Echinwa “Painiya” chikoleswa ahanene omu kuyerekana omuntu onaja kurhangula eneo lilebe lihyahya n’okufungulira abandi enjira yi bayikulikira. Rhwakaderha oku Yesu aliri painiya, kwa bulala alirhumirwe oku gulu y’ahubiri oburhumwa bw’akalamo n’okufungula enjira y’okupata obuchunguke. (Matayo 20:28) Zene, abanafunzi bage bali bamuyiganya omu kugeza bisanzi binene nk’oku bagalire omu kasi ‘k’okujira abanafunzi.’ (Matayo 28:19, 20) Baguma bagalire kujira ntyo omu kuba ba painiya.

Painiya aba muhubiri w’esiku zoshi. Abahamirizi ba Yehova boshi baba bahubiri b’omwazi gwinja. S’aliko, baguma mubo bachipangire bwinja omu kalamo kabo yi baba bapainiya b’oku kahunda (ba kawaida); banahubiri isa 70 buli mwezi. Yi bagala kujira ntyo, bachihangana kugwarha akasi k’omubiri karhabahekere ebisanzi byoshi. Abandi barholerwe yi baba bapainiya baminuzize (wa pekee) yi baja kukolera omu maeneo malagirire bwenene abahubiri b’Obwami; banahubiri isa 130 chagwa kurhalusa buli mwezi. Bapainiya banasimira kulama akalamo kayorohere, eyi banaherhe obuyemere oku Yehova abaha ebibakenere omu kalamo. (Matayo 6:31-33; 1 Timoteo 6:6-8) Balala barhakagala kuba ba painiya b’oku kahunda changwa baminuzize, bakaba bapainiya bagwasi (wasaidizi) amango bagalire kujira ntyo; banayongera obushiru bwabo omu kuhubiri isa 30 changwa 50 oku mwezi.

Okusima Mungu n’abantu k’okushunika omuntu abe painiya. Kuguma na Yesu, rhubwene gurhe bantu banene zene balagirire bwenene okumenya Mungu. (Marko 6:34) S’aliko ebirhumenyerere byakabarhabala kurhonderera mu zinola siku n’okubaha obunihire bw’esiku zayinja. Okusima abantu kunashunika painiya akolese ebisanzi byage n’emisi yage omu kurhabala abandi bayunve omwazi gwinja. (Matayo 22:39; 1 Watesalonike 2:8) Nantyo, obwemere bwage bwanakomera, anayegera Yehova bwenene, n’okugwarha obusime bunene.​—Matendo 20:35.

• Painiya ali nde?

• Bichi bishunika bahubiri baguma babe ba painiya b’akahunda changwa baminuzize?