Amango m’entumwa, echigusho chigeke, k’okuderha, “entumwa n’abashamuka be Yerusalemu,” babaliri baraza lirhambwire; babaliri bachishoga eby’echibaga ch’abakristu bashigwa-mavurha choshi chikwanene chikole. (Matendo 15:2) Baliri bachishoga omu buguma bulala baliri barhanga kulolereza eby’amandiko maderhere n’okukulikira oburongozi bw’Eroho lichesibwa lya Mungu. (Matendo 15:25) Na mu zinola siku, olola lwiganyo lwe Baraza Lirhambwire linakulikira.

Mungu anakolesa Ebaraza lirhambwire omu kujira obulonza bwage. Bene berhu bashigwa bakolere ebaraza lirhambwire, basima omwazi gwa mungu bwenene, baminuzize omu kuyimangira akasi na byoshi bilolere ebintu by’ekiroho. Banabuganana buli boso omu kuganirira oku bi bene berhu na bali berhu b’omu gulu lyoshi bakenere. Nk’okubyanaliri omu mango m’entumwa Ebaraza lirhambwire linahana empanulo zirhegerere omu Biblia kugerera amaruba, abemangizi b’omuzunguluko n’abandi. Echola chanarhabala abantu ba Mungu bawaze bwenene n’okukola omu buguma. (Matendo 16:4, 5) Ebaraza lirhambwire liba liyimangire akasi k’okurheganya ebilyo by’ekiroho, linahira Abahamirizi boshi omurhima bahire akasi k’okuhubiri Obwami oku nafasi y’oburhanzi; linayimangire akasi k’okushimika bene berhu boshi oku makasi maguma maguma.

Ebaraza lirhambwire linakulikira oburongozi bw’eroho lya Mungu. Ebaraza lirhambwire liba lilangalire Yehova, Mukulu w’amahanga moshi, na Yesu, Mukulu w’olubaga. (1 Wakorinto 11:3; Waefeso 5:23) Abola bene berhu b’ebaraza lirhambwire barhachibona nka b’abarhegesi b’olubaga lwa Mungu. Bowe, haguma n’abandi bakristu bashigwa boshi, “bali bagenderera kukulikira omwana buzi (Yesu) hoshi anajire.” (Ufunuo 14:4) Bene berhu b’ebaraza lirhambwire banaderha koko bwenene oku masala rhunabasalilira.

• Omu mango m’entumwa bande baliri baraza lirhambwire?

• Gurhe ebaraza lirhambwire linalonza oburongozi bwa Mungu mu zinola siku?