1. Mungu aherhe muhigo guhe eju y’abantu?

MUNGU aherhe omuhigo gwinja eju ya bantu; (olole amahugulo ma 6, bukurasa bwa 208). Alemaga omulume n’omukazi barhanzi, Adamu na Eva, yi balama omu bustani nyinja. Alisimire baburhe abana, bahindamule egulu libe paradizo, banarhegeke enyama.​—Mwanzo 1:28; 2:8, 9, 15.

2. a) Gurhe rhumenyere oku Yehova nj’ayeneza byoshi alaganyize? b) Nk’oku Ebiblia ederhere, bande nji balama oku gulu esiku n’amango?

² Owazize oku hali olusiku nji walama omu paradizo si? Yehova aderhere ntya: “Nabiderhere [. . .], nji nanabikola.” (Isaya 46:9-11; 55:11) Akola byoshi alaganyize, na ntacho chakamubuza. Arhubwirire okw’arhalemaga egulu “oku busha.” (Isaya 45:18) Alisimire lilamweko. Na bande? Na ku myaka enga? Ebiblia eshubize ntya: “Ab’okunali [abakenga Mungu] nji bashokola egulu, nji banalilamako esiku n’amango.”​—Zaburi 37:29; Ufunuo 21:3, 4.

3. Eyi rhwabona abantu bali balwala n’okufa, chibazo chihe rhwakachibaza?

³ Zene, rhulirhwabona abantu bali balwala n’okufa. Omu bihugo binene, muli entambala, abantu yi bananigana bonyine oku bonyine. S’aliko arhali ku Mungu alisimire. Aliko si, gurhe byabere? Ebiblia yonyine ye yakabiderha.

4, 5. a) Inde wakolesaga enjoka omu kuganira na Eva? b) Gurhe omuntu mwinja akahindamuka n’okuba mwizi?

⁴ Ebiblia ederhere oku Mungu aherhe omushombanyi. Aba malayika oyirikwa “Ibilisi” kandi “Shetani”; (olole amahugulo ma 7, bukurasa bwa 208). Shetani alikoleseze enjoka y’aganira na Eva omu bustani y’Edeni. (Ufunuo 12:9; Mwanzo 3:1) Amuyemeza oku njoka y’eli yaderha.

⁵ Inde walemaga Shetani Ibilisi? Mungu si? Nanga! Amango Mungu aliri arheganya egulu yi Adamu na Eva balamako, haliri bamalayika banene omu mbingu; (olole amahugulo ma 8, bukurasa bwa 210). Muguma mw’abola bamalayika ahindamuka aba Ibilisi. (Yobu 38:4, 7) Gurhe byagalikanaga? Rhurhole omufano: Gurhe omuntu mwinja akahindamuka n’okuba mwizi? Kurheng’aburhwa arhaliri mwizi. S’aliko lusiku luguma, anarhondera kuchifija echintu chirhali chage. Anagenderera kuchiwazako, nantyo enyifinjo zage zibi zanaba eyi zikola ziherhe misi minene. Ahandi, nk’amabona gurhe akazimba echola chintu, anachizimba. Anahindamuka, anaba mwizi.​—Osome Yakobo 1:13-15.

6. Gurhe malayika muguma ahindamukaga mushombanyi wa Mungu?

⁶ Byebyaberaga oyola malayika. Amango Yehova amalaga lema Adamu na Eva, ababwira baburhe abana “banayunjuze egulu.” (Mwanzo 1:27, 28) Nkabaga oyola malayika awaza ntya: “Ahali abala bantu boshi baharamye Yehova, nyono nyi bakaharamize!” Okw’ali awaza ntyo, kw’anali achifija ebya Yehova. Alisimire abantu bamuharamye. Nantyo, arhebeka Eva anamushumika.  (Osome Mwanzo 3:1-5.) Intyo kw’ahindamukaga kuba Shetani Ibilisi, mushombanyi wa Mungu.

7. a) Bichi byarhumaga Adamu na Eva bafa? b) Bulagurhe rhunashaja n’okufa?

⁷ Adamu na Eva barhakengaga Mungu, balya elehe. (Mwanzo 2:17; 3:6) Bagoseza Yehova; (olole amahugulo ma 9, bukurasa bwa 210). Baluha bafa nk’oku Yehova anaderhaga. (Mwanzo 3:17-19) Kwa bulala abana ba Adamu na Eva baliri banyabyaha, nabo bafire. (Osome Waroma 5:12.) Yi rhugala kuyemera gurhe abana ba Adamu na Eva baliri banyabyaha, rhurhole omufano; nk’oli wabumba amatofali, n’eforomo oli wabumbisa erhendamire, amatofali marhenga mw’eyola foromo namo maba marhendamire. Amango Adamu abulaga kukenga Yehova, aba munyabyaha. Kwa bulala Adamu ye shokuliza werhu, rhuli banyabyaha rhweshi. Rhuherhe obola “bufe” kuguma naye. N’okuba rhweshi rhuli banyabyaha, chechirhuma rhunashaja n’okufa.​—Waroma 3:23.

8, 9. a) Bichi Shetani alilonzeze ayemeze Adamu na Eva? b) Yehova arhayirhaga ebyola bigamba han’ahola. Bulagurhe?

⁸ Shetani arhonderesaga obugamba eju ya Yehova, omu kurhuma Adamu na Eva barhachi mukenga. Alilonzeze abayemeze oku Yehova alibeshere, ali murhegesi mubi, arhanali balonzeze ebinja. Shetani ayemeza okw’abantu barhakenere Mungu ababwire ebibakakola. Ashuba kuderha oku Adamu na Eva balikwanene kuchishoga bonyine echinja n’echibi. Gurhe Yehova akajir’ajira? Akayirhire ebyola bigamba y’obugamba buhwa. Aliko si, okola kwakayerekene oku Shetani ali mubeshi? Nanga!

⁹ Yehova arhayirhaga ebyola bigamba han’ahola. Alilekere abantu ebichanji bachirhegeke bonyine. Ebyola  byakarhabere bibonekane oku Yehova amenyere ebyakalerhera abantu obusime n’oku Shetani ali mubeshi. Esura ye 11, yabiganirira oku bunene. Aliko si, bichi owazize oku bi Adamu na Eva bachishogaga? Balijirire bwinja okuyemera shetani n’okurhakenga Yehova si? Yehova alibahere buli choshi: akalamo kashinganene, ahantu h’okulama hakwirire n’akasi kenja. Mw’ebyola  byoshi, ntacho Shetani alibahere. Gurhe wakajirire nk’aliri woyo?

10. Inde rhukwanene kuchishoga rhweshi?

¹⁰ Zene, rhunachishoga eby’okujira kuguma na Adamu na Eva. Okola kuchishoga kwerhu, kwakarhulerhera olufu changwa akalamo. Rhukwanene okuchishoga Yehova nka Murhegesi n’okuyerekana oku Shetani ali mubeshi. Changwa rhwakachishoga Shetani nka murhegesi werhu. (Zaburi 73:28; osome Mezali 27:11.) Bantu bageke bwenene bakengere Mungu. N’okola, Mungu arhali murhegesi wa linola gulu. Akaba arhali Mungu, inde windi?

11, 12. a) Bichi Shetani alilaganyize Yesu? Bichi birhuyigirize? b) Mandiko mahe mayerekene oku Shetani ye murhegesi w’egulu?

¹¹ Yesu alimenyere inde murhegesi w’egulu. Mango maguma, Shetani “amuyereka amami moshi m’egulu n’obukuze bwamo.” Amulaganya ntya: “Naguha ebila bintu byoshi, okafukama, n’okujira chijiro chiguma ch’okumparamya.” (Matayo 4:8, 9; Luka 4:5, 6) Nk’amola mami marhaliri mage, akalaganyize Yesu okw’amuhamo si? Nanga. K’okuderha oku amarhegesi moshi mali ma Shetani.

¹² Nkabaga oli wachibwira ntya: “Shetani arhakaba murhegesi w’egulu! Yehova, Mungu Ogala Byoshi, yewalemaga ebintu byoshi!” (Ufunuo 4:11) Biyunvikene, Yehova ye Mulemi. Aliko Yesu arhalibishire, aliyirikire Shetani “murhegesi w’egulu.” (Yohana 12:31; 14:30; 16:11) Entumwa Paulo yaliyirikire Shetani “mungu wa binola bihe by’esiku.” (2 Wakorinto 4:3, 4) N’entumwa Yohana yayandikaga oku “egulu lyoshi lili omu burhegesi b’omubi.”​—1 Yohana 5:19.

13. Bulagurhe rhukenere egulu lihyahya?

¹³ Egulu lili lyagenderera okubiha. Ngasi hoshi hali amavita, oku bonererana, ebituliyo n’obulyalya. Abantu bali bachihangana okumala ebibazo, aliko barhali bagala. Hanola hofi, oku vita liyirikwa Armagedoni, Mungu ayinja kuharabisa linola gulu libi, ahandi analerha egulu lihyahya, linali ly’okunali.​—Ufunuo 16:14, 16; olole amahugulo me 10, bukurasa bwa 210.

14. a) Inde Yehova achishogere abe Mwami w’Obwami bwage? b) Bichi Ebiblia yalibere yaderha eju ya Yesu?

¹⁴ Yehova achishogere Yesu abe Mwami w’Obwami bwage, k’okuderha oburhegesi bwage bw’embingu; (olole amahugulo me 11, bukurasa bwa 211). Hamagera myaka minene bwenene, Ebiblia emenyeseze oku Yesu yewakabere “Murhwali w’omurhula” n’ok’obola burhegesi nji bwarhegeka emyaka n’emyaka. (Isaya 9:6, 7) Yesu aliyigirize abanafunzi bage basalire ntya eju y’obola burhegesi: “Obwami bwawe buyinje. Obulonza bwawe bujirike oku gulu kuguma n’omu mbingu.” (Matayo 6:10) N’oku nji rhwabona omu sura ya 8, Obwami bwa Mungu nji bwarhegeka ahali h’Amarhegesi m’abantu. (Osome Danieli 2:44.) Nantyo, nji bwanahindamula egulu lyanaba paradizo.

15. “Egulu lihyahya” k’okuderha gurhe?

¹⁵ Ebiblia elaganyize ntya: “Rhuli rhwalindira embingu mpyahya n’egulu lihyahya, n’omola nji mwaba okunali.” (2 Petro 3:13; Isaya 65:17) Hali oku Ebiblia enaderha echinwa “gulu,” ey’eli yaderha abantu balamire oku gulu. (Mwanzo 11:1) Chechirhumire “egulu lihyahya”  ly’okunali, bali bantu boshi bakengere Mungu banagishirwe naye.

16. a) Luhembo luhe lwinja Mungu nj’aha balala nji balama omu gulu lihyahya? b) Bichi wakajira y’obona k’olola luhembo?

¹⁶ Yesu alaganyaga okw’abantu bakalamire omu gulu lihyahya, bakapatire “akalamo k’esiku n’amango.” (Marko 10:30) Bichi rhwakajira yirhubona k’olola luhembo? Y’obimenya, osome Yohana 3:16; 17:3. Rhulole bichi Ebiblia ederhere eju y’akalamo omu Paradizo kunola gulu.

17, 18. Gurhe omenyere ok’oku gulu nji kwaba omurhula n’abantu nji babegera?

¹⁷ Harhakachiba obubi, amavita, obunizi, n’akabonerero. Nta muntu n’omuguma mubi nji wachiba oku gulu. (Zaburi 37:10, 11) Mungu “nj’amala amavita.” (Zaburi 46:9; Isaya 2:4) Abasima Yehova n’abamukenga, bonyine banji bayunjula egulu. Nji haba omurhula esiku zoshi.​—Zaburi 72:7.

¹⁸ Abantu nji babegera. Amango Abaizraeli baliri bakenga Mungu, Mungu akazaga balanga, banalama omu kubegera. (Walawi 25:18, 19) Ntaye na ntacho rhwechiyubahe omu Paradizo. Nji rhwabegera esiku zoshi.​—Osome Isaya 32:18; Mika 4:4.

19. Bichi birhuyemezeze oku nji haba ebilyo binene?

¹⁹ Nji haba ebilyo binene. “Nji haba embeke-beke zinene oku gulu “n’enyanya w’emisozi [entondo].” (Zaburi 72:16) Yehova, “Mungu werhu, nj’arhugisha” n’egulu nji lyayera.—Zaburi 67:6.

20. Bichi biyerekene okw’egulu nji lyaba paradizo?

²⁰ Egulu lyoshi, nji lyaba paradizo. Abantu nji bagwarha enju zikwirire n’ebustani zinja. (Osome Isaya 65:21-24; Ufunuo 11:18.) Egulu lyoshi nji lyakwira kuguma n’ebustani y’Edeni. Yehova nj’arhuha buli  choshi rhukenere. Ebiblia ederhere ntya eju yage: “Ofundwire efune yawe n’okuyugusya [okumala bwinjabwinja] enyifijo z’ebilemwa byoshi bilamire.”​—Zaburi 145:16.

21. Bichi biyerekene oku nji haba omurhula ahakagarhi k’abantu n’enyama?

²¹ Nji haba omurhula ahakagarhi k’abantu n’enyama. Enyama zirhakachijira abantu kubi. Abana badorho nji bayegera enyama zikalihire mu zinola siku, buzira buba.​—Osome Isaya 11:6-9; 65:25.

22. Bichi Yesu nj’ajirira abalwala?

²² Nta muntu nji wachilwala. Amango Yesu aliri oku gulu, alifumize bantu banene. (Matayo 9:35; Marko 1:40-42; Yohana 5:5-9) S’aliko omu kasi kage k’Echami omu Bwami bwa Mungu, nj’afumya abantu boshi. Ntaye nji wachiderha ntya: “Nalwere.”​—Isaya 33:24; 35:5, 6.

23. Bichi Yehova nj’ajirira abafire?

²³ Abafire nji bafuka. Mungu alaganyize obufuke bw’emiliyoni y’abantu. “Nji haba obufuke bw’ab’okunali n’abarhali b’okunali.”​—Osome Yohana 5:28, 29; Matendo 24:15.

24. Wakasima nj’olame omu Paradizo si? Bulagurhe?

²⁴ Ngasi muguma aherhe eby’akajira. Rhwakayiga okumenya Yehova n’okujira eby’anasima. Changwa rhwakajira ebirhusimire okujira. Nka rhusimire okukola ebi Yehova asimire nji rhwapata akalamo k’esiku n’amango. Mango maguma, mulume muguma abwira Yesu nj’amuyibuke enyuma y’olufu lwage. Yesu amulaganya ntya: “Nji waba haguma nani omu Paradizo.” (Luka 23:43) Omu sura ekulikireho, nji rhwayiga binene eju ya Yesu, nji rhwanamenya gurhe nj’ayeneza ebilagane bya Mungu bikwirire.