1. Chitabu chihe chakarhumenyesa eby’esiku zayinja?

OMU KULOLA ebili byajirika omu gulu oku televiziyo, byarhuma wagera amango wachibaza ntya: “Bulagurhe ebintu bilibyagenderera kubiha bwenene?” Empanya n’obubi bilugire bwenene mu zinola siku; n’ebyola byanarhuma bantu banene bawaza ok’obuzinda bw’egulu buli hofi. Kubinali si? Byakanagalikana okumenya eby’esiku zayinja? Nechi. Abantu barhakamenya eby’aba omu siku zayinja, aliko Yehova yewe akabimenya. Kugerera Ebiblia, arhubwirire ebyarhuhikira n’ebyahikira egulu omu siku zayinja.​—Isaya 46:10; Yakobo 4:14.

2, 3. Bichi abanafunzi ba Yesu balisimire bamenye? Na gurhe Yesu alibashubize?

² Eyi Ebiblia yaganirira obuzinda bw’egulu, erhaba eliyaganirira okushandazwa kw’egulu, s’aliko, eba ey’eli yaganirira obuzinda b’obubi. Yesu aliyigirize oku Obwami bwa Mungu bwakarhegekere egulu. (Luka 4:43) Abanafunzi bage balisimire bamenye mango machi Obwami bwa Mungu bwakayinjire. Bamubaza ntya: “Mango machi ebyola nji byaba, na chichi nji chaba chimenyeso ch’okubaho kwawe n’ech’esiku zizinda z’egulu?” (Matayo 24:3) (Olole amahugulo ma 24, bukurasa bwa 220). Yesu arhabwiraga abanafunzi bage lusiku luhe obuzinda bw’egulu bwakayinjire. S’aliko, ababwira ebyakabere embere obuzinda buhike. N’ebyola ababwiraga, bilibyayenera zene.

³ Mu enola sura, rhwabona ebiyerekene oku rhulamire  hofi bwenene n’obuzinda bw’egulu. Embere rhumenye echirhumire ebintu bibihire bwenene kunola gulu, rhurhange rhuganire oku bilolere evita ly’abaga embingu.

4, 5. a) Bichi byalibere embingu Yesu amala kuba Mwami? b) Bichi byakahikire abantu kurhenga Shetani akabwirwe oku gulu biderherwe omu lwandiko lwa Ufunuo 12:12?

⁴ Omu sura ya 8, rhwayigire oku Yesu ajirwaga Mwami embingu omu mwaka gwa 1914. (Danieli 7:13, 14) Echitabu cha Ufunuo chiderhere ebyageraga: “Evita lyaba embingu: Mikaeli [Yesu] na bamalayika bage balwisa enkuba-joka [Shetani], n’eyola nkuba-joka haguma na bamalayika bage balwa.” Shetani n’abazimu bahimwa omu vita, banakabulwa oku gulu. Bamalayika basima bwenene! Aliko si, bichi byakahikire abantu kunola gulu? Nk’oku Ebibla ederhere, bwakabere buhanya oku bantu. Bulagurhe? Bulala Ibilisi aherhe oburhe bunene; amenyere oku asigeze “bisanzi bigeke bwenene.”​—Ufunuo 12:7, 9, 12.

⁵ Ibilisi ali achihangana kulerha bibazo binene oku gulu. Aherhe oburhe bunene bulala amenyere oku hanola hofi achibirwa hale. S’aliko, rhurhange rhulole ebi Yesu aderhaga eju y’esiku z’obuzinda.

6, 7. Ebi Yesu amenyesaga eju y’amavita n’enzara bili byayenera mu zinola siku. Bichi biyerekene ntyo?

⁶ Amavita. Yesu aliderhere ntya: “Eshanja nji lyalwisa eshanja, n’obwami bwanalwisa obwami.” (Matayo 24:7) Mu zinola siku, abantu bali bafa kulusha ezindi siku. Kugerera echigusho ch’okulonza emyazi (Worldwatch Institute), kurhenga omwaka gwa 1914, amavita mayirhire bantu barhalwise 100 000 000 (miliyoni egana).  Mu myaka 100, kurhondera omu mwaka gwa 1900 n’ogwa 2000, Abantu bafire omu mavita, bali banene kukuba 3 abafaga omu myaka y’embere ya 1 900. Amavita mali malibuza ebihumbi by’abantu!

⁷ Enzara. Yesu aderhaga ntya: “Nji haba bilyo bigeke (enzara).” (Matayo 24:7) Abantu barhasaga kuyeza kuguma na muzinola siku. Aliko, bantu banene barhali babona ebi bakalya. Bulagurhe? Bulala boshi barhaherhe efuranga zinene z’okugula ebilyo changwa barhaherhe amashwa makayera kw’ebilyo. Bantu banene ku muliyare muguma (muntu muguma ku mushanvu 1/7) balamire omu bukene bunene. Nk’oku Echigusho ch’amagala omu gulu lyoshi (OMS) chiyerekene, ebihumbi by’abana bali balwala n’okufa bulala bali balya kubi.

8, 9. Bichi biyerekene oku ebi Yesu amenyesaga eju y’emisisi y’egulu n’amalwala m’okuyahukira, bili byayenera mu zinola siku?

⁸ Emisisi y’egulu. Yesu alimenyeseze oku: “Nji haba emisisi minene y’egulu.” (Luka 21:11) Abalolerezi banayerekana oku  buli mwaka habonekana emisisi mibi y’egulu. Kurhonderera omu mwaka gwa 1900, bantu barhalwise 2 000 000 (miliyoni ebiri) banafa n’emisisi y’egulu. Zene, chiro akaba etekinolojiya eli yarhabala abantu kubamenyesa embere oku emisisi yagera, chirhanabuza erhayirha abantu.

⁹ Amalwala. Yesu alimenyeseze oku “amalwala m’okuyahukira” makabereho. Bantu banene banafa n’amalwala mayahukira juba-juba. (Luka 21:11) Chiro akaba Abanganga banachihangana kubuka ndwala zinene, chirhabuza buli mwaka harhabonekana emiliyoni y’abantu bafire n’amalwala nk’echitundu, amalariya n’ekolera. Hamagera myaka 40 abanganga bavumbwire mandi malwala 30 mahyahya. Na maguma mumo, marhaherhe bufumu.

10. Bulagurhe rhwakaderha oku ebi derherwe omu 2 Timoteo 3:1-5 bili byayenera mu zinola siku?

¹⁰ Nk’oku 2 Timoteo 3:1-5 ederhere, omu siku z’obuzinda hakabere ebihe “bikomere  okubilembera.” Entumwa Paulo yaliderhere gurhe engeso z’abantu zakabere omu siku z’obuzinda. Aliderhere oku abantu . . .

• bakachisimire bonyine

• bakasimire efuranga

• barhakakengere abazere babo

• barhakabere bimana

• barhakasimire abantu b’emilala yabo

• barhakachigalire

• bakabere babandi banakalihire

• bakasimire ebintu by’okuchisimisa ahali ha Mungu

• bakabonekene nka banasima Mungu, s’aliko banalahira kumukenga

11. Nk’oku Zaburi 92:7 ederhere, bichi nji byagerera banyankolamaligo?

¹¹ Ah’olamire, intyo kw’abantu banali si? Omu gulu, bantu banene baherhe eyola mibereho. S’aliko hali oku Mungu ajira hanola hofi. Alaganyize ntya: “Amango ababi bali bashishagira nka birhi bibi, na nka banyankola  maligo bali bashisha, eyi balonza kuharibiswa esiku n’amango.”​—Zaburi 92:7.

12, 13. Bichi Yehova arhurhabere kumenya omu siku z’obuzinda?

¹² Ebiblia yalimenyeseze, ok’omu siku z’obuzinda, hakabere empanya n’amalibuko. S’aliko, yashuba kuderha oku hakabere ebindi bintu binja.

¹³ Abakozi ba Mungu bakamenyerere Ebiblia bwinja. Omulebi Daniyeli aliyandikire ntya kuyerekera esiku z’obuzinda: “Obumenyi b’okuli nji bwaluga.” (Danieli 12:4) Omu siku z’obuzinda, Mungu akarhabere abakozi bage bamenyerere Ebiblia bwinja. Nantyo kw’anajirire, kurhonderera omu mwaka gwa 1914. Omufano, arhurhabere rhwamenya akamaro k’ezino lyage, omuhigo gwage ejuy’egulu, enchungu che chichi, gurhe biba amango omuntu amafa n’obunihire b’obufuke (olole amahugulo ma 21 n’ama 25, bukurasa bwa 216 n’obwa 221). Rhwayunvirhe oku Obwami bwa Mungu buli burhegesi buguma bwakarhumalira ebibazo. Rhwanashubire kuyunva gurhe rhwakagwarha obusime na gurhe rhwakalama akalamo kasimisize Mungu. Aliko si, gurhe abakozi ba Yehova banakolesa ebi banayiga? Bulebi buguma bushubize kw’echila chibazo.

14. Bande banahubiri omwazi gwinja g’Obwami, na ngahe banahubiri?

¹⁴ Abakozi ba Mungu bakahubirire emyazi minja omu gulu lyoshi. Yesu aliderhere ntya eju y’esiku z’obunzinda: “ogula mwazi gwinja g’Obwami nji gwa hubiribwa omu gulu lyoshi.” (Matayo 24:3, 14) Omwazi gwinja g’Obwami gwahubirirwe omu ndimi zirhalwise 700 n’omu bihugo birhalwise 230. Abahamirizi ba Yehova barhengere “omu mashanja moshi na ngasi buko,”  banahubiri oku gulu lyoshi. Banarhabala abantu boshi bamenye Obwami bwa Mungu che chichi na bichi nji bwajirira abantu boshi. (Ufunuo 7:9) Banajira ntyo okubusha. Na chiro bantu banene babagaya n’okubalibuza, ntacho chakababuza okuhubiri nk’oku Yesu anaderhaga.​—Luka 21:17.

15. a) Oyemerere oku rhulamire omu siku z’obuzinda si? Bulagurhe? b) Bichi byagerera balala barhali bakenga Yehova? c) Na bichi byagerera balala bali bakenga Yehova?

¹⁵ Oyemerere oku rhulamire omu siku z’obuzinda si? Malebi manene me Biblia malolere esiku z’obuzinda, malimayenera mu zinola siku. Hanola hofi Mungu ayumanza akasi k’okuhubiri omwazi gwinja. N’ahola “obuzinda” bwanayinja. (Matayo 24:14) “Obuzinda” che chichi? “Obuzinda”, eli Armagedoni, amango Yehova nj’amala obubi. Nj’akolesa Yesu na bamalayika baherhe emisi omu kuharabisa balala bali balahira kumukenga n’okukenga Yesu. (2 Watesalonike 1:6-9) N’enyuma y’ahola, Shetani n’abazimu bage barhakachi shumika abantu. Balala basimire kukenga Mungu n’okuyemera barhegekwe n’Obwami bwage, nji babona gurhe ebilagane byage byoshi byayenera.​—Ufunuo 20:1-3; 21:3-5.

16. Kwabulala obuzinda buli hofi bwenene, bichi okwanene okujira?

¹⁶ Hanola hofi, linola gulu lirhegekerwe na Shetani lyaharabiswa. K’okuderha oku biIi by’akamaro bwenene okuchibaza ntya: “Bichi nkwanene kujira?” Yehova asimire omenye bintu binene oku bilolere Ebiblia. Oyiyige na murhima muguma. (Yohana 17:3) Abahamirizi ba Yehova bajira embuganano ngasi boso omu kurhabala abantu bamenyerere Ebiblia. Ojire ok’ogalire koshi y’ogera oku mbuganano. (Osome Waebrania 10:24, 25.) Okayiga oku hali eby’ohemerwe ohindamule,  orhayubahaga, obijire. Nantyo, obwira bwawe haguma na Yehova bwagwarha emisi bwenene.​—Yakobo 4:8.

17. Bulagurhe bantu banene nji bashalama amango obuzinda nji bwayinja?

¹⁷ Entumwa Paulo yaliderhere ok’okuharabiswa kw’ababi kwakayinjire “kuguma n’ok’omwizi ayinja omu budufu.” (1 Watesalonike 5:2) Yesu alilebere oku bantu banene bakalahire oku balamire omu siku z’obuzinda. Aliderhere ntya: “Nka kulala byaliri omu siku za Nowa, natyo ku nji byaba amango Mwene omuntu nj’ayinja [esiku z’obuzinda]. Nka kulala, baliri mw’ezola siku embere y’envula y’echihonzi: baliri balya, abandi bananywa, abalume baliri bashaba n’abakazi banashabwa, kugera amango Nowa ajaga omu safina; barhanahugukirwaga kugera amango envula y’echihonzi yayinjaga yabaheka boshi.”​—Matayo 24:37-39.

18. Bukenguse buhe Yesu alirhuhere?

¹⁸ Yesu alirhukengusize; oku rhurhakwanene okuhugwa “omu kulya kurhalusa olugero, n’okunywa kurhalusa olugero n’amahangayiko m’akalamo.” Anaderha ok’obuzinda bwakayinjire “nka murhego,” k’okuderha buzira kumenya. Alishubire yongera oku “lwakayinjiire balala boshi balamire . . . oku gulu lyoshi.” N’oku buzinda aderha ntya: “Mugenderere okuba masu n’okusengerera [kusalira n’omurhima goshi] ngasi mango, yi nji mufuma ebila bintu byoshi bikwanene biyinje, nji munayumange embere ya Mwene omuntu.” (Luka 21:34-36) Bulagurhe bili by’akamaro bwenene rhugenderere kukenga oku Yesu arhukengusaga? Bulala hanola hofi egulu lya Shetani lyaharabiswa. Balala nji bayemerwa na Yehova na Yesu bonyine ba nji bagenderera kulama esiku n’amango omu gulu lihyahya.​—Yohana 3:16; 2 Petro 3:13.