MWAZI G’OKUYIGA 41
Okuntu Wakarhabala Abanafunzi be Biblia Bahikire Obubatizo—Chigabi cho 1
“Bibonekene oku muli maruba ma Kristu rhwayandikaga rhuli bakozi.”—2 KO. 3:3.
WIMBO 78 “Kufundisha Neno la Mungu”
OKU BUGEKE *
Bichi byakalerhera echabaga choshi busime bunene, olekere okubona omwanafunzi we Biblia barhalaga ajira amaja-mbere m‘ekiroho kuhikira obubatizo? (Olole echifungo cho 1)
1. Nka gurhe olwandiko lwa 2 Wakorinto 3:1-3 lurhurhabere rhusimire olukengo rhugwerhe l’okurhabala omwanafunzi we Biblia ajire amaja-mbere kuhikira obubatizo? (Olole efoto eli oku chiganda.)
GURHE onachiyunva amango wamabona omwanafunzi we Biblia w’omu chibaga ch’omu eneo yawe amabatizwa? Okuderha okuli, onayunva omwishingo gunene bwenene. (Mt. 28:19) N’akaba woyo wewayigirizaga oyola mwanafunzi, wakayunva omwishingo gunene amango amabatizwa! (1 Te. 2:19, 20) Abanafunzi bahyahya babatizwe bali “maruba menja m’okupendekeza,” arhali mpu kubalala bayigaga nabo Ebiblia bonyine, s’aliko n’oku chibaga choshi.—Osome 2 Wakorinto 3:1-3.
2. a) Chibazo chihe ch’akamaro rhukwanene kuwaza ko, na bulagurhe? b) Efunzo lye Biblia chili chichi? (Olole amahugulo m’eshishi.)
2 Bisimisize bwenene okubona omu myaka 4 egerere, eripoti ya mafunzo me Biblia 10000000 ntya * zayinjaga zahanwa buli mwezi omu gulu lyoshi. Mw’eyola myaka y’en’eyola, bantu barhalwise 280000 bayinjaga babatizwa buli mwaka n’okuba Bahamirizi ba Yehova na banafunzi bahyahya ba Yesu Kristu. Nka gurhe rhwakarhabala amola mamiliyoni m’abanafunzi be Biblia mahikire oku bubatizo? Bunola Yehova achili alindira abantu n’okubaha akasanzi k’okuba banafunzi ba Kristu, bihemere rhujire okwerhu koshi rhwakagala yi rhubarhabala bajire amaja-mbere n’okubatizwa juba-juba nk’okubyakashobokana. Ebisanzi biyorhere bikala bigehere bwenene!—1 Ko. 7:29a; 1 Pe. 4:7.
3. Bichi rhwaganirira mu gunola mwazi oku bilolere okuongoza amafunzo me Biblia?
3 Bulala akasi k’okujira abanafunzi kali k’akamaro bwenene zene, Ebaraza Lirhambwire lyabazize amabiro m’emirhabi bichi rhwakajira yi rhurhabala banafunzi banene bajire amaja-mbere n’okuhikira oku bubatizo. Mu gunola mwazi n’omu gukulikireho, rhwabona bichi omufano gwa bapainiya, bamisiyonere n’abemangizi b’emizunguluko gurhuyigirize. * (Mez. 11:14; 15:22) Bafasiriye bichi abalimu be Biblia n’abanafunzi babo bakajira y’efunzo lyabo lye Biblia lilerha amalehe menja. Mu gunola mwazi rhwabona bintu birhano buli mwanafunzi akwanene ajire y’ajira amaja-mbere kuhikira obubatizo.
MUYIGE BULI BOSO
Obaze omwanafunzi wawe akaba hali ahamwakayikala muganire eju ye Biblia (Olole echifungo cha 4-6)
4. Bichi rhukwanene kumenya oku bilolere omuntu onayigira Ebiblia embere z’omulyango gwage?
4 Banene mu bene-berhu na bali-berhu banayiga Ebiblia n’abantu eyi banayumangire embere z’emilyango yabo. Nachiro akaba okola kuli kwinja omu kurhabala omuntu ahwanze kusima Ebiblia, ezola nganiro zizigana kuba eyinyofi, nkabaga zirhakanajirwa buli boso. Okurhabala omuntu asimiswe bwenene, bahubiri banene banahema oyola muntu enimero zage z’etelefone, n’ahandi bakamuhamagala changwa banamurhumira emesage eli mu mawazo malebe m’amandiko embere bamugalukire. Ezola nganiro zakamala myezi milebe embere z’okuhikira oku funzo. Aliko si, byakanashobokana oyola mwanafunzi ajire amaja-mbere kuhika amango achihana n’okubatizwa buzira kuchihangana achinyege * ebisanzi by’okuyiga Echinwa cha Mungu si? Birhakashoboka.
5. Bichi Yesu aliderhere omu Luka 14:27-33 rhwakakolesa omu kurhabala abanafunzi berhu be Biblia?
5 Lusiku luguma, Yesu alikoleseze omufano guyerekene bichi omuntu akwanene ajire akaba alonzeze abe mwanafunzi wage. Aganira eju y’omuntu muguma oli walonza kuyumbaka omunara, n’eju y’omwami oli walonza kuja omu vita. Yesu aderha oku owayumbaka omunara, akwanene “arhange ayikale n’okugerereza bichi gwahwerako” n’ok’omwami walonza kuja omu vita, akwanene “arhange ayikale haguma n’abahanuzi bage” omu kulola akaba oburungu bwage buherhe obuhashe b’okujira ebi balonzeze kukola. (Osome Luka 14:27-33.) Konakuguma, Yesu alimenyere oku omuntu walonza abe mwanafunzi wage, akwanene agerereze bwinja bichi bihemere ajirage y’aba mwanafunzi wage. Che chirhumire, bihemere rhuhire abanafunzi omurhima bachihangane rhuhanze rhwayiga nabo buli boso. Nka gurhe rhwakajira ntyo?
6. Bichi rhwakachihangana kujira yi rhugwarha amafunzo mali majira amaja-mbere?
6 Ohwanze kuyiga kasanzi kanene n’abola bantu onayiga nabo oku milyango yabo. Nkabaga murhachihanza mwaganira eju ya lwandiko luguma lonyine, s’aliko mandiko mabiri buli mango wamamugalukira. Amango wamagalukira omunviriza siku zinene n’okubona oku bimusimisize, omubaze akaba nta hantu mwakayikala yi mugendereza enganiro. Okuntu oyola munviriza akushubiza, kwakuyereka kangana gurhe abwene akachiro k’elyola funzo lye Biblia. Kandi, omu kumurhabala ajire amaja-mbere juba-juba, wakabaza oyola mwanafunzi akaba ali tayari muhanze mwayiga kabiri omu boso. Aliko bihemere okujira binene olekere okuyiga liguma changwa kabiri omu boso konyine.
ORHEGANYE BULI MANGO EMBERE MUJE KUYIGA
Orheganye bwinja efunzo lyenyu lye Biblia, onayereke omwanafunzi wawe gurhe akarheganya (Olole echifungo cha 7-9)
7. Nka gurhe omwalimu akachirheganya bwinja buli mango embere y’okuyiga n’omwanafunzi wage?
7 Woyo nka mwalimu, okwanene ochirheganye bwinja embere y’okuja kuyiga n’omwanafunzi wawe. Wakarhondera omu kusoma ebi mwajayiga n’okusoma amandiko. Oyunve bwinja amawazo makulu. Owaze oku rhwe ly’ebimwayiga, engingo, ebibazo by’okuyiga, amandiko “m’okusoma,” amafoto n’evideo yoshi-yoshi yakakurhabala ofasiriye ogola mwazi bwinja. Ahandi oje wawaza oku mwanafunzi wawe n’okuntu wakafasiriya ogola mwazi omu njira eyorohere enali wazi y’omwanafunzi wawe aguyunva bwinja anagukolese.—Ne. 8:8; Mez. 15:28a.
8. Bichi ebinwa by’entumwa Paulo bili omu lwandiko lwa Wakolosai 1:9, 10 birhuyigirize oku bilolere okusalira eju y’abanafunzi berhu be Biblia?
8 Amango oli warheganya, osalire Yehova eju y’omwanafunzi wawe n’eju y’eby’akenere. Obwire Yehova akurhabale oyigirize Ebiblia omu njira yakahuma omuntu oku murhima. (Osome Wakolosai 1:9, 10.) Olole akaba hali chintu choshi-choshi chakakomerera omwanafunzi kuyunva, changwa kuyemera. Oyibuke oku omuhigo gwawe kuli kumurhabala ajire amaja-mbere m’ekiroho kuhikira obubatizo.
9. Gurhe Omwalimu akarhabala omwanafunzi wage ahanze arheganya embere w’okuyiga? Ofasiriye.
9 Rhulangalire oku efunzo lye Biblia linajirwa oku kahunda, lyarhabala omwanafunzi agwarhe eshukurani oku bi Yehova na Yesu bajirire n’echola charhuma ashonda kumenya binene. (Mt. 5:3, 6) Y’omwanafunzi ayunguka bwinja n’efunzo, akwanene akaze obwenge bwage oku by’ali ayiga. Omu kumurhabala ajire ntyo, omufasiriye bulagurhe kuli kw’akamaro achirheganye buli mango embere y’okuyiga omu kusoma embere y’akasanzi ebi mwayiga n’okuwaza nka gurhe akabikolesa omu kalamo kage. Gurhe wakamurhabala amenye kurheganya? Orheganye mwazi muguma haguma n’omwanafunzi wawe omu kumuyereka gurhe banarheganya. * Omufasiriye nka gurhe akapata juba-juba ebishubizo oku bibazo by’okuyiga, onamuyereke nka gurhe akalema ageza emistari oku binwa, y’akamurhabala ayibuke juba-juba echishubizo. Ahola wanaja wamubwira ahane echishubizo omu byage-byage binwa. Amango wamajira ntyo, echola chakurhabala omenye bwinja akaba anayunvirhe ebi mulimwayiga. Aliko hali echindi chintu wakaheba omwanafunzi wawe omurhima ayinje ajira.
OMUYIGIRIZE KUGANIRA NA YEHOVA BULI LUSIKU
Oyigirize omwanafunzi wawe gurhe akaganira na Yehova (Olole echifungo che 10-11))
10. Bulagurhe kuli kw’akamaro okusoma Ebiblia buli lusiku, na bichi bihemere okujira y’omuntu ayunguka n’ebi ali asoma omu Biblia?
10 Olekere okuyiga buli boso haguma n’omwalimu wage, omwanafunzi akayunguka omu kujira bindi bintu biguma oku misi yage yenyine buli lusiku. Bimuhemere aganire na Yehova. Nka gurhe? Omu kumuyunviriza n’okuganira naye. Akayunviriza Mungu omu kusoma Ebiblia buli lusiku. (Yos. 1:8; Zb. 1:1-3) Omuyereke gurhe akakolesa eprograme eyirikirwe “Programu ya Usomaji wa Biblia” eli oku jw.org. yakachapiswa. * Kweri, omu kumurhabala ayunguke bwenene n’ebi ali asoma omu Biblia, omuhebe omurhima awaze bwenene oku by’Ebiblia emuyigirize eju ya Yehova, n’okuntu akakolesa ebi ali ayiga omu kalamo kage.—Mdo. 17:11; Yak. 1:25.
11. Nka gurhe omwanafunzi akayiga kusalira bwinja, na bulagurhe okusalira Yehova buli lusiku kumuherhere akamaro?
11 Ohire omwanafunzi wawe omurhima aleme aganira na Yehova omu kusalira buli lusiku. Osalire n’omurhima goshi embere n’enyuma y’okuyiga n’omwanafunzi, onamuhebe mw’elyola sala. Amango ali ayunva amasala mawe, naye anayiga gurhe akahanza asalira n’omurhima gwage goshi n’oku akwanene asalire Yehova Mungu kugerera omu zino lya Yesu Kristu. (Mt. 6:9; Yoh. 15:16) Jaga wawaza nka gurhe okusoma Ebiblia buli lusiku (kuyunviriza Yehova) n’okusalira (kuganira na Yehova) kwakarhabala omwanafunzi wawe ayegere Mungu bwenene! (Yak. 4:8) Nk’alemere ajira ntyo buli lusiku, okola kwakamurhabala ajire aja-mbere m’ekiroho kuhikira amango achihana emwa Yehova n’okubatizwa. Bichi bindi byakamurhabala?
OMURHABALE AGWARHE OBWIRA BUKOMERE HAGUMA NA YEHOVA
12. Nka gurhe omwalimu akarhabala omwanafunzi wage agwarhe obwira bukomere haguma na Yehova?
12 Ebi omwanafunzi ali ayiga omu Biblia birhakwanene bije omu bwenge konyine, s’aliko bikwanene bimuhume n’oku murhima. Bulagurhe? Rhulonzeze omwanafunzi werhu ayige eju ya Yehova. Aliko ebi ali ayiga bikwanene bimuhume oku murhima y’abikolesa omu kalamo kage. Yesu aliri ayigiriza abantu bintu binene, banalisimire agenderera kubayigiriza. Aliko abantu baliri bamukulikira bulala aliri abayigiriza ebintu bibahumire n’oku murhima. (Lu. 24:15, 27, 32) Omwanafunzi wawe akwanene abone Yehova nka muntu nya-muntu ey’akajira obwira haguma naye, n’okumubona nk’Eshe, Mungu wage, na Mwira wage. (Zb. 25:4, 5) Amango oliwayiga n’omwanafunzi wawe we Biblia, ochiseze bwenene oku ngeso zinja za Mungu. (Kut. 34:5, 6; 1 Pe. 5:6, 7) Ebe nganiro nyabachi muli mwaganirira, oseze obwenge oku Borhere bwa Yehova. Orhabale omwanafunzi wawe asimiswe n’engeso zinja za Yehova nk’obuzigire, obwinja n’olukogo. Yesu aliderhere aku “erhegeko likulu na lirhanzi” kuli “kuzigira Yehova Mungu wawe.” (Mt. 22:37, 38) Olole nka gurhe wakarhabala omwanafunzi wawe azigire Mungu bwenene.
13. Lerha omufano guyerekene nka gurhe wakarhabala omwanafunzi we Biblia ayige eju y’engeso zinja za Yehova.
13 Omu nganiro zenyu haguma n’omwanafunzi wawe, omuyereke oku nawe onazigira Yehova bwenene. Okola kwakarhabala omwanafunzi wawe amenye oku akwanene abe mwira wa Yehova anayige kumuzigira. (Zb. 73:28) Omufano, nka hali omustari guli omu chitabu muli mwayiga changwa guli omu lwandiko guyerekene chintu chilebe eju ya Yehova, nk’obuzigire bwage, obwengehe, okunali n’emisi yage, bikuhumire oku murhima? Oguyereke omwanafunzi wawe, onaleke yenyine achibonere oku eli nguma omu mpanvu zirhumire ozigire Darha w’embingu. Hali chindi chintu chilebe buli mwanafunzi we Biblia akwanene ajire y’ajira amaja-mbere kuhikira obubatizo.
OMUHEBE OMURHIMA AHIKE OKU MBUGANANO Z’ECHIBAGA
Ohebe omwanafunzi wawe omurhima arhalegamaga kuja oku mbuganano nk’okubyakashobokana! (Olole echifungo che 14-15)
14. Bichi olwandiko lwa Waebrania 10:24, 25 lurhuyigirize oku bilolere embuganano z’echibaga byakarhabala omwanafunzi we Biblia ajire amaja-mbere m’ekiroho?
14 Rhweshi rhulonzeze abanafunzi berhu bajire amaja-mbere kuhikira obubatizo. Njira nguma y’akamaro rhwakabarhabalamo, kuli kubaheba omurhima bahike oku mbuganano z’echibaga. Abalimu baminuzize baba banaderha oku abanafunzi banaja oku mbuganano, barhalegama kujira amaja-mbere m’ekiroho. (Zb. 111:1) Balimu baguma banafasiriya abanafunzi babo oku, olekere ebi banayiga omu funzo lyabo lye Biblia, bakayiga binene nka bajire oku mbuganano. Osome Waebrania 10:24, 25 haguma n’omwanafunzi wawe, onamufasiriye enyungu akapata nk’ahikire oku mbuganano. Omuyereke evideo Bici Binakolwa aha Rhunakusanyikira? * Orhabale omwanafunzi wawe abone oku okuja oku mbuganano za buli boso kuli kw’akamaro omu kalamo kage.
15. Bichi rhwakajira yi rhurhabala omwanafunzi werhu ayinje aja oku mbuganano buli mango?
15 Gurhe wakajira nk’omwanafunzi wawe arhahika oku mbuganano changwa anahikako liguma-liguma? Omubwire oku bushagaluke oku bi muchizindire kuyiga oku mbuganano. Amango amabona okuntu osimire embuganano, naye akayunva enyorha y’okujako. Omuhe Omunara g’Omulanzi ne Buku la Mukutano Utumishi na Maisha, y’abona ebili byayigwa oku mbuganano. Omuyereke ebi nji byayigwa oku mbuganano ekulikire, onamubaze chigabi chihe mubyo abwene chimusimisize bwenene. Ebi omwanafunzi wawe nj’achibonera oku mbuganano yage y’oburhanzi, nji byaba bilushire choshi abwene n’okuyunva oku nshimanano y’elindi dini. (1 Ko. 14:24, 25) Nj’abugana kw’abandi bantu bali mufano gwinja akayiga, bakanamurhabala ajire amaja-mbere kuhikira obubatizo.
16. Bichi bihemere okujira omu kurhabala abanafunzi b’Ebiblia bajire amaja-mbere kuhikira obubatizo, na bichi nji rhwayiga omu mwazi gukulikire?
16 Gurhe rhwakarhabala abanafunzi berhu be Biblia bajire amaja-mbere m’ekiroho kuhikira obubatizo? Rhwakarhabala buli mwanafunzi abone akamaro k’okuyiga Ebiblia omu kumuhira omurhima aleme ayiga buli boso n’okurheganya embere z’okuyiga. Rhwakashuba kumuhira omurhima aleme aganira na Yehova buli lusiku anagwarhe obwira bukomere haguma naye. Rhwakaheba omwanafunzi we Biblia omurhima aleme aja oku mbuganano z’echibaga. (Olole echisanduku “ Ebi Abanafunzi Bakwanene Bajire yi Bajira Amaja-mbere Kuhikira Obubatizo.”) Aliko, nk’oku omwazi gukulikireho nji gwafasiriya, hali bindi bintu birhano abalimu be Biblia bakwanene bajire yi barhabala abanafunzi babo bajire amaja-mbere kuhikira obubatizo.
WIMBO 76 Unahisije?
^ mus. 5 Okuyigiriza omuntu chintu chilebe kuli kumurhabala “awaze, changwa akole omu yindi-yindi njira.” Olwandiko lwerhu l’omwaka gwa 2020, Matayo 28:19, lwarhuyibwise akamaro k’okuyiga Ebiblia haguma n’abantu n’okubayigiriza nka gurhe bakaba banafunzi ba Yesu Kristu babatizwe. Mu gunola mwazi n’ogukulikire, rhwabona nka gurhe rhwakayerekana oku akola kasi kali k’akamaro.
^ mus. 2 AMAFASIRIYO M’EBINWA: Akaba hali omuntu onaganira naye oku kahunda omu kukolesa Ebiblia, n’omu kukolesa njira zilebe z’okuyigiriza, oli waongoza efunzo lye Biblia. Wakaripoti efunzo akaba wayerekere omuntu gurhe bayiga Ebiblia, n’akaba wamayiga naye kabiri kurhangira amango wamuyerekaga, n’akaba ochizerere oku elyola funzo lyagenderera.
^ mus. 3 Eyila myazi yombi egwerhe amahano marhengere omu myazi ekulikirene ederhere: “Kuongoza Mafunzo ya Biblia Yenye Maendeleo,” yaliri yabonekana omu Huduma ya Ufalme kurhenga Mwezi gwa 7, 2004 kugera Mwezi gwa 5, 2005.
^ mus. 4 Ebila rhwaderhere bilolere buli funzo, libe lya mulume changwa mukazi.
^ mus. 9 Omuyereke evideo ya miniti 4 ederhere ntya: Tuonyeshe Wanafunzi Wetu Namna ya Kujitayarisha. Oku Library®, ofungule MULTIMEDIA > NOS REUNIONS ET NOTRE MINISTERE > DEVENONS PLUS HABILES.
^ mus. 10 Ofungule MAFUNDISH0 YA BIBLIA > VYOMBO VYA KUSAIDIA KUJIFUNZA BIBLIA.
^ mus. 14 Oku JW Library®, ofungule MULTIMEDIA > NOS REUNIONS ET NOTRE MINISTERE > OUTILS POUR LA PREDICATION.
