Akaba osimire okulonza emyazi y’omenya Ebiblia bwinja, olonzeze omenye binene oku lwandiko changwa omuntu mulebe, ahantu halebe, changwa echindi chintu chiderherwe omu Biblia; changwa wakaba onachibaza gurhe omwazi gwa Mungu gwakakurhabala okulwisa ebibazo byawe; waka kolesa Ebibliyoteke y’Echumbi ly’Obwami.

Eba mw’ebikoleso by’okurhurhabala okulonza emyazi. Hali okuntu ey’orhagwerhe ebitabu byoshi biherhe emyazi erhengerere omu Biblia by’Abahamirizi ba Yehova bibonekene omu lulimi lwawe. S’aliko Ebibliyoteke y’Echumbi ly’Obwami eli mw’Ebitabu binene bya buno. yakaba mw’ezindi tafusiri ze Biblia, Ediksionere nyinja, n’ebindi bitabu byakakugwasa kulonza emyazi. Wakakolesa eyola Bibliyoteke embere changwa enyuma w’embuganano. Akaba eyola bibliyoteke eli mwe Ordinatere, yakaba eli mwe Watchtower Library. Watchtower Library eba programe y’echielektronika ejira bitabu byerhu binene. Ejira n’ahantu wakakolesa omu kulonza emyazi eju y’echinwa chilebe, echintu chilebe changwa olwandiko lulebe omu bulyo buyorohere.

Enarhabala abanafunzi b’embuganano Akasi n’Akalamo. Wakakolesa ebibliyoteke y’Echumbi ly’Obwami amango oli warheganya echipindi chawe. Omwimangizi w’embuganano Akasi n’Akalamo yeba alolere eyola bibliyoteke. Akwanene okulola akaba bahebere mw’ebitabu bihyahya n’akaba bipangirwe bwinja. Yewe changwa mwene werhu onakuyigiriza Ebiblia, akakuyereka gurhe wakabona emyazi okenere. S’aliko, nta muntu okwanene akule mw’echitabu n’okuchiheka emwage. Kandi, rhurhakwanene rhubiharabise, rhurhanankwanene rhubihebe mw’ebimenyeso changwa okubiyandikamo.

Ebiblia ederhere oku y’omuntu agwarha ‘obumenyi eju ya Mungu, akwanene abulonze nka “buhirhi bubishirwe.” (Mezali 2:1-5) Ebibliyoteke y’Echumbi ly’Obwami yakakurhabala okurhondera kubulonza.

• Bikoleso bihe byakakurhabala kulonza emyazi, biba omu bibliyoteke y’Echumbi ly’Obwami?

• Bande bakakurhabala omenye gurhe wakayikolesa bwinja?