Kurhenga mira, Yehova ab’alonzeze abantu b’omulala bageze ebisanzi haguma, yi bakomeza obwira bwabo haguma na Yehova n’okugwarha obuguma bukomere omu mulala gwabo. (Kumbukumbu la Torati 6:6, 7) Chechirhuma buli mulala gw’Abahamirizi ba Yehova gujira ebisanzi by’okugeza haguma buli boso omu kuharamya Yehova. Mw’ebyola bisanzi, banaganira omu bulyo burhulerere oku bintu by’ekiroho bifarhene n’ebibazo byabo. Chiro akaba olamire wenyine, wakapanga akasanzi kali nk’akola k’okuyegera Mungu omu kuyiga omwazi gukusimisize.

Bili bisanzi by’okuyegera Yehova. Ebiblia ederhere ntya: “Muyegere Mungu, naye abayegera.” (Yakobo 4:8) Rhwakahikira okumenya Yehova bwinja, amango rhuli rhwayiga binene oku bilolere oborhere n’ebijiro byage omu mwazi gwage, Ebiblia. Obulyo buyorohere b’okurhondera Obuharamye omu mulala, kuli kusoma Ebiblia haguma oku mulenge gunene. Mwakakulikira eprograme ya buli boso ye Mbuganano Akasi n’Akalamo k’Omukristu. Buli muntu omu mulala akahabwa ah’asoma, n’oku bwindi, mweshi haguma mwanaganira oku bimwayigire omu mandiko.

Bili bisanzi by’okukomeza obuguma omu mulala. Omulume n’Omukazi, Abazere n’Abana, banakomeza obuguma bwabo omu kuyiga Ebiblia haguma omu mulala. Bikwanene kuba bisanzi by’obusime n’omurhula, ebi buli muntu akachifija buli boso. Abazere bakachishoga emyazi y’okuganirako efarhene n’eby’abana balagirire kulingana n’emyaka yabo. Bakakolesa emyazi y’Omunara g’Omulanzi changwa Amuka! changwa emyazi eli oku site yerhu y’enternete, jw.org. Mwakaganirira ebibazo abana babuganire oku masomo, n’okubarhabala bamenye gurhe bakalwisa mene ebyola bibazo. Mwakalola eprograme ya JW Télédiffusion (tv.pr418.com) n’okuyiganirako haguma. Mwakayiga enyimpo z’okuyimpa oku mbuganano, n’enyuma y’ahola, mwakalya changwa mwananywa haguma mumala obuharamye omu mulala.

Ebyola bisanzi by’akamaro muli mwageza haguma buli boso omu kuharamya Yehova byarhabala buli muntu asime kuyiga Omwazi gwa Mungu, na Yehova anagisha obushiru bwenyu.​—Zaburi 1:1-3.

• Chirhuma rhuchihebera h’ebisanzi by’okujira obuharamye omu mulala?

• Gurhe abazere bakajira yi buli muntu omu mulala ayunva ashagalukire ebyola bisanzi?