Chirhumire abala bantu obwene kw’eyila foto bashagalukire? Bulala bali oku nguma y’Embuganano zerhu zikulu. Mungu alibwirire abakozi bage ba mira oku baleme babuganana kasharhu omu mwaka. Kuguma nabo rhunabuganana kasharhu omu mwaka oku mbuganano zerhu zikulu. (Kumbukumbu la Torati 16:16) Rhujira mbuganano zikulu esharhu omu mwaka: Rhunajira Embuganano y’omuzunguluko ya lusiku luguma, kabiri omu mwaka n’embuganano y’eneo ya siku esharhu. Gurhe rhunayunguka kw’ezola mbuganano?

Zinakomeza obuzigire bwerhu ku bene berhu na bali berhu. Nk’okw’Abaizraeli baliri basimira okuharamya Yehova “oku mbuganano zikulu,” ku nerhu rhunasimira okuharamya Mungu oku mbuganano za mene ezola. (Zaburi 26:12, amahugulo m’eshishi; 111:1) Ezola mbuganano zinarhurhabala rhubuganane n’abandi bahamirizi b’ebindi bibaga changwa b’ebindi bihugo. Kw’ezola mbuganano, omu kasanzi k’okuhumuka, rhunasima okusangira akalyo haguma, nantyo rhwanasimira bwenene okuba haguma na bene berhu na bali berhu. (Matendo 2:42) Kw’ezola mbuganano, rhunachibonera rhwenyine gurhe obuzigire bunaheba haguma “omulala goshi gwa bene berhu” omu gulu lyoshi.​—1 Petro 2:17.

Zinarhurhabala rhugenderere omu kiroho. Kandi abaizraeli baliri bayunguka kw’ezola mbuganano bulala baliri “bamenyerera emyazi” erhengerere omu mandiko babafasiriyaga. (Nehemia 8:8, 12) Nerhu rhunasima bwenene enyigirizo ze Biblia rhunayigirizwa oku mbuganano zerhu zikulu. Omwazi gukulu gwa buli mbuganano guba gurhengerere omu Biblia. Rhunayiga gurhe rhwakakola obulonza bwa Mungu, kugerera amajambo masimisize, enyigirizo z’ebigabi bikulikirene, n’ebyerekane. Rhunayunva rhuheberwe omurhima amango rhwamayunva bene berhu na bali berhu bali baganirira ebibazo bahimire oku bwimana; ebibazo bya mu zinola siku z’obuzinda. Oku mbuganano z’eneo kunagera amafilime m’engani ze Biblia, marhurhabala rhubone bwinja gurhe ebiderherwe omu Biblia byaliri na gurhe rhwakabikolesa omu kalamo kerhu. Na ku buli mbuganano nkulu abantu banabatizwa omu kuyerekana oku bachihanire emwa Mungu.

• Bichi birhuma embuganano zerhu zikulu maba mango m’obusime?

• Nyungu nchi wakapata oku mbuganano nkulu?