1. Bulagurhe bihemere okumenya bamalayika bali bande?

YEHOVA asimire rhumenye omulala gwage. Bamalayika bali m’ogola omulala; (olole amahugulo ma 8, bukurasa bwa 210). Ebiblia ebayirika “bana ba Mungu.” (Yobu 38:7) Bichi Bamalayika banakola? Gurhe balirhabere abantu omu siku zamira? Bakachirhurhabala mu zinola siku si?

2. a) Inde walemaga bamalayika? b) Haba bamalayika banga?

² Bihemere rhurhange rhumenye oku bamalayika balemwaga na Yehova. Yehova arhangaga lema Yesu, enyuma y’ahola nk’oku olwandiko lwa Wakolosai 1:16 luderhere, “ebindi bintu byoshi byalemwa omu mbingu n’oku gulu.” Ebiblia ederhere oku hali amagana n’amagana m’emiliyoni ya bamalayika.​—Zaburi 103:20; Ufunuo 5:11.

3. Bichi olwandiko lwa Yobu 38:4-7, lurhuyigirize kuyerekera bamalayika?

³ Ebiblia eshubire kurhuyigiriza oku Yehova arhangaga kulema bamalayika embere y’okulema egulu. Gurhe balichiyunvirhe omu kubona egulu? Echitabu cha Yubu chiderhere oku baliherhe obusime bunene. Amola mango, baliri mulala guherhe obuguma, banakazaga kolera Yehova boshi haguma.​—Yobu 38:4-7.

4. Gurhe rhumenyere oku bamalayika banahangayikira abantu?

⁴ Bamalayika baba basimisizwe n’abantu, n’omuhigo gwa Yehova eju y’egulu n’abantu. (Mezali 8:30, 31; 1 Petro 1:11, 12) Amango Adamu na Eva babula kukenga, bamalayika bagaya bwenene. Na mu zinola siku, eyi  babona bantu banene babula kukenga Yehova, banayunva bagayire bwenene. S’aliko, nk’omuntu amayunva ababere eju y’ebyaha byage, n’okuhindamula engeso zage y’agalukira Yehova, bamalayika banasima bwenene. (Luka 15:10) Banayunva bahangayikire bwenene abantu bakolera Mungu. Yehova anabakolesa omu kurhabala n’omu kulanga abakozi bage bali oku gulu. (Waebrania 1:7, 14) Rhulole emifano.

5. Gurhe bamalayika balirhabere abakozi ba Mungu?

 ⁵ Embere y’okuharabisa evile ye Sodoma n’eye Gomora, Yehova arhuma bamalayika 2 baje kuchungula Loti n’omulala gwage. (Mwanzo 19:15, 16) Enyuma y’amagana m’emyaka, omulebi Daniyeli akabulwa omu lukunda lwa banyalukala. Aliko, arhakoromekaga chiro n’ehityu bulala “Mungu alirhumire malayika wage afunga obunu bwa banyalukala.” (Danieli 6:22) Enyuma y’ahola, amango entumwa Petro yaliri omu mpamiko, Yehova arhuma malayika muguma amuchungule. (Matendo 12:6-11) Bamalayika balirhabere Yesu naye amango aliri oku gulu. Omufano, enyuma y’obubatizo bwage, bamalayika bamurhabala. (Marko 1:13) N’embere y’olufu lwage, malayika muguma amuheba emisi.​—Luka 22:43.

6. a) Gurhe rhumenyere oku zene bamalayika banarhabala abakozi ba Mungu? b) Bibazo bihe rhwashubizako?

⁶ Zene, abantu barhachibona ku bamalayika. Aliko, Mungu anachibakolesa omu kurhabala abakozi bage. Ebiblia ederhere oku “Malayika wa Yehova anabera ahamwa balala boshi bamuyubaha, n’okubachungula.” (Zaburi 34:7) Bulagurhe rhukenere okulangwa? Kwabulala rhuherhe abashombanyi baherhe emisi, banalonzeze kurhujira kubi. Bali bande? Ngahe barhengerere? Njira zihe banakolesa omu kulonza okurhujira kubi? Y’ebila bibazo bibona ebishubizo, rhurhange rhulole ebyabaga siku zigeke enyuma y’okulemwa kwa Adamu na Eva.

7. Bulagurhe Shetani ali ashumika abantu?

⁷ Omu sura ya 3, rhwaliyigire oku malayika muguma abulaga kukenga Mungu. Alilonzeze kurhegeka abandi. Ebiblia emuyirikire Shetani Ibilisi. (Ufunuo 12:9) Analilonzeze abantu boshi barhakengaga Mungu. Eva  y’arhangaga kushumika, n’enyuma y’ahola, aj’ashumika abandi bantu banene. Aliko abandi bantu nka Abeli, Enoko na Nowa; bowe baliyorhere bimana embere za Mungu.​—Waebrania 11:4, 5, 7.

8. a) Gurhe bamalayika baguma bahindamukaga bazimu? b) Bichi abazimu balijirire yi bafuma Envula y’echihonzi?

⁸ Amango ma Nowa, bamalayika baguma balichijirire bigamba. Barhenga embingu, yibayinja kulama nka bantu oku gulu. Bulagurhe? Ebiblia ederhere oku balisimire bagwarhe abakazi. (Osome Mwanzo 6:2.) S’aliko, kwaliri kubi bwenene ku bamalayika okujira ntyo. (Yuda 6) Kuguma n’abola bamalayika babi, bantu banene mw’amola mango balichishogere okujira amabi, banaba babandi. Nantyo, Yehova abona oku abaharabise, omu kuhubya egulu n’envula y’echihonzi. S’aliko, achungula abakozi bage bimana. (Mwanzo 7:17, 23) Yi bagenderera kulama, abola bamalayika babi bagaluka embingu. Ebiblia ebayirikire bazimu. Bachishoga okubera omu bugamba bwa Shetani, anaba mukulu wabo.​—Matayo 9:34.

9. a) Gurhe byaliberere abazimu amango bagaluka embingu? b) Bichi rhwaganirira omu chifungo chikulikireho?

⁹ Bulala abazimu barhalikengere, Yehova arhachiyemeraga oku bagaluke omu mulala gwage. (2 Petro 2:4) Barhakachirhola omubiri g’omuntu, s’aliko banali bagendera “kuhabula [kushumika] egulu lyoshi lilamirweko.” (Ufunuo 12:9; 1 Yohana 5:19) Rhulole gurhe banajira yi bashumika abantu banene.​—Osome 2 Wakorinto 2:11.

10. Gurhe abazimu banashumika abantu?

¹⁰ Abazimu banakolesa njira zinene omu kushumika bantu banene. Abantu banaganira n’abazimu, banajira ntyo bonyine changwa kugerera abandi bantu. Omufano,  kugerera omulozi changwa omushake. Okuganira n’abazimu kuyirikwa bushake, (olole amahugulo ma 26, bukurasa bwa 221). Ebiblia erhubwirire oku rhukwanene kuchilanga na ngasi hyoshi hilolere abazimu. (Wagalatia 5:19-21) Bulagurhe? Bulala, nka kulala omuhizi anakolesa omurhego y’afarha enyama, abazimu nabo banakolesa njira zinene yi bafarha bantu banene n’okubaheba oku lunda lwabo.

11. a) Obulaguzi che chichi? b) Bulagurhe bihemere okulekana n’obulaguzi?

¹¹ Omufano, abazimu banakolesa obulaguzi yi bashumika abantu. Obulaguzi, kuli kulagula ebyayinja changwa ebirhamenyikene, kugerera emisi eli enyanya y’obuhashe b’omuntu (misi y’amashetani). Bantu baguma banahiga bamenye ebyayinja kugerera efoto, ebilorho, omukebo changwa esupa, omu kusoma enyenyezi changwa omu kusoma emisitari eli omu chigasha ch’efune. Bantu banene banawaza oku ebyola byoshi birhaherhe bubi, s’aliko bubeshi! Kuli kubi bwenene. Ebiblia eyerekene oku abazimu n’abalaguzi banakolera haguma. Olwandiko lwa Matendo 16:16-18 luganirire eju y’omwana w’obunyere wakazaga kulagula ebyayinja kugerera emisi “y’omuzimu w’obulaguzi.” Amango Paulo alibirha koyola muzimu, aheza eyola misi.

12. a) Bulagurhe kulikubi bwenene okuhiga kuganira n’abafire? b) Bulagurhe abakozi ba Mungu barhakwanene okuja ahabalibajira emigezo elolere obushake?

¹² Abazimu banashuba higa barhushumike, omu kulonza okurhuyemeza oku byakagalikana okuganira n’abafire. Banalonza barhuyemeze oku abafire banagenderera okulama ahandi hantu, n’oku bakaganira nerhu, bakana rhurhabala changwa barhujire kubi. Omufano, enyuma y’okufisa omwira changwa omuntu w’omulala gwabo, bantu baguma banaja kulonza omuntu oherhe obuhashe  b’okuganira n’abafire, nk’omushake changwa omulozi. Nkabaga anaba ababwira binene by’okuli kuyerekera owafire n’okuyiganya omulenge gwage. (1 Samweli 28:3-19) Oku bunene, migenzo minene ejirikana oku bafire, eba elonzeze kuyerekana oku abafire bagenderere kulama ahandi hantu enyuma y’okufa (omufano: emigenzo y’olusiku l’okuhamba, esiku zikulu z’okuyibuka abafire, kurherekerera abafire, emigenzo y’okushumbakala changwa okulala bayiriziza oku chiliyo). Amango abakristu bamalahira okujira eyola migenzo, emilala yabo changwa abantu b’olugo (evilage) lwabo banaderha kubi kubayerekera, banabadukanga changwa kubalekerera. S’aliko, abakristu baba bamenyere oku abafire barhachigenderera kulama ahandi hantu. Birhakagalikana okuganira nabo, barhakanarhujira kubi changwa okurhurhabala. (Zaburi 115:17) Ochilange bwenene! Nt’amango nj’ohigage waganira n’abafire changwa n’abazimu, na nt’amango nj’ojage ahabalibajira emigenzo elolere obushake.​—Osome Kumbukumbu la Torati 18:10, 11; Isaya 8:19.

13. Abantu bakazaga kuyubaha abazimu, bichi bagalire kujira?

¹³ Abazimu banashumika abantu, s’aliko okubunene, banabayubahisa bwenene. Zene, Shetani n’abazimu bamenyere oku “basigeze bisanzi bigeke bwenene” bulala hanola hofi, Mungu abachibira hale kurhenga kunola gulu. (Ufunuo 12:12, 17) K’okuderha oku balibakola ebibi bwenene kulusha oku byaliri embere. S’aliko, hali emiliyoni y’abantu yakazaga kuyubaha abazimu, erhachibayubaha mu zinola siku. Gurhe bachikulire m’obola buba?

14. Kuguma n’abakristu baguma be Efeso, gurhe rhwakajira yi rhuhima abazimu?

¹⁴ Ebiblia erhubwirire gurhe rhwakahima abazimu na gurhe rhwakachikula omu buja bwabo. Omufano, bantu  baguma omu balilamire omu vile ye Efeso bakazaga ganira n’abazimu embere y’okuba bakristu. Gurhe bachikulaga omu buja bw’abola bazimu? Ebiblia ederhere oku banene “omu bakazaga kukola ebijiro by’obukurungu bagusha ebitabu byabo, banabidwika embere y’abantu boshi.” (Matendo 19:19) Badwikaga ebitabu byabo by’obukurungu, bulala balisimire okuba bakristu. Bihemere rhujire ntyo zene. Buli yeshi walonza okukolera Yehova, akwanene okulekana na byoshi bilolere abazimu. Ebyola byakaba bitabu, ebimenyesa emyazi eyandikirwe, masupa changwa mikebo, mafilime, nyimpo, masharha changwa mafoto. Oku bugeke, ebijiro by’obukurungu, obulozi, abazimu changwa okuheera; bibonekana oku birhaherhe chibazo changwa oku bili byakuchisimisa konyine. Kandi, byakaba bintu omuntu akaba achishwekereko omu kuchilanga n’obubi.​—1 Wakorinto 10:21.

15. Bichi rhwakashuba kujira yi rhuhima Shetani n’abazimu?

¹⁵ Myaka migeke abakristu be Efeso bamalire kudwika ebitabu byabo by’obukurungu, entumwa Paulo yababwira oku bakagenderere okulwisa “emisi y’amaroho mabi.” (Waefeso 6:13) Chiro akaba oku balidwikire ebitabu byabo, abazimu baligenderere kulonza kubajira kubi. Aliko si, bichi balihemerwe bajire oku bunene? Paulo ababwira ntya: “Murhole empenzi nene y’obwemere, eyi mwakakolesa omu kuzimya emyambi ekolerere y’omubi.” (Waefeso 6:16) Empenzi y’omusoda, emulanga nk’ali omu ntambala. Konakuguma nerhu, obwemere bwerhu bwakarhulanga. Nka rhuyemerere oku Yehova akarhulanga, rhwakahima Shetani n’abazimu.​—Matayo 17:20.

16. Gurhe rhwakajira y’obunihire bwerhu mu Yehova bugwarha misi minene?

¹⁶ Gurhe rhwakajira y’obwemere bwerhu emwa Yehova bugwarha misi minene? Rhukwanene okusoma Ebiblia  buli lusiku. Rhunakwanene okuyiga kunihira Mungu n’okuyemera oku arhulanga. Nka rhugwerhe obunihire mu Yehova, ntako Shetani n’abazimu bakarhujira.​—1 Yohana 5:5.

17. Bichi bindi rhukwanene kujira yi rhulangwa oku bazimu?

¹⁷ Hali echindi chintu abakristu be Efeso balikwanene bajire. Okubona oku balilamire omu vile eyunjulirene obushake, Paulo ababwira ntya: “Musalire buli kasanzi.” (Waefeso 6:18) Balikwanene okuhema Yehova abalange buli kasanzi. Na nerhu, rhulamire omu gulu liyunjulirene obushake. K’okuderha oku nerhu rhukwanene okuhema Yehova arhulange, n’amango rhwamasalira, rhwanakolesa ezino lyage. (Osome Mezali 18:10.) Rhukagenderera okuhema Yehova arhukule omu buja bwa Shetani, arhakabula kushubiza amahuno merhu.​—Zaburi 145:19; Matayo 6:13.

18, 19. a) Gurhe rhwakahima omu ntambala rhulirhwalwa na Shetani n’abazimu? b) Chibazo chihe nji rhwashubiza omu sura ekulikireho?

¹⁸ Rhukachikula ku bulichoshi chilolere obushake rhukananihira oku Mungu arhulanga, rhwanagala kuhima Shetani n’abazimu. Rhurhakwanene okubayubaha. (Osome Yakobo 4:7, 8.) Yehova yeherhe misi minene bwenene kulusha abazimu. Alibahanire omu mango ma Nowa, n’omu siku zayinja, abachibira hale. (Yuda 6) Orhayibagiraga oku rhurhali rhwalwisa Shetani n’abazimu rhwenyine. Yehova ali akolesa bamalayika bage omu kurhulanga. (2 Wafalme 6:15-17) Rhwakayemera ok’oku burhabale bwa Yehova, rhwahima eyola ntambala.​—1 Petro 5:6, 7; 2 Petro 2:9.

¹⁹ Kwabulala Shetani n’abazimu bali balerha malibuko manene oku gulu, bulagurhe Mungu arhaza baniga? Nji rhwashubiza echola chibazo omu sura ekulikireho.