Ebiblia yalibere yaderha okw’enyuma y’olufu lwa Kristu, abalimu b’obubeshi bakarhengerere omu bakristu ba burhanzi, n’okuhabusa okuli kwe Biblia. (Matendo 20:29, 30) Intyo ku byanalibere enyuma wa siku zigeke. Abola balimu b’obubeshi bachanga enyigirizo za Yesu n’enyigirizo z’echipagani, n’Obukristu bw’obubeshi bwarhonderera ahola. (2 Timoteo 4:3, 4) Bichi birhuyemezeze oku ebirhumenyerere mu zinola siku oku biyekeze ebye Biblia eyigirize, bili by’okuli?

Ebisanzi bya Yehova byahika by’okufunula okuli. Yehova alilebere ok’omu ‘chihe ch’obuzinda obumenyi bw’okuli bwakabere bunene.’ (Danieli 12:4) Omu mwaka gwa 1870, Echigusho chigeke ch’abantu baliri balonza okuli, babona oku enyigirizo zinene z’amadini zirhahurene n’enyigirizo ze Biblia. Nantyo, barhondera okuyiga Ebiblia yi bamenya bwinja enyigirizo z’okuli ze Biblia, na Yehova abarhabala bamenyerera amandiko.

Abalume bimana bayiga Ebiblia bwenene. Abola banafunzi be Biblia b’obushiru, baliri bakolesa enjira z’okuyiga Ebiblia rhunakolesa kugera zene. Baliri bayiga omwazi oku gwindi. Amango byaliri byabakomerera okuyunva olwandiko lulebe lwe Biblia, baliri balonza amandi mandiko malufasiriye. N’eyi bakahikire oku bunvikane buhurene n’amandiko me Biblia, banabuyandika. Omu kuleka Ebiblia echifasiriye ntyo yonyine, ba vumbula okuli eju ye zino lya Mungu, Obwami bwage, obulonza bwage oku gulu n’oku bantu, oborhere bw’abafire n’obunihire b’obufuke. Okola kulonza okuli omu Biblia, kwabarhabala balekane n’enyigirizo n’emigenzo minene y’obubeshi.​—Yohana 8:31, 32.

Kugera omu mwaka gwa 1879, Abola banafunzi be Biblia babona oku ebisanzi byahikire by’okumenyesa abantu boshi enyigirizo z’okuli. Nantyo m’ogola mwaka barhondera oku chapisa egazeti Omunara g’Omulanzi Gumenyesa Obwami bwa Yehova; rhugenderere kuchapisa eyola gazeti kugera zene. Mu zinola siku, rhuli rhwayigiriza abantu okuli kwe Biblia omu bihugo 240, na mu ndimi zirhalwise 900. Nta mango obumenyi b’okuli bwachigerere kuyunjulirana nk’oku bili zene!

• Enyuma y’olufu lwa Kristu, gurhe byaliberere enyigirizo z’okuli ze Biblia?

• Gurhe okuli kwashubaga bonekana?