SOMO LYA 24
Efuranga z’okurhabala mw’ebyola byoshi ngahe zinarhenga?
Nepal
Togo
Angletere
Buli mwaka rhunachapisa n’okugabira abantu amamiliyoni me Biblia n’ebindi bitabu buzira okubahema efuranga. Rhunayumbaka n’okukwiza Amachumbi g’Obwami n’Enju z’ebiro by’omurhabi. Rhunayenezeza ebihumbi by’abakola oku Beteli, Bamisiyonere ebibakenere, n’okurhabala abahikirwe n’obuhanya. Hali okuntu wakachibaza ntya: ‘Efuranga z’okurhabala mw’ebyola byoshi ngahe zinarhenga?’
Rhurhahana chakumi, rhurhanagusha esadaka. Chiro akaba okw’akasi kerhu k’okuhubiri kahemere efuranga zinene rhurhahemuza efuranga. Hamagera miaka erhalwise egana egazeti y’Omunara g’Omulanzi ya kabiri ederhere oku rhunihire oku Yehova yenyine yegendereza akasi kerhu chechirhumire “rhurhakahemuza efuranga changwa okulakirira abantu barhurhabale.” Rhurhanasaga kujira ntyo haba n’olusiku n’oluguma!—Matayo 10:8.
Akasi kerhu kanakolwa kugerera enshololo abantu banahana oku bulonza . Bantu banene banasimiswa n’akasi kerhu k’okuyigiriza abantu Ebiblia, na kugerera echola banahana enshololo y’okukarhabala kagenderere. Abahamirizi ba Yehova banayunva basimire omu kuhana ebisanzi byabo, emisi, efuranga n’ebindi bintu y’obulonza bwa Mungu bujirika oku gulu lyoshi. (1 Mambo ya Nyakati 29:9) Oku machumbi m’Obwami n’oku Mbuganano zerhu zikulu haba orhusanduku rhw’enshololo abantu boshi balonzeze basholole bakahiramo changwa omuntu akahana enshololo kugerera oku site yerhu y’Enternete jw.org. Ahanene omu furanga rhunabona, ezinene zinahanwa n’abantu barhachigalire, kuguma n’olala mukana Yesu achishingiraga ey’arhogeze bicheri bibiri bigeke by’efuranga omu kasanduku k’enshololo. (Luka 21:1-4) Chechirhumire, buli muntu ‘akahira echintu eburhambi’ buli mango y’ahana enshololo “nk’okwanalihigire omu murhima gwage.”—1 Wakorinto 16:2; 2 Wakorinto 9:7.
Rhuherhe obwemere oku Yehova agenderera kushunika emirhima ya balala boshi balonzeze ‘kumukenga kugerera ebintu byabo by’akamaro bwenene’ omu kugendereza akasi k’Obwami y’obulonza bwa Mungu bujirika.—Mezali 3:9.
-
Bichi birhumire olubaga lwerhu lurhali kuguma n’amandi madini?
-
Bichi enshololo abantu banahana oku bulonza zinakola?
