Nk’okw’ezino liba oku Chumbi ly’Obwami linayerekene, enyigirizo nkulu ye Bibliya enaganirwako mw’amola machumbi m’obwami buba bwami bwa Mungu. Lye lyanaliri rhwe ly’amahubiri ma Yesu.​—Luka 8:1.

Hantu obuharamye b’okuli bunajirikira. Ahola h’emipango yoshi y’okuhubiri omwazi gwinja m’obwami enarholerwa. (Matayo 24:14) Amachumbi m’obwami marhaba malehere kuguma, marhanaba mayumbakirwe moshi kuguma; s’aliko maba m’olugero marhanapambirwe bwenene omu kuntu kusomezwe. Chumbi liguma lyakakoleswa na chibaba chiguma changwa binene. Omu myaka egerere rhwayumbakire ebihumbi by’Amachumbi m’Obwami (oku bugeke machumbi m’obwami marhano buli lusiku). Ngahe efuranga z’okukola ebyola byoshi zinarhenga?​—Matayo 19:26.

Manayumbakwa Kugerera enshololo z’efuranga zinahanwa eju y’akasi k’okuyumbaka. Ezola furanga zinarhumwa oku biro by’omurhabi, y’ebibaga bilagirire okuyumbakirwa changwa okukwizizwa Amachumbi m’Obwami bazikolesa.

Manayumbakwa na bene berhu ba buli lubero bachihanire buzira oku lipwa. Omu bihugo binene haba Ebigusho byab’okuyumbaka Amachumbi m’Obwami. Ebigusho by’ab’okuyumbaka biba mu bene berhu na bali berhu bachihanire banajira akasi k’okuyumbaka Amachumbi m’Obwami. Amango bamamala kuyumbaka Echumbi ly’Obwami banagenda kuyumbaka elindi mw’echola chihugo ch’en’echola omu kurhabala ebibaga kuyumbaka Amachumbi mabo m’obwami. Banagenda chiro n’omu ma eneo ma hale. Omu bindi bihugo, Abahamirizi bakwanene banashimikwa omu kuyumangira akasi k’okuyumbaka n’okukwiza echumbi ly’Obwami omu eneo nguma changwa omu yindi. Chiro akaba oku bene berhu banene b’eyindi eneo bamenyere kuyumbaka banachihana bwenene omu kurhabala amango m’okuyumbaka, bene berhu na bali berhu b’echola chibaga banakola kasi kanene. Akola kasi koshi kanashobokana kugerera emisi ya Yehova n’obushiru abantu ba Mungu banayerekana.​—Zaburi 127:1; Wakolosai 3:23.

• Bulagurhe aharhuharamiza Yehova hayirikwa Chumbi ly’Obwami?

• Kugerera bichi rhushobola kuyumbaka Amachumbi m’Obwami omu gulu lyoshi?