Omu ngasi dini muba abantu bagwerhe emirhima minja. Cecirhumire kumenya oku Mungu ababona n’okubahangayikira guli mwazi mwinja. Aliko bigayisize kubona gurhe edini lili lyarhebeka abantu kujira ebintu bibi bwenene. (2 Wakorinto 4:3, 4; 11:13-15) Hali emyazi eyerekene gurhe amadini mayirha abantu, kukola ejenoside, kuja omu ntambala cangwa kujira obubaraga n’abana. Ebi bibabaza abantu basima Mungu!​—Soma Matayo 24:3-5, 11, 12.

Edini ly’okuli likuza Mungu aliko edini ly’obubeshi limugayisa. Edini ly’obubeshi liyigiriza enyigirizo zirhali omu Biblia, omufano nk’enyigirizo z’obubeshi okubiyerekere Mungu n’abantu bafire. Aliko Yehova alonzeze abantu bamenye okuli oku bimuyerekere.​—Soma Ezekieli 18:4; 1 Timoteyo 2:3-5.

Ecisimisize, Mungu arhabeshwa n’amadini maderha oku mamusima aliko omu kuli masima egulu lirhegekwa na Shetani. (Yakobo 4:4) Omwazi gwa Mungu guyirika amadini moshi m’obubeshi “Babiloni Mukulu.” Babiloni yaliri vile ya mira yarhangizaga edini ly’obubeshi enyuma y’emvula nene yarhogaga omu siku za Nowa. Hano hofi Mungu alimbula amadini moshi mabehya n’okutesa abantu.​—Soma Ufunuo 17:1, 2, 5, 16, 17; 18:8.

Hali ogundi mwazi mwinja. Yehova arhayibirira bala bantu boshi bali omu madini m’obubeshi bagwerhe emirhima minja omu igulu lyoshi. Buno Yehova ali abaheba haguma yibayigirizwa okuli.​—Soma Mika 4:2, 5.

Yehova ahangayikira abantu boshi basima ebintu binja binali by’okuli. Ali ahuna abo bantu balekane n’amo madini m’obubeshi. Abantu basima Mungu barhalegama okuhindamuka yi bamusimisa.​—Soma Ufunuo 18:4.

Amango entumwa zihubiri, abantu bagwerhe emirhima ekwirire basimire eyo myazi minja. Abo bantu bayigire kulama buhyahya, bajira akalamo kashagalukire, kandi kanahana n’obunihire. Abo bantu barhulekere omufano mwinja bulala bacimaliyemera omwazi mwinja bahebere Yehova embere omu kalamo kabo.​—Soma 1 Watesalonike 1:8, 9; 2:13.

Eyi abantu balekana n’amadini m’obubeshi, Yehova abakaribisa omu mulala gw’abantu bage bamushenga. Okayemera oko kulalika, waba mwira wa Mugu, obone omulala gw’abira benja basimana banasima Mungu, haguma n’akalamo k’esiku zoshi.​—Soma Marko 10:29, 30; 2 Wakorinto 6:17, 18.

Okulimbuka kw’edini ly’obubeshi guli mwazi mwinja. Ebi nji byafumya abantu amateso. Edini lyobubeshi lirhakashuba kurhebeka n’okucamo abantu ebicira. Abantu boshi nji baheba haguma omu kuharamya Mungu w’okuli.​—Soma Ufunuo 18:20, 21; 21:3, 4.