufuranga lugeke, nkabaga buzira kumubwira oku rhwerhwamuhagalo n’okumurhabala kugera amango agwarha akandi kasi.

13-14. Mu njira zihe rhwakayereka abandi oku rhuli bantu banahaana kuguma na Yehova?

¹³ Yehova anahaana. (Mt. 5:45) Rhurhakwanene kulindira oku bene-berhu na bali-berhu barhuheme oburhabale yi rhubayereka olukogo. Kuguma na Yehova, rhwakajira echi rhwakola embere barhuheme oburhabale. Buli lusiku anarhuha ezuba eyi rhurhanamuhemere lyo! Na buli muguma werhu anayunguka nalyo, s’arhali ku balala banayerekana eshukurani bonyine. Omu kurhuha ebintu rhukenere, Yehova ey’ali arhuyereka oku arhuzigiire. Rhuzigiire Yehova loshi bulala ali mwinja bwenene anahaana!

¹⁴ Bene-berhu na bali-berhu balibayiganya Yehova omu kuyereka abandi oku baba bantu banahaana. Omufano, omu 2013, omuyaga gukalihire bwenene guyirikirwe Haiyan gwashanda bintu binene omu Philippines. Bene-berhu na bali-berhu banene baheza amaju mabo n’ebintu byabo. Aliko omulala gwabo gw’ekiroho g’omu gulu lyoshi gwajira juba-juba omu kubarhabala. Banene bahaana efuranga changwa kurhabala omu kasi k’okushuba kukwiza n’okuyumbaka maju mahikire hofi ku 750 omu mango marhahikire chiro ku na mwaka muguma! Omu mango m’obulwala b’okuyahukira bwe Korona, Abahamirizi bakolere bwenene omu kurhabala bene-berhu na bali-berhu. Amango rhwamajira juba-juba omu kurhabala omulala gwerhu gwe kiroho, rhwanabayereka oku rhubazigiire.

15-16. Nk’oku olwandiko lwa Luka 6:36 luyerekene, njira ehe y’akamaro rhwakayerekenamo oku rhuli rhwayiganya Darha w’embingu?

¹⁵ Yehova aba w’obonjo anaba wakubabalire. (Osomu Luka 6:36.) Buli lusiku Darha w’embingu anababalira buli muguma werhu. (Zb. 103:10-14) Abanafunzi ba Yesu barhaliri  bashinganyanya; aliko abayereka obonjo n’okubababalira. Aliyemerere ahaane akalamo kage nka nchungu y’ebyaha byerhu bibabalirwa. (1 Yo. 2:1, 2) K’orhachiyunvirhe okulwirwe emwa Yehova na Yesu bulala bakuyerekere obonjo banakubabalira?

¹⁶ Obuzigire rhugwerhe ku buli muguma n’owindi bunakomera amango ‘rhwamababalirana buli muguma n’owindi oku bulonza.’ (Efe. 4:32) Okuderha okuli, mango maguma byakarhukomerera okubabalira abandi. Che chirhumire birhuhemere rhuhindamuke. Mwali-werhu muguma ahumirwe oku murhima na mwazi muguma guli omu Munara g’Omulanzi guderhere ntya “Rhube Tayari Kubabalirana Buli Muguma n’Owindi” gwamurhabere ajire ntyo. * Ayandikire ntya: “Gunola mwazi gwantabere menye gurhe okubabalira abandi kwakantabala. Gufasiriye oku amango wamababalira abandi arhali kuderha oku egosa bakolere lili linja changwa lirhakubabeze. Aliko amango wamababalirabo, orhachibalubira kandi wachiyunva orhulerere.” Amango rhwamaba tayari kubabalira bene-berhu na bali-berhu, rhwayerekana oku rhubazigire n’oku rhuli rhwayiganya Darha Yehova.

17. Nk’oku olwandiko lwa Matayo 5:16 luderhere, nka gurhe rhwakakengesa Darha w’embingu?

¹⁷ Rhugwerhe eshukurani nene y’okuba omu mulala g’omu gulu lyoshi gwa bene-berhu na bali-berhu bazigirene. Rhulonzeze bantu banene bachihebe haguma nerhu nk’oku byakagalikana omu kuharamya Mungu werhu. Che chirhumire rhurhahira rhukajira echintu chakazingisa ezino lya Yehova changwa olubaga lwage. Rhugendererage kuchigendesa omu bulyo bwakarhuma abantu bayemera emyazi minja.​—Osome Matayo 5:16.

18. Bichi byakarhurhabala rhuhubiri n’obushiru?

¹⁸ Mango maguma abantu bakarhuderha kubi changwa chiro n’okurhulibuza bulala rhukengere Darha w’embingu. Bichi rhwakajira amango rhwamachiyunva rhuyubahire kubwira abandi eju y’obwemere bwerhu? Rhwakachizera oku Yehova n’Omugala barhurhabala. Yesu  alibwirire abanafunzi bage oku barhakwanene kulaga oku bilolere okuntu bakaderha changwa bichi baderha. Bulagurhe? Yesu alifasiriye ntya: “Nji mwahaabwa mw’eyola sa echi mwaderha . . . bulala abali baderha arhali mwabo, si eroho lya Isho lyelili lyaderha kugerera mwabo.”​—Mt. 10:19, 20.

19. Lerha omufano gwa muntu mulebe wahaanaga obuhamirizi n’obushiru.

¹⁹ Rhulole omufano gwa Robert. Mira, amango alichili mwanafunzi muhyahya we Biblia ey’arhanaza gwarha na bumenyi bunene, ahamagalwa oku tribinale nguma y’abasoda y’omu Afrike du Sud. Afasiriya omuzuzi bulagurhe arhakaja omu chisoda. Abwira oku bushiru etribinale oku arhakaja omu chisoda bulala azigiire bene-babo na bali-babo b’Abakristu. Alisimire enafasi agwerhe omu mulala gwerhu gw’ekiroho! Omuzuzi ayurukira amubaza ntya: “Bene-benyu na bali-benyu babande”? Robert arhaliwazize oku bakamubaza echola chibazo, aliko han’aho olwandiko l’olola lusiku lwamuyinja omu bwenge. Lwaliri Matayo 12:50: “Buli yeshi onajira obulonza bwa Darha oli omu mbingu, ye mwene-werhu na mwali-werhu na nyama.” Chiro akaba oku Robert aliri mwanafunzi muhyahya we Biblia, eroho lya Yehova lyamurhabala ashubize kw’echola chibazo n’ebindi arhaliwazize oku bakamubaza. Yehova akwanene kuba ey’aliri achivugira Robert! Nerhu Yehova akachivugira rhwabo amango rhwamamulangalira n’okuhubiri oku bushiru chiro akaba yirhwahurana ebibazo.

20. Bichi rhukwanene rhuhigirire kujira? (Yoh. 17:11, 15)

²⁰ Rhujage rhwagenderera kusiimira emigisho rhuli rhwagwarha bulala rhuli omu mulala gw’ekiroho guli m’obuzigire. Rhugwerhe Darha mwinja bwenene kulusha boshi na bene-berhu na bali-berhu barhuzigiire. Rhukwanene kugenderera kugwarha eshukurani eju y’echola. Shetani n’abambali bage barhugayire banali bachihangana kurhushunika rhugwarhe engangane oku buzigire bwa Darha w’embingu, banali bajira okwabo koshi bagalire y’obuguma buchika ahakagarhi kerhu. Aliko Yesu asalira eju yerhu omu kuhema Darha arhulange y’omulala gwerhu gugenderera kugwarha obuguma. (Osome Yohana 17:11, 15.) Yehova aly’ashubiza kw’elyola sala. Kuguma na Yesu, nerhu rhurhakwanene kugwarha engangane oku Darha w’embingu arhuzigiire n’oku arhurhabala. Rhujage rhwahigirira kugenderera kuyegera omulala gwerhu gw’ekiroho.