Mango mageke embere Yesu afe, aderha ntya: “Ogula mwazi gwinja g’obwami nji gwahubiribwa omu gulu lyoshi lilamirweko yi buba buhamirizi oku bantu b’amashanja moshi, n’enyuma y’ahola obuzinda bwanayinja.” (Matayo 24:14) Aliko si, gurhe akola kasi k’okuhubiri omu gulu lyoshi kakajirikire? Omu kuyiganya enjira Yesu agendaga akolesa omu kuhubiri amango aliri oku gulu.​—Luka 8:1.

Rhunahubiri inju oku nju. Yesu alikomeeze abanafunzi bage okuhubiri inju oku nju. (Matayo 10:11-13; Matendo 5:42; 20:20) Abola bahubiri ba burhanzi-rhanzi balihabirwe eneo y’okuhubiri. (Matayo 10:5, 6; 2 Wakorinto 10:13) Konakuguma zene, akasi k’okuhubiri kaba kapangirwe bwinja, na buli chibaga chinahabwa eneo y’okuhubiri. Echola chinarhurhabala okuyeneza akasi Yesu arhuhere ‘k’okuhubiri abantu n’okuhana obuhamirizi buyenere.’​—Matendo 10:42.

Rhunachihangana okuhibiri abantu hoshi bakabonekana. Yesu alirhulekere olwiganyo; aliri ahubiri oku nafasi z’abantu banene; nk’okumashinji, changwa oku chisima abantu boshi bakazaga domerako. (Marko 4:1; Yohana 4:5-15) Nerhu rhunaganira n’abantu oku bilolere Ebiblia hoshi bakabonekana; nk’omu njira, ahantu banakolera, omu mashwa, n’oku telefone. Kandi rhunahubiri abaturanyi berhu, abarhusoma nabo, abarhukola nabo changwa ab’omu mulala gwerhu nka bigalikene okujira ntyo. Omu kuchihangana okukolesa ezola njira zoshi z’okuhubiri, amamiliyoni m’abantu omu gulu lyoshi bayunvirhe “omwazi gwinja g’obuchunguke.”​—Zaburi 96:2.

Hali omuntu obwene wakabwira k’ogula mwazi gwinja g’obwami n’emigisho gwakamulerhera omu siku zayinja nk’ayunvirize si? Orhachizingiraga k’ogola mwazi g’obunihire wenyine. Ogubwire oku bantu amango moshi byashobokene okujira ntyo!

• “Mwazi gwinja” guhe gukwanene kuhubiribwa?

• Gurhe Abahamirizi ba Yehova banayiganya enjira Yesu aliri akolesa omu kuhubiri?