Kw’ezila foto zili mw’akala katabu, wabwene gurhe Abahamirizi ba Yehova banayambala bwinja eyi baja oku mbuganano zabo si? Bulagurhe rhuli Bahamirizi ba Yehova, rhuhangayikira okuntu rhunayambala n’okuchipamba?

Yi rhuyereka Mungu werhu obukenge. Omu bukweri Mungu arhalagirire okuntu rhushushire oku mubiri konyine. (1 Samweli 16:7) S’aliko, eyi rhwabuganana haguma yi rhumuharamya, rhunasima okuyereka Mungu obukenge n’aberhu bakristu. Rhurhole omufano, nka rhwamaja kubonana na mwami, rhunayambala n’okuchipamba omu bulyo bwakamukengesa bulala ali mukulu. Konakuguma, obulyo rhuyambere n’okuchipamba amango rhwamaja oku mbuganano, kunayerekana oku rhukengere Mungu Yehova, “Mwami w’esiku zoshi.” Kandi kunayerekana oku rhukengere ahantu rhunaharamiza Yehova.​—1 Timoteo 1:17.

Kuba kuyerekana oku rhukulikira amakanuni me Biblia omu kalamo kerhu. Ebiblia ehemere Abakristu bayambale “oku lugero n’obwenge bukwirire.” (1 Timoteo 2:9, 10) Okuyambala “oku lugero” kuli kuderha, okulekana n’emyambaro y’okuchiyerekana, eyakalerha enyifinjo zibi, changwa eyerekene ebirumbu biguma-biguma by’obwibisho by’omubiri. N’okugwarha “obwenge bukwirire” kunarhurhabala rhuchishoge emyambaro ekwirire, k’okuderha, emyambaro erharhalwise olugero. Chiro akaba okurhukulikira amola makanuni, buli muguma aherhe obuhuru b’okuchishoga emyambaro emusimisize. Chiro akaba ntacho rhwaderhere, okuntu rhuyambere n’okuchipamba omu bulyo bukwirire bunasimisize, kwa ‘kapamba enyigirizo z’Omuchunguzi werhu’ ‘n’okukuza Mungu.’ (Tito 2:10; 1 Petro 2:12) Nka rhuyambere bwinja amango m’okuja oku mbuganano, kwakarhuma abandi basimiswa n’okuharamya Yehova.

S’aliko orhayemeraga emyambalire yawe yakubuza kuyinja oku mbuganano, oku Chumbi ly’Obwami. Rhwakayambala emyambaro ekwanene, echere, enasimisize, chiro akaba oku erhali y’ebeyi linene changwa y’ehali z’enyanya.

• Bula gurhe bili by’akamaro oku yambala bwinja amango rhuli rhwaharamya Mungu?

• Makanuni mahe rhunakulikira eyi rhwachishoga emyambaro yerhu n’okuntu rhwachipamba?