1, 2. Chibazo chihe bantu banene banachibaza?

OBUHINDULE bwaharabise olugo (vilage). Omulume oherhe embundi amalasha abantu omu kanisa, amakoromesa n’okuyirha bantu banene. Mukazi muguma amafa n’obulwala bw’akansere, amaleka bana (fubi) 5.

² Amango ebyago changwa obuhanya bwamaba, bantu banene banachibaza ntya: “Bulagurhe egulu liyunjulirene obushombanyi n’amalibuko?” Nawe si, wachigerere chibaza echola chibazo?

3, 4. a) Bibazo bihe Habakuki alibazize? b) Bichi Yehova alimushubize?

³ Ebiblia ederhere oku chiro n’abalume baliherhe obwemere bunene mu Mungu balichibazize echola chibazo. Omufano, omulebi Habakuki abazaga Yehova ntya: “Bulagurhe oli wanjira mbone obubi? Na bulagurhe oli walolereza amalibuko? Bulagurhe okuharabiswa n’obubandi bili embere zani? Bulagurhe okurhongana n’entambala bili byaluga bwenene?”​—Habakuki 1:3.

⁴ Omu lwandiko lwa Habakuki 2:2, 3; Mungu ashubiza Habakuki, anamulaganya oku amala ebyola bibazo. Yehova anasima abantu bwenene. Ebiblia ederhere “oku anakuhangayikira.” (1 Petro 5:7) Mungu anababala bwenene kurhulusha amango ali abona abantu bali balibuka. (Isaya 55:8, 9) Aliko si, bulagurhe hali malibuko manene?

5. a) Bichi balimu banene b’amadini banayigiriza oku biloere amalibuko? b) Bichi Ebiblia erhuyigirize oku bilolere amalibuko?

⁵ Amango omuntu ali alibuka, bapastere, bapadiri n’abandi balimu b’amadini, banazigana kuderha oku “buli bulonza bwa Mungu.” Hali amango banashuba kuderha oku Mungu anaba arheganya embere ebyabera omuntu, obuhanya bwamuhikira n’oku nta muntu wakamenya bulagurhe. Okubunene, amango omuntu mukulu changwa omwana mudorho amafa, banaderha oku Mungu alisimire aje embingu kulama haguma naye. Aliko, ebyola byoshi buli bubeshi. Nta mango obuhanya busaga kurhenga emwa Yehova. Ebiblia ederhere oku birhakagalikana oku Mungu akole obubi changwa egosa.​—Yobu 34:10.

6. Bulagurhe bantu banene banaderha oku Mungu yenalerha amalibuko oku gulu?

⁶ Bulagurhe bantu banene banaderha oku Mungu ye rhulerhera amalibuko? Bulala bawaza oku ye murhegesi w’egulu. S’aliko, rhwayigire omu sura ya 3 oku Shetani Ibilisi ye murhegesi w’egulu.

7, 8. Bulagurhe amalibuko malugire oku gulu?

⁷ Ebiblia ederhere oku “egulu lyoshi lili omu burhegesi b’omubi.” (1 Yohana 5:19) Shetani murhegesi w’egulu aba munizi. Ali “ahabusa [ashumika] egulu lyoshi.” (Ufunuo 12:9) Na bantu banene bali kuguma naye. Bibonekene oku ebyola byebirhumire oku gulu kwayunjulirana obubeshi, obushombanyi n’obubi.

⁸ Aliko, hali ebindi bintu birhumire amalibuko maba malugire oku gulu. Adamu na Eva balibulire kukenga, abana babo bashokola echaha chabo. Eju y’echola, abantu bali balibuza abandi. Banazigana kusima  babarhegeke. Abantu bali barhongana bonyine oku bonyine, banajirana kubi n’okulwisana. (Muhubiri 4:1; 8:9) Kandi, amalibuko malerhwa “n’ebisanzi n’ebintu birhalirheganyizwe.” (Muhubiri 9:11) Echinjira chakahikira omuntu changwa obuhanya, amango akaba ali ahantu habi wala omu kasanzi kabi.

9. Bulagurhe rhwakayemera oku hali empanvu nyinja, erhumire Yehova alekerera amalibuko?

⁹ Nta mango Yehova asaga kulerha amalibuko. Arhali ye lerha amavita, obunizi n’obubandi. Arhanali ye lerha ebyago; nk’emisisi y’egulu, emiyaga mibi, n’obuhindule. Aliko, nkabaga oli wachibaza ntya: “Akaba Yehova ye herhe misi minene kulusha byoshi alemere, bulagurhe alekerere amala malibuko moshi?” Rhumenyere bwinja oku Mungu arhusima. K’okuderha oku aherhe echirhumire alekerera amalibuko.​—1 Yohana 4:8.

10. Bubeshi buchi Shetani alibeshere Yehova?

¹⁰ Shetani Ibilisi alishumikire Adamu na Eva omu bustani ye Edeni. Abesha oku Mungu ali murhegesi mubi, anabwira Adamu na Eva oku hali echintu chinja Mungu abayimire. Shetani abayemeza oku akabere murhegesi mwija n’oku barhakachikenere Yehova abarhegeke.​—Mwanzo 3:2-5; olole amahugulo ma 27, bukurasa bwa 222.

11. Chibazo chihe rhwashubizako?

¹¹ Adamu na Eva babulaga kukenga Yehova, banachikula kuye. Baliwazize oku bakwanene bachishoge bonyine echintu chinja n’echibi. Aliko kwaliri kuchirhebeka. Yehova yenyine yemenyere ebinja byakabera abantu. Gurhe nj’abiyerekana?

12, 13. a) Bulagurhe Yehova arhalibere ayirha Adamu na Eva han’ahola? b) Bulagurhe Yehova alekerere Shetani abe murhegesi w’egulu? c) Bulagurhe Yehova alekere abantu bachirhegeke bonyine?

 ¹² Yehova arhalibere ayirha Adamu na Eva han’ahola. Abaleka baburhe abana. Analeka abana ba Adamu na Eva bachishoge eyi balonzeze abe murhegesi wabo. Omuhigo gwa Mungu eju y’egulu, gwaliri oku liyunjule mw’abantu bashinganene. Ku byakanabere, chiro akaba obugamba bwa Ibilisi.​—Mwanzo 1:28; Isaya 55:10, 11.

¹³ Shetani abesheraga Yehova embere y’amamiliyoni ma bamalayika. (Yobu 38:7; Danieli 7:10) Che charhumire Yehova aleka ebisanzi bigere y’ayerekana obubeshi bwa Shetani. Alekere abantu nabo ebisanzi bayerekane akaba baherhe obuhashe b’okuchirhegeka buzira burhabale bwage. K’okuderha oku abalekere bashimike amarhegesi mabo omu bukulu bwa Shetani.

14. Yehova alekere ebisanzi bigere; bichi ebyola byarhurhabere rhumenye?

¹⁴ Hamagera myaka minene eyi abantu bali bachihangana okuchirhegeka bonyine, aliko bagambirwe. Ebyola biyerekene oku Shetani ali mubeshi. Abantu bakenere oburhabale bwa Mungu. Omulebi Yeremiya aliderhere bwinja amango aderha ntya: “Imenyere bwinja, Yehova! Oku enjira y’omuntu erhali omubuhashe bwage. Mwene omuntu oliwalambagira, arhakagala kuchiyerekeza yenyine.”​—Yeremia 10:23.

15, 16. a) Bulagurhe Yehova alekerere amalibuko kugera zene? b) Bulagurhe Yehova arhamalaga ebibazo byalerhwaga na Shetani?

¹⁵ Bulagurhe Yehova alekerere amalibuko kugera zene? Bulagurhe alekerere empanya zirhuhikire? Byalihemere ebisanzi bigere yi bibonekana oku oburhegesi bwa Shetani burhali bwinja. Abantu bachihanganire okushimika  buli burhegesi, aliko ntabo bwalerhere ebintu binja. Chiro akaba obusomi n’obuhanga bili byaja embere, harhasaga kuba omulyagane, obukene, obunizi n’amavita nk’oku bili zene. K’okuderha oku abantu barhaherhe obuhashe b’okuchirhegeka bonyine buzira burhabale bwa Mungu.

¹⁶ Yehova arhamalaga ebibazo byalerhwaga na Shetani. Nk’ajiraga ntyo, akabere ey’amarhabala Shetani kurhegeka egulu. Aliko arhakagwasa Ibilisi oku burhegesi bwage! N’oku bunene, abantu bakawazize oku bakagalire kuchirhegeka bowe bonyine. S’aliko, bubeshi. Nta lusiku Yehova nj’ajira echintu chakarhuma bayemera obola bubeshi! Yehova arhabesha haba n’ehityu.​—Waebrania 6:18.

17, 18. Bichi Yehova nj’akola omu kukula empanya zoshi zilerherwe na Shetani?

¹⁷ Obugamba bwa Shetani n’abantu buli bwarhulerhera empanya zinene. Yehova akabikula byoshi si? Nechi, bulala emwa Mungu byoshi bigalikana. Yehova amenyere mango machi nj’ayerekana oku ebi Shetani asidakaga bili bya bubeshi. Nk’oku anaderhaga, nj’ahindamula egulu libe paradizo. Abantu boshi bali omu “shinda z’olwibuko” nji bashuba kulama. (Yohana 5:28, 29) Nt’amango abantu nji bachilwala n’okufa. Yesu nj’akula empanya zoshi zilerherwe na Shetani. Yehova nj’akolesa Yesu omu “kuharabisa amakasi ma Ibilisi.” (1 Yohana 3:8) Rhuherhe obusime bulala Yehova ali agenderera kurhulindira. Arhuhere ebisanzi by’okuyiga rhumumenye, n’okuchishogaye abe murhegesi werhu. (Osome 2 Petro 3:9, 10.) N’amango rhuli rhwalibuka, anarhurhabala rhugenderere kulembera.​—Yohana 4:23; Osome 1 Wakorinto 10:13.

¹⁸ Yehova arharhuseza rhuchishogeye nka murhegesi werhu. Ahere abantu oluhembo lukwirire bwenene,  obuhashe b’okuchishoga eby’okukola. Rhulolage gurhe rhwakakolesa olola luhembo.

19. Luhembo luhe Yehova arhuhere? Na bulagurhe rhukwanene okusimiswa n’olola luhembo?

¹⁹ Obuhashe b’okuchishoga, luli luhembo lukwirire Mungu arhuhere. Obola buhashe, bunarhuma rhurhaba kuguma n’enyama. Enyama zirhajira bwenge, zirhakagala kuchishoga echinja n’echibi. S’aliko, rhwewe rhuherhe obuhashe b’okuchishoga kalamo kali gurhe rhulonzeze kulama n’okuchishoga kusimisa Yehova. (Mezali 30:24-28) Kandi, rhurhali kuguma n’amashini bulala manakola ebibamabwirire makole n’oku bamarheganyize. S’aliko, rhwewe rhuherhe obuhashe b’okuchishoga rhusimire kuba bantu bali gurhe, okuchishoga abera n’ebirhwakola omu kalamo kerhu. Yehova asimire rhugwarhe obusime omu kalamo kerhu.

20, 21. Bichi bikwirire wakachishoga okukola mu zinola siku?

²⁰ Yehova alonzeze rhumuzigire. (Matayo 22:37, 38) Ali kuguma n’omuzere oyunva asimire amango omwana wage amamubwira “Inkuzigira” n’omurhima gwage goshi, aliko arhali bulala bamusezeze aderhe ntyo. Anarhuleka rhuchishoge rhwenyine akaba rhwamukolera changwa nanga. Shetani, Adamu na Eva balichishogere okurhamukolera. Nawe si, gurhe wakolesa obuhashe b’okuchishoga Yehova akuhere?

²¹ Bantu banene bachishogere okukolera Yehova ahali ha Shetani. Nawe okolese obuhashe bwawe b’okuchishoga omu kukolera Yehova. (Mezali 27:11) Nj’amala amalibuko moshi omu gulu lihyahya. Bichi wakakola yi nj’olama mw’elyola gulu lihyahya? Esura ekulikireho, yashubiza kw’echola chibazo.