Buli Chumbi ly’Obwami ly’Abahamirizi ba Yehova liba lihekere ezino lichesibwa lya Mungu. Chechirhuma, rhunabona ok’okugenderera kujira Echumbi ly’Obwami ligenderere kuyorha lichere, lisimisize, n’omu bulyo bukwirire luli lukengo, chinali chigabi ch’akamaro bwenene ch’obuharamye bwerhu. Rhweshi rhwakarhabala mw’akola kasi.

Omu kuchihana kuchesa Echumbi ly’Obwami enyuma w’embuganano. Buli lusiku enyuma w’embuganano bene berhu na bali berhu banasima kuchesa Echumbi ly’Obwami. Liguma omu boso banakola obusafi bwinja bwenene. Omushamuka changwa omugwasi w’akasi anayimangira akola kasi, ahanene anakolesa eperu (liste) y’ebikwanene kukolwa. Nk’okubyakaba bihemerwe bene berhu na bali berhu banachihana omu kuhyagira (okubiza), okukoropa, okupanguza oluchuchu oku bichumbi, oku panga ebichumbi, okuchesa ewese n’okuhira mw’obufumu bw’okuyirha emikrobe, okushuka amadirisha n’ebiyo, okukabula changwa okudwika obuchafu, changwa okuhyagira n’okukwiza embuga y’Echumbi ly’Obwami. Akasi kazibuzibu k’okukwiza Echumbi ly’Obwami kanakolwa liguma omu mwaka. Rhwakayigiriza abana berhu okukenga aharhunaharamiza, omu kubaha nabo amakasi bakakola amango m’okuchesa Echumbi ly’Obwami.​—Muhubiri 5:1.

Omu kuchihana yi rhurhabala omu kasi k’okukwiza Echumbi ly’Obwami. Buli mwaka Echumbi ly’Obwami linalolerezwa embuga n’omundani, omu kulola akaba hali ahaharabikire. Okola kulolereza kunarhabala kugenderera kukwiza Echumbi ly’Obwami oku kahunda n’okulileka likwirire; n’echola chanarhabala okurha ponda efuranga. (2 Mambo ya Nyakati 24:13; 34:10) Echumbi ly’Obwami lichere linakwizizwe bwinja, hali hantu hakwanene h’okuharamizya Yehova. Amango rhwamarhabala omu kuchesa n’okukwiza Echumbi ly’Obwami, ahola rhwanayerekana oku rhusima Yehova n’oku rhukengere ahantu rhunamuharamizya. (Zaburi 122:1) Kandi, Echumbi ly’Obwami lichere linarhuma abandi basimiswa n’okuharamya Yehova.​—2 Wakorinto 6:3.

• Bulagurhe rhurhakwanene okusuzagura ahantu rhunaharamiza?

• Gurhe rhunajira y’Amachumbi gerhu g’Obwami gayorha gachere?