1, 2. Inde wakarhulanga mu zinola siku?

OWAZE gurhe byakaba amango oli walambagira embuga omu muyaga gunene bwenene. Ebichu byanashusha by’omukara. Emibaraganyo n’emikungulo yanarhondera okugera, n’envula nene yanarhondera ukurhoga bwenene. Wanalonza ahantu wakayigama. Wayunva orhulerere bwenene amango wamahabona!

² Rhulamire omu chihe chili kuguma n’echola. Ebintu bili byagenderera kubiha bwenene omu gulu. Nkabaga ebyola byanarhuma wachibaza ntya: “Ngahe nakagana yi mbona obulanzi?” Mukozi wa Mungu muguma aliyandikire ntya: “Nabwira Yehova ntya: ‘Oli malibirhiro mani na nyigamiro yani, Mungu wani impebere m’obunihire.’” (Zaburi 91:2) Yehova arhuhere echirhulirizo n’obunihire bwinja bw’esiku zayinja.

3. Bichi rhukwanene rhujire yi Yehova arhulanga?

³ Gurhe Yehova anarhulanga? Akarhurhabala rhulwise buli chibazo choshi. Anaherhe emisi bwenene kulusha balala boshi bakalonza barhujire kubi. Chiro obuhanya bwarhuhikira, rhwakachizera oku Yehova arhufumya amalibuko merhu moshi omu siku zayinja. Ebiblia erhuhebere omurhima oku rhugenderere okubera “omu buzigire bwa Mungu.” (Yuda 21) Yi Yehova arhurhabala amango rhuli omu bibazo, rhukwanene okugenderera kuyorha bera bage. Gurhe rhwakaja rhwajira ntyo?

4, 5. Gurhe Yehova anarhuyereka obuzigire bwage?

⁴ Yi rhugenderera kuyorha bera ba Yehova, rhukwanene rhuchizere okw’anarhusima bwenene. Owaze oku by’anarhukolera byoshi. Arhuhere Egulu likwirire bwenene, aliyunjunza mw’enyama n’emirhi ekwirire. Kandi, arhuhere ebilyo bilokere n’amenji machere. Kugerera Ebiblia, arhumenyeseze ezino lyage n’amorhere mage menja. N’ech’arhujirire chinja bwenene, arhuyerekere obuzigire bwage omu kurhuma Yesu oku gulu, oyola Mugala alisimire bwenene y’ahana obuguma-guma bwage eju yerhu. (Yohana 3:16) Kugerera eyola nterekero, rhuherhe obunihire bwinja bw’esiku zayinja.

⁵ Yehova ashimikire Obwami bw’echimasiya; burhegesi burhegekerwe na Masiya. Obola Bwami buli embingu, nji bwamala amalibuko moshi, n’okuhindamula egulu libe paradizo. Abantu boshi nji balama esiku zoshi omu busime n’omu murhula omu Paradizo. (Zaburi 37:29) Kandi, Yehova arhuyerekere obuzigire bwage, omu kurhubwira gurhe rhwakagwarha akalamo kakwirire mu zinola siku. Oku bunene, arhuhebere omurhima rhumusalire, anali jubajuba kurhuyunviriza. Yehova anayerekana obuzigire bwage bwinja-bwinja ku buli muguma werhu.

6. Gurhe wakayerekana ok’osimisizwe n’obuzigire Yehova anakuyereka?

⁶ Gurhe wakayerekana ok’osimire obuzigire Yehova anakuyereka? Omuyereke ok’onasimiswa na byoshi anakukolera. Mu zinola siku, bantu banene barhawaza oku bakaderha koko. Intyo kubyaliri amango Yesu aliri oku gulu. Lusiku luguma, afumya babenzi-benzi 10, s’aliko muguma yenyine ye walimubwirire koko. (Luka 17:12-17) Rhusimire okuba kuguma n’oyola mulume. Esiku zoshi rhusimire okuyerekana oku rhusimisizwe na byoshi Yehova anarhukolera.

7. Nka gurhe rhukwanene okusima mu Yehova?

 ⁷ Nerhu, rhukwanene okuyerekana oku rhusimire Yehova. Yesu alibwirire abanafunzi bage oku bakwanene basime Yehova “n’omurhima gwabo goshi,” “n’obuguma-guma bwabo boshi,” “n’obwenge bwabo boshi.” (Osome Matayo 22:37.) Bichi ebyola bilonzeze okuderha?

8, 9. Gurhe rhwakayereka Yehova oku rhumusimire?

⁸ Okuderha konyine oku rhusimire Yehova, kutosheze si? Nanga. Akaba rhumusimire “n’omurhima gwerhu goshi,” “n’obuguma-guma bwerhu boshi,” “n’obwenge bwerhu boshi,” rhwayerekana ntyo, kugerera ebijiro byerhu. (Matayo 7:16-20) Ebiblia ederhere bwinja-bwinja oku akaba rhusimire Mungu, rhwakenga amarhegeko mage. Okukenga amarhegeko mage kukomere si? Nanga, bulala “marhalemerere.”​—Osome 1 Yohana 5:3.

⁹ Nji rhwagwarha akalamo kasimisize, rhukakenga Yehova. (Isaya 48:17, 18) Aliko si, bichi byarhurhabala rhugenderere kuyorha bera bage?

10. Bulagurhe okwanene ogenderere okuyiga kumenya Yehova?

¹⁰ Gurhe wabaga mwira wa Yehova? Omu kuyiga Ebiblia, wayigire okumumenya; n’obwira bwawe haguma naye bwakula. Obola bwira buli kuguma n’omuliro. Y’omuliro gugenderera kukolera, bihemere okuheba mw’eshali. Intyo kubinali n’obwira bwawe haguma na Yehova; yi bugenderera okugwarha emisi, okwanene ogenderere okuyiga kumumenya.​—Mezali 2:1-5.

11. Bichi wayunguka omu kuyiga Ebiblia?

¹¹ Omu kugenderera kuyiga Ebiblia, wayiga bintu binene byakuhuma oku murhima. Obe nka wawaza gurhe banafunzi babiri ba Yesu balichiyunvirhe amango ababwira eju y’amalebi m’Ebiblia. Baliderhere ntya: “Emirhima yerhu erhalemaga yakolera amango aliri aganira nerhu omu  barabara, n’amango aliri arhufunulira amandiko bwinja-bwinja si?”​—Luka 24:32.

12, 13. a) Bichi byakahikira obuzigire bwerhu ku Mungu? b) Bichi rhukwanene rhujire y’obuzigire bwerhu ku Mungu bugenderera okugwarha emisi?

¹² Amango abanafunzi ba Yesu bayunvaga amandiko, emirhima yabo yahumwako. Nawe, waliyunvirhe obusime bungana n’obola amango warhonderaga kumenyerera Ebiblia. Ebyola byakurhabere omenye Yehova n’okumusima. Orhalekaga obola bwira buhole changwa bugehe.​—Matayo 24:12.

¹³ Y’obwira bwawe haguma na Mungu bugenderera okugwarha emisi, okwanene ochihangane bwenene. Ogenderere okuyiga bintu binene eju yage n’eju ya Yesu. Owaze bwenene gurhe wakakolesa ebi oli wayiga. (Yohana 17:3) Amango oli wasoma Ebiblia changwa amango oli wayiyiga, ochibaze ntya: “Bichi ebyola binyigirize eju ya Yehova? Mw’olula lwandiko, bichi binshunikire okumusima n’omurhima  gwani goshi, n’obuguma-guma bwani boshi?”​—1 Timoteo 4:15.

14. Bulagurhe esala linarhurhabala rhugenderere okugwarha obuzigire buherhe emisi ku Yehova?

¹⁴ Amango oherhe mwira wawe wa hofi, onaganira naye oku kahunda. Ahola, obwira bwawe haguma naye bwanagenderera okugwarha emisi. K’onakuguma nerhu, amango rhuli rhwaganira na Yehova omu sala oku kahunda, obwira bwerhu haguma naye bwagenderera okugwarha emisi. (Osome 1 Watesalonike 5:17.) Esala luli luhembo lwinja kurhenga emwa Darha w’embingu. Esiku zoshi, rhukwanene okumubwira ebirhengere omu murhima. (Zaburi 62:8) Rhurhakwanene okugalukira galukira esala rhubikire omu bwenge bwerhu; s’aliko, rhukwanene okusalira ebirhengere omu murhima gwerhu. Y’obwira bwerhu haguma na Yehova bugenderera okugwarha emisi, rhukwanene okugenderera okuyiga Ebiblia n’okumubwira ebirhengere omu murhima.

15, 16. Gurhe onabona akasi k’okuhubiri?

¹⁵ Kandi, rhukwanene okuganira n’abandi oku bilolere obwemere bwerhu, yi rhugenderera okubera bera ba Yehova. Okuganira n’abandi luli lukengo lunene. (Luka 1:74) Kanali kasi Yesu ahere abakristu boshi. Rhweshi rhukwanene okuhubiri omwazi gwinja g’Obwami bwa Mungu. Warhondere okujira ntyo si?​—Matayo 24:14; 28:19, 20.

¹⁶ Entumwa Paulo yalibwene akasi k’okuhubiri oku chili chintu ch’akamaro bwenene. Aliderhere oku buli “buhirhi.” (2 Wakorinto 4:7) Okubwira abandi eju ya Yehova n’omuhigo gwage, kali kasi k’akamaro bwenene rhukwanene rhukole. Eli njira y’okukolera Yehova. Anasimisizwe bwenene n’ebi oli wamukolera. (Waebrania 6:10) N’oku bunene, okuhubiri kuherhere enyungu balala bali  bakuyunviriza, nawe wenyine. Omu kuhubiri, warhabala abandi, nawe wenyine wanaba hofi bwenene na Yehova n’okupata akalamo k’esiku n’amango. (Osome 1 Wakorinto 15:58.) Hali akandi kasi kakakulerhera obusime kuguma n’akola si?

17. Bulagurhe okuhubiri kali kasi kahemerwe okukolwa juba-juba?

¹⁷ Okuhubiri kali kasi kahemerwe okukolwa jubajuba. Rhukwanene “okuhubiri omwazi [. . .] oku bushiru.” (2 Timoteo 4:2) Abantu bakenere okuyunva emyazi elolere Obwami bwa Mungu. Ebiblia ederhere ntya: “Olusiku lukulu lwa Yehova luli hofi! Luli hofi lwanayinjire juba-juba!” Obuzinda “burhacherehwa.” (Sefania 1:14; Habakuki 2:3) Yehova aharabisa egulu lya Shetani hanola hofi bwenene. S’aliko embere ajire ntyo, rhukwanene okurhabala abantu bamenye ebinji byaba, yi bachishoga okukolera Yehova.

18. Bulagurhe rhukwanene okuharamya Yehova haguma n’abandi bakristu b’okuli?

¹⁸ Yehova asimire rhumuharamye haguma n’abandi bakristu b’okuli. Ebiblia ederhere ntya: “Rhuhangayikirane omu kuchundana omu buzigire n’ebijiro binja; buzira kuleka okubuganana haguma, kuguma n’oku baguma bakomere okujira, s’aliko, rhuhebane omurhima n’okugenderera kujira ntyo bulala rhubwene ok’olola lusiku luli hofi.” (Waebrania 10:24, 25) Rhukwanene okujira okwerhu koshi rhugalire yi rhuja oku mbuganano zoshi. Zinarhurhabala rhuhebane omurhima rhweshi.

19. Bichi byakarhurhabala rhuzigire bene berhu na bali berhu?

¹⁹ Omu kuja oku mbuganano z’echikristu, wabona kw’abera bakurhabala oharamye Yehova. Nji wabugana bene benyu na bali benyu bali bajira okwabo koshi bagalire yi baharamya Yehova nk’oku nawe oli wajira. S’aliko, nabo barhashinganene, banajira amagosa kuguma nawe. K’okuderha ok’obe juba-juba omu kubababalira. (Osome  Wakolosai 3:13.) Ogenderere okubona oborhere bwabo bukwirire. Ebyola byakurhabala obasime n’okushuba kuba hofi bwenene na Yehova.

20, 21. “Obuguma-guma b’okuli” che chichi?

²⁰ Yehova asimire bera bage bagwarhe akalamo kenja. Ebiblia erhuyigirize ok’omu siku zayinja, akalamo karhakachiba nk’okukali mu zinola siku.

²¹ Rhurhakachilama myaka 70 changwa 80 yonyine. Nji rhwagwarha “akalamo k’esiku n’amango.” Nji rhwagwarha amagala mashinganene n’omurhula omu Paradizo. Ebiblia eyirikire akola kalamo “buguma-guma b’okuli.” Yehova alaganyize okurhuhabo. S’aliko, rhukwanene okujira okwerhu koshi rhugalire yi “rhubufarha bwenene” kurhangira zene.​—1 Timoteo 6:12, 19.

22. a) Gurhe “rhwakafarha bwenene obuguma-guma b’okuli”? b) Bulagurhe okugwarha akalamo k’esiku n’amango burhali buhimanyi bwerhu?

²² Gurhe “rhwakafarha bwenene obuguma-guma b’okuli”? Rhukwanene “okukola ebinja” “n’okuba bachire omu bijiro binja.” (1 Timoteo 6:18) Ebyola bilonzeze okuderha oku rhukwanene okukolesa ebi rhuli rhwayiga omu Biblia. S’aliko, rhurhakabona obuguma-guma b’okuli oku misi yerhu rhwenyine. Okugwarha akalamo k’esiku n’amango, burhali buhimanyi bwerhu. Luli luhembo Yehova arhuhere, “lukogo rhurhakwanene.” (Waroma 5:15) Darha w’embingu, asimire bwenene okuha abakozi bage olola luhembo.

23. Bulagurhe okwanene okuchishoga bwinja zene buzira okulegama?

²³ Ochibaze ntya: “Inamparamya Mungu omu njira emusimisize si?” Akaba okwanene okuhindamuka omu kalamo kawe, ojire ntyo mu zinola siku. Rhukajira okwerhu koshi rhugalire yi rhukenga Yehova na rhukamunihira,  naye anaba malibirhiro merhu. Alanga abakozi bage mu zinola siku z’obuzinda bw’egulu lya Shetani. N’enyuma y’ahola, anajira okuntu yi rhulama omu Paradizo esiku zoshi, nk’oku analaganyize. Okachishoga bwinja zene buzira okulegama, nji wagwarha obuguma-guma b’okuli!