Omu lubaga lwerhu muharhaba Abakulu b’edini banalipwa efuranga oku kasi banakola. S’aliko, nko kubyanaliri amango echibaga ch’echikristu charhondereswaga, abalume bayeneze engeso zinja Ebiblia ederhere, banashimikwa “yi balanga Echibaga cha Mungu.” (Matendo 20:28) Abola bashamuka baba balume bakulire ekiroho, banayerekeza n’okulanga echibaga, “arhali omu kusezwa, s’aliko oku bulonza embere za Mungu; arhali omu kusima enyungu erhakwanene, s’aliko okunyorha.” (1 Petro 5:1-3) Kasi kachi banarhukolera?

Banarhulagako n’okurhulanga. Abashamuka banarongoza n’okurhabala buli muntu omu chibaga agwarhe obwira bukomere haguma na Yehova. Bulala bamenyere oku Mungu ye bahere akola kasi k’akamaro, barharhegeka abantu ba Mungu, s’aliko banarhurhabala rhugwarhe oborhere bukwirire n’obusime. (2 Wakorinto 1:24) Kuguma n’ok’omungeri ahangayikira buli ntama y’omu chigusho chage n’obushiru, Abashamuka nabo banachihangana kumenya bene berhu na bali berhu boshi b’omu chibaga.​—Mezali 27:23.

Banarhuyigiriza okuntu rhwakakola obulonza bwa Mungu. Buli boso abashamuka banayimangira embuganano ze Chibaga yi bakomeza obwemere bwerhu. (Matendo 15:32) Abola balume b’obushiru banayimangira akasi k’amahubiri, banahubiri nerhu n’okurhukomeeza mu buli chigabi ch’amahubiri.

Banarhuheba omurhima. Omu kurhurhabala rhugwarhe obwira bukomere haguma na Yehova, abashamuka banarhulambagirira emwa berhu n’okuganira haguma nerhu oku Chumbi ly’Obwami omu kurhurhabala n’okurhurhuliriza kugerera amandiko.​—Yakobo 5:14, 15.

Olekere akasi banarhukolera omu chibaga, bashamuka banene bajira amakasi m’omubiri, na bindi bintu binene by’okukolera emilala yabo; bakwanene bagwarhe ebisanzi by’okuhangayikira ebyola byoshi. Bulala abola bene berhu banakola akasi n’obushiru, rhukwanene rhubakenge.​—1 Watesalonike 5:12, 13.

• Kasi kachi Abashamuka be Chibaga Banakola?

• Gurhe abashamuka banayerekana oku balagire ku buli muguma werhu?