Bantu banene banawaza oku Abahamirizi ba Yehova lili zino ly’Edini lihyahya. N’obola, hamagera myaka erhalwise 2 700 eyi Mungu w’okuli ayirikire abakozi bage okubali “bahamirizi” bage. (Isaya 43:10-12) Embere y’omwaka gwa 1931, rhwakazaga yirikwa banafunzi be Biblia. Bichi byarhumaga rhwayirikwa Bahamirizi ba Yehova?

Elyola zino liyerekene Mungu werhu ye nde. Ezino lya Mungu, Yehova, liba hofi kali 7 000 omu mandiko ma mira me Biblia. Omu Tafusiri zinene ze Biblia bakulire mw’elyola zino, n’ahalyaliri bahebere h’amazino m’obukulu changwa m’obukenge nka Waliha changwa Mungu. N’obola Mungu w’okuli yenyine ye wabwiraga Musa kwe zino lyage ye Yehova. Amubwira ntya: “Elyola ly’ezino lyani esiku zoshi.” (Kutoka 3:15) Ahola ayerekana oku arhali kuguma n’abandi ba mungu boshi b’obubeshi. Rhugwerhe omwishingo g’okuyirikwa omu zino lichesibwa lya Mungu.

Elyola zino liyerekene akasi kerhu. Kurhangirira ku Abeli, Muntu w’okunali, bantu banene ba mira baliherhe obuyemere mu Yehova banamuhamiriza. Omu magana m’emyaka yakulikiragaho, Noa, Abrahamu, Sara, Musa, Daudi, n’abandi banene bachiheba “mw’echola chichu chinene ch’abahamirizi.” (Waebrania 11:4–12:1) Nk’ok’omuntu akahamiriza owindi muntu orhaherhe magosa omu kabuga (oku tribinale), konakuguma nerhu, rhunahamiriza okuli eju ya Mungu werhu embere z’abandi.

Yesu naye aba muhamirizi. Ebiblia eyirikire Yesu “muhamirizi mwimana kandi w’okuli.” (Ufunuo 3:14) Yesu yenyine aliderhere ‘oku alimenyeseze ezino lya Mungu’ ‘n’okuhamiriza okuli’ oku biyerekeze Mungu. (Yohana 17:26; 18:37) Chechirhumire abanafunzi b’okuli ba Kristu bakwenene okuyirikwa oku zino lya Yehova n’okulimenyesa oku bandi. Intyo kw’Abahamirizi ba Yehova banachihangana kujira.

• Bichi byarhumaga abanafunzi be Biblia bayirikwa Bahamirizi ba Yehova?

• Kurhangira mango machi eyi Yehova aherhe Abahamirizi oku gulu?

• Inde Muhamirizi mukulu bwenene wa Yehova?