Embuganano z’abakristu b’oburhanzi zirhaliri za kuchisimisa konyine. Oku bunene bagendaga bayimpa, okusalira, okusoma amandiko haguma n’okumaganirako. Nta yindi migenzo y’edini bakazaga kujira. (1 Wakorinto 14:26) Intyo kurhunajira oku mbuganano zerhu.

Enyigirizo zerhu zirhengerere omu Biblia, zinarhurhabala n’omu kalamo. Lweboso changwa lwa Yenga (lwamungu), bene berhu na bali berhu ba buli chibaga banabuganana omu kuyunviriza ejambo lirhengerere omu Biblia lya miniti 30. Elyola jambo linarhuyereka gurhe amandiko makarhurhabala omu kalamo, n’okurhumenyesa bichi amandiko maderhere okubiyerekeze chinola chihe rhulamiremo. Amango omwigiriza amasoma olwandiko, rhuba rhuheberwe omurhima rhumukulikire omu Biblia zerhu. Enyuma w’ejambo, rhunajira Enyigirizo y’Omunara g’Omulanzi mu sa nguma. Rhunaganira oku mwazi muguma guli omu Munara g’Omulanzi g’okuyiga, n’ahola buli yeshi olonzeze akashubiza. Eyola nganiro enarhurhabala rhumenye gurhe rhwakakolesa empanulo ze Biblia omu kalamo kerhu. Omu gulu lyoshi, Abahamirizi ba Yehova banayiga ogo mwazi gon’ogola omu bibaga birhalwise 120 000.

Embuganano zinarhurhabala rhumenye obulyo b’okuyigiriza bwinja. Ahagarhi k’eboso, rhushuba kubuganana lusiku luguma oku mbuganano ya bigabi bisharhu eyirikwa, Utumishi na Maisha ya Mukristo. Emyazi y’eyola mbuganano eba erhengerere omu Buku la Mukutano Utumishi na Maisha ya Mukristo lihanwa buli mwezi. Echigabi ch’oburhanzi ch’eyola mbuganano chiyirikwa, Utajiri wa Neno la Mungu; chinarhurhabala kumenyerera echigabi chilebe che Biblia, echibaga chalibere chihemerwe chibe chasoma embere w’aho. Echigabi cha kabiri chiyirikwa Tujitoe Kabisa Katika Kazi ya Kuhubiri, chijira ebyerekane (onyesho) binarhurhabala kumenya gurhe rhwakaganira n’abantu oku bilolere Ebiblia. Omuhanuzi anahana mpanulo ziguma z’okurhurhabala rhukuze obumenyi bwerhu b’okusoma n’okuganira n’abantu. (1 Timoteo 4:13) Echigabi ch’obuzinda chiyirikwa Maisha ya Mukristo; chinarhurhabala rhumenye gurhe rhwakakolesa amakanuni me Biblia omu kalamo kerhu ka buli lusiku. Chiba chiherhe enganiro y’ebibazo n’ebishubizo binarhurhabala rhumenyerere Ebiblia.

Amango nji waja oku mbuganano zerhu, kweri nji wasima bwenene enyigirizo zinja ze Biblia nji wayigirizwa.​—Isaya 54:13.

• Gurhe embuganano z’Abahamirizi ba Yehova zinagera?

• Omu mbuganano rhunajira buli boso, ehe wakasima orhange ojeko?