Ebiblia ederhere bigusho bibiri by’abalume b’echikristu banakola rhwasi rhunene omu chibaga. “Abemangizi changwa abashamuka” “n’Abagwasi b’akasi.” (Wafilipi 1:1) Oku kahunda, buli chibaga chijira abashamuka n’abagwasi b’akasi. Kasi kachi Abagwasi b’akasi barhukolera?

Banarhabala abashamuka. Abagwasi b’akasi baba bene berhu bagwerhe obwira bukomere haguma na Yehova, baba banihirwe, banakenga akasi kabo. Baguma mubo baba misole n’abandi baba bantu bakulire. Banajira rhwasi rhunene rhw’akamaro rhulolere okupanga ebintu bibonekene omu chibaga. N’echola chanarhabala abashamuka baseze obwenge bwabo oku kasi k’okuyigiriza n’ak’obungeri.

Banakola rhwasi rhunene rhw’akamaro. Abagwasi b’akasi baguma bajira akasi k’okukaribisa abantu boshi bayinjire oku mbuganano. Abandi banakola oku byuma by’okuyongeza omulenge, oku bitabu, oku bilolere oluganjo lw’efuranga, n’okuha abahubiri amaeneo m’okuhubirimo. Banarhabala n’omu kukwiza Echumbi ly’Obwami. Abashamuka bakabwira abagwasi b’akasi barhabale bene berhu na bali berhu bakola bashajire. Abagwasi b’akasi baba juba-juba okukola akasi koshi bahabirwe, na buli muntu omu chibaga anabakengera obo bushiru bwabo.​—1 Timoteo 3:13.

Baba lwiganyo lwinja oku bandi. Bene berhu baguma bashimikwa yi baba bagwasi b’akasi kwa bulala bayerekene engeso zinja. Amango bali bageza ebipindi byabo oku mbuganano, banakomeza obwemere bwerhu. Baba lwiganyo lwinja omu mahubiri, nantyo, banarhuhira omurhima nerhu rhuhubiri n’obushiru. Kwa bulala banayunvikana n’okukola haguma n’abashamuka, okola kwanarhuma echibaga chagwarha obusime n’obuguma. (Waefeso 4:16) N’enyuma ya siku zilebe, nka bamayeneza ebi hemerwe, banaba bashamuka.

• Abagwasi b’akasi baba bantu bachi?

• Abagwasi b’akasi bichi banakola omu kurhabala echibaga?