ESOMO 2
Mungu ye Nde?
1. Bici birhumire rhukwanene kuharamya Mungu?
Mungu w’okuli ye walemaga ebintu byoshi. Arhajira Omwanzo n’Obuzinda. (Zaburi 90:2) Emyazi eli omu Biblia erhengere emwage. (1 Timoteyo 1:11) Kwabulala ye warhuhaga akalamo, rhukwanene kumuharamya (kumuramya) yenyine.—Soma Ufunuo 4:11.
2. Gurhe Mungu ashushire?
Nta muntu wabwene Mungu kwabulala Mungu ali muka, kuli kuderha oku omubiri gwage gurhashushire na higeke n’emibiri y’ebindi bilemwa bilamire hano oku igulu. (Yohana 1:18; 4:24) Naciro bili intyo aliko, rhwakabona engeso za Mungu kugerera ebintu alemaga. Omufano, eyi rhubona emburho n’obwaso bwa ngasi buko rhwanayiga oku Mungu ajira obuzigire n’obwenge. Eyi rhubona gurhe omu canya hali hanene bwenene rhwanabona oku Mungu ajira emisi minene.—Soma Waroma 1:20.
Kandi eyi rhusoma Ebiblia rhwakayiga ebintu binene oku ngeso za Mungu. Omufano, Ebiblia erhubwira ebintu Mungu asima n’ebyanagaya, ebyanakolera abantu n’okwanajirira abantu omu bintu birhali biguma.—Soma Zaburi 103:7-10.
3. Ezino lya Mungu ye Nde?
Yesu aderhere intya: “Darha oli embingu, leka ezino lyawe liceswe.” (Matayo 6:9) Naciro Mungu agwerhe mazino manene g’obukulu n’agobukenge, anagwerhe ezino lyage liguma. Elyo zino linaderhwa omu njira zirhali ziguma omu ngasi lulimi. Omu Chihavu linaderhwa “Yehova.”—Soma Zaburi 83:18.
Omu Biblia zinene , ezino lya Mungu lyakulirwemo bahebamo amazino g’obukulu nka Mwami cangwa Mungu. Aliko amango Ebiblia yayandikwaga, ezino lya Mungu lyalirimo kali 7000. Yesu alimenyeseze abantu ezino lya Mungu amango abayigirizaga ebiyerekere Mungu.—Soma Yohana 17:26.
4. Yehova anarhuhangayikira si?
Kuguma n’omuzere orhusima, Mungu arhukolera ebintu byarhujirira akamaro esiku zoshi
Okubona abantu banene bali bababala si, biderhere oku Mungu arharhuhangayikira? Hali banene banaderha mpw’analeka rhubabale y’arhugerageza.—Soma Yakobo 1:13.
Mungu arhuhere ekado y’okucishoga ebirhulonzeze. Rhurhasimiswa si n’okucishoga kukolera Mungu? (Yosuwa 24:15) Aliko abantu banene banacishoga kukolera abandi ebintu bibi cecirhumire amalibuko maba manene. Binababaza Yehova kubona ebyo bibi.—Soma Mwanzo 6:5, 6.
Yehova ali Mungu orhuhangayikira. Alonzeze rhucisimire akalamo. Ali hofi kukulaho amateso n’abanamalerha. Aliko agwerhe empanvu zarhumaga aleka amateso magenderere kugeza amango amakuliraho. Ecicira ca 8, njirhwayiga eyo mpanvu.—Soma 2 Petro 2:9; 3:7, 13.
5. Gurhe rhwakayegera Mungu?
Yehova arhurhumirira kumuyegera kugerera esala. Asima ngasi yeshi. (Zaburi 65:2; 145:18) Aba alonzeze kurhubabalira. Ayinji emisi rhunakolesa mpu rhumusimise neri liguma na liguma binarhugamba. Naciro rhurhali batakatifu kuguma na Mungu, aliko rhwakaba bira bage.—Soma Zaburi 103:12-14; Yakobo 4:8.
Kwabulala Yehova arhuhere akalamo, rhukwanene kumusima kulusha abandi boshi. (Marko 12:30) Oku wagenderera kuyerekana ok’osima Mungu wayiga ebimuyerekere n’okukola eby’alonzeze, nji waba mwira wage.—Soma 1 Timoteyo 2:4; 1 Yohana 5:3.
