SOMO LYE 18
Gurhe rhunarhabala Bene Berhu Amango m’Obuhanya?
Erepiblike ye Dominike
Japo
Haiti
Amango obuhanya bwamarhengerera, buzira okulegama Abahamirizi ba Yehova banarhola emipango y’okuntu bakarhabala bene babo bahikirwe n’obuhanya. Okujira ntyo kuyerekene oku rhuzigirana bwenene. (Yohana 13:34, 35; 1 Yohana 3:17, 18) Gurhe rhunajira yi rhubarhabala?
Rhunahana efuranga. Amango enzara ekalihire yarhengeraga omu chihugo che Yudeya, Abakristu b’amango m’entumwa be Antiyokiya balirhumire abakristu be Yudeya efuranga z’okubarhabala. (Matendo 11:27-30) Na zene, amango rhwamayunva oku bene berhu balamire fasi ndebe omu gulu bahikirwe n’obuhanya, rhunarhuma enshololo kugerera echibaga cherhu yi rhurhabala abola bantu bakenere oburhabale.—2 Wakorinto 8:13-15.
Rhunabaha oburhabale. Abashamuka bali omu eneo yarhengerere m’obuhanya banalonza okumenya ahantu buli mwene werhu na mwali werhu w’omu chibaga akabonekana, yi bachiyemeza oku boshi babonekene banali bagumaguma. Ekomite y’okuhana oburhabale enayumangira akasi k’okuhana ebilyo, amenji machere m’okunywa, emyambaro, ahantu h’okulama n’okubukwa. Bahamirizi banene baherhe obuhashe bukwanene banachihana n’okuchilipira olugenzi bonyine l’okugenda emunda obuhanya bwarhengerere, omu kurhabala kukwiza enju za bene berhu n’Amachumbi g’Obwami gashandukire. Bulala rhuli omu buguma rhunakomeere okukola haguma omu lubaga lwa Yehova, echola chinarhurhabala okugwasa juba-juba n’okuhana oburhabale bukenerwe. Chiro akaba oku rhunarhabala balala “bali mulala gwerhu omu bwemere,” nka bishobokene, rhunarhabala n’abarhali Bahamirizi ba Yehova.—Wagalatia 6:10.
Rhunabarhuliriza kugerera Ebiblia. Abantu bahikirwe n’obuhanya baba balagirire okurhulirizwa bwenene. Mw’ebyola bisanzi, rhunalangalira Yehova Mungu w’oburhulirize boshi y’arhuha emisi. (2 Wakorinto 1:3, 4) Rhunahubiri n’obusime bwenene abarhaherhe obunihire bwe bilagane bye Biblia; rhwanabayemeza oku hanola hofi Obwami bwa Mungu bwamala ubuhanya boshi bunalerha amalumwa n’amalibuko.—Ufunuo 21:4.
-
Bichi birhuma Abahamirizi ba Yehova barhalegama kuhana oburhabale amango obuhanya bwamarhengera?
-
Gurhe rhunarhuliriza abantu bahikirwe n’obuhanya?
