1, 2. Bibazo bihe rhunazigana kuchibaza?

ABANA banabaza bibazo binene. Chiro wabashubiza, banashubibaza: ‘Bulagurhe?’ Na chiro wachihangana kubashubiza, banashubibaza: ‘Bulagurhe kandi?’

² Rhunachibaza ebibazo rhweshi. Omufano: “Bichi nalya? Gurhe nayambala? Bichi nagula?” Kandi, rhunachibaza ebibazo eju y’akalamo, n’esiku zayinja. Aliko, nkarhurhabwene ebishubizo, rhuzigana leker’ahola kubilonza.

3. Bulagurhe bantu baguma banawaza oku barhakabona ebishubizo oku bibazo byabo?

³ Ebiblia yakashubiza oku bibazo by’akamaro rhunachibaza si? Bantu baguma banawaza oku nechi; s’aliko, bikomere bwenene okuyiyunva. Banawaza oku abalimu changwa abakulu b’amadini bonyine bakamenya ebishubizo. Abandi banayunva eshoni z’okurhashonda okumenya ebishubizo oku bibazo byabo. Nawe si, gurhe onawaza?

4, 5. a) Bibazo bihe onachibaza? b) Bulagurhe okwanene okugenderera kulonza ebishubizo?

⁴ Bibonekene oku nawe wakasima omenye ebishubizo bya binola bibazo: “Bichi birhumire rhulamire? Gurhe binaba ey’omuntu afa? Mungu aba muntu oli gurhe?” Omwalimu omenyikene bwenene Yesu, aliderhere ntya: “Mugenderere okuhema mwehabwe; mugenderere okulonza mwepate.” (Matayo 7:7) Chechirhumire ogenderere okulonza ebishubizo by’okuli, kugera amango wabibona.

 ⁵ Nantyo, okagenderera kulonza ebishubizo, wabipata; bili omu Biblia. (Mezali 2:1-5) Birhanakomere okubiyunva. Ebiwayiga byakulerhera obusime n’obunihire bukwanene bw’esiku zayinja. Rhuderhage oku chibazo bantu banene banazigana chibaza.

6. Bulagurhe bantu banene banawaza oku Mungu arhabahangayikira?

⁶ Bantu banene banawaza oku Mungu arhabahangayikira. Chanarhuma banawaza oku nka Mungu anabahangayikira, singa akalamo karhali ntya hanola oku gulu. Hoshi hali amavita, obushombanyi n’empanya. Abantu balibalwala, balibuka n’abandi banafa. Baguma banachibaza ntya: “Akaba Mungu arhuhangayikira, bichi birhumire arhamala amala malibuko?”

7. a) Bichi birhuma bantu baguma banaderha oku Mungu aba mubi? b) Bulagurhe kurhali kwinja okuheba Mungu kw’echisobe (okumushobeka) amango obuhanya bwamaba?

⁷ Amandi mango, abakulu b’amadini banarhuma abantu bawaza oku Mungu aba mubi. Amango obuhanya bwamaba, banaderha oku bulonza bwa Mungu. N’amango bamaderha ntyo, eyi balibabeshera Mungu. S’aliko, Ebiblia eyigirize oku Mungu arhali y’entangiriro y’empanya. Yakobo 1:13 ederhere oku Mungu arhageregeza, changwa arhashumika haba n’omuguma n’ebintu bibi. Eyila mpanulo eshubire derha ntya: “Amango omuntu ali omu bigeregezo, arhaderhaga mpu, ‘indi nageregezwa na Mungu.’ Bulala Mungu arhakageregezwa n’amabi, naye yenyine arhageregeza muntu.” K’okuderha okw’amango alolereze  amalibuko, arhali yemalerhere.—Osome Yobu 34:10, 12.

8, 9. Amango rhuherhe ebibazo, bulagurhe kurhali kwinja okushobeka Mungu? Lerha omufano.

⁸ Rhurhole omufano: Musole muguma okola akulire, onalamire haguma n’abazere bage. Eshe anamusima bwenene, anamuyigiriza gurhe akachishoga echintu chinja. Hanagera amango oyola mwana w’obusole arhachigenderera kukenga eshe. Anachishoga okurhenga ahamwabo, n’okukola ebintu bibi. Akalamo kanamubihira bwenene. Wakaderha si okw’eshe yemulerhere ebyola bibazo bulala yiwamulekaga agende? Nanga! (Luka 15:11-13) Bantu baguma bachishogere okurhakenga Mungu omu kujira ebintu bibi. Kuguma n’oyola muzere rhwayunvaga, Mungu naye abalekerere bakole ebibalonzeze. K’okuderha, okw’amango obuhanya bwamaba burhali bulonza bwa Mungu. Kurhali kwinja okumushobeka.

⁹ Bulagurhe Mungu arhaza mala amalibuko? Aherhe ebirhumire. Omu sura ye 11, nji wayiga ebye Biblia ederhere kw’echola chibazo. Aliko omenye bwinja oku Mungu arhusima, n’akaba rhuherhe ebibazo, burhali bulonza bwage. Kandi, yenyine yeherhe obuhashe b’okubimala.​—Isaya 33:2.

10. Bichi byakarhuma rhwayemera oku Mungu nj’amala obubi?

¹⁰ Mungu aba muchesibwa. (Isaya 6:3) Byoshi anakola biba binja bwenene. Rhukwanene rhumunihire. Okubwindi, abantu barhali kuguma na Mungu. Bazigana kukola amabi. Na ngasi murhegesi ochihanganire arhagwerhe obuhashe b’okumala eby’amabi mali malerha. Nta muntu oherhe emisi kuguma na Mungu.  Mungu akamala obubi esiku zoshi, nj’anabumala. Nj’amala byoshi obubi bulibwalerha.​—Osome Zaburi 37:9-11.

11. Gurhe Mungu achiyunva ey’akubona oli walibuka?

¹¹ Eyi Mungu abona ebili byajirika kunola gulu, n’okuntu oli walibuka, gurhe achiyunva? Ebiblia eyigirize oku “asima okunali.” (Zaburi 37:28) Ebinja n’ebibi byoshi anabibona. Anayunva ababere amango ali abona abantu balibalibuka. Kurhangira mira, Mungu agendaga ayunva ababere muyewe amango aliri abona ebibi binene oku gulu. (Mwanzo 6:5, 6) Arhanasagi hindamuka. (Malaki 3:6) Ebiblia eyigirize oku anakulagako bwenene.​—Osome 1 Petro 5:7.

12, 13. a) Bulagurhe rhuzigirana? Gurhe rhuna chiyunva amango rhwabona amalibuko mali kunola gulu? b) Bichi byakarhuma rhwayemera oku Mungu nj’amala amalibuko n’omulyagane?

¹² Kandi, Ebiblia ederhere oku Mungu arhulemere oku shusho lyage. (Mwanzo 1:26) K’okuderha oku arhulemere n’oborhere buli kuguma n’obwage. Akaba rhunayunva rhubabere eyi rhwabona abantu benja balibalibuka, rhumenye oku Mungu ye babala kurhulusha! Gurhe rhwakabiyemera?

¹³ Ebiblia eyigiriza oku “Mungu buba buzigire.” (1 Yohana 4:8) Ebyanakola byoshi, anabikola oku buzigire. Akaba rhujira obuzigire bulala Mungu naye abujira. Nka waligwerhe obuhashe b’okumala amalibuko n’omulyagane, orhaka bimalire si? Nechi, bulala ozigira abantu. Mungu yewe aherhe obuhashe bw’okumala amalibuko n’omulyagane [olushombo],  nj’anabikola! Ebilagane byoshi rhwabonaga oku murhangiriro gwa chinola chitabu nji byayenera. Nawe omunihire! Y’obiyemera bwinja bikuhemere omumenye.

14. a) Ezino lya Mungu ye nde? b) Bichi biyerekene oku rhukwanene rhukolese elyola zino?

¹⁴ Nka walonza omuntu abe mwira wawe, bichi orhanga mubwira? Ezino lyawe. Mungu naye ajira ezino si? Madini manene manaderha okw’ezino lyage ye Mungu changwa Waliha. S’aliko mali mazino m’obukulu, kuguma na “mwami” changwa “mukulu w’echihugo.” Mungu arhubwirire okw’ezino lyage ye Yehova. Zaburi 83:18 ederhere ntya: “Y’abantu bamenya oku woyo weyirikwa Yehova, wenyine weba enyanya w’ebintu byoshi oku gulu!” Abantu bayandikaga Ebiblia balikoleseze ezino lya Mungu, Yehova, kurhaluka kali 7 000. Yehova asimire rhumenye ezino lyage. Akumenyeseze ezino lyage, y’oba mwira wage.

15. Ezino “Yehova” k’okuderha gurhe?

¹⁵ Eby’ezino Yehova liderhere bili by’akamaro bwenene.  Elyola zino k’okuderha oku aherhe obuhashe bw’okuyeneza omuhigo gwage n’ebilagane byage byoshi. Ntacho chakamubuza. Yehova yenyine yewakayirikwa kw’elyola zino. *

16, 17. Manola mazino m’obukulu k’okuderha gurhe? a) “Ogala Byoshi” b) “Mwami w’esiku zoshi” c) “Mulemi.”

¹⁶ Ufunuo 15:3 ederhere ntya: “Ebijiro byawe bili  binene, bina somezwe, Yehova Mungu, Ogala Byoshi. Emikolere yawe eli y’okunali n’okuli, Mwami w’esiku zoshi.” “Ogala byoshi” k’okuderha gurhe? Oku Yehova yeherhe emisi kulusha byoshi alemere. Na “Mwami w’esiku zoshi” k’okuderha gurhe? Oku aliho esiku zoshi. Zaburi 90:2 ederhere oku aliriho kurhenga mira anagenderera kubaho esiku zoshi. Nawe, orhabwene oku bisomeze bwenene si?

¹⁷ Haba mulemi muguma yenyine; Yehova. Ufunuo 4:11 ederhere ntya: “Okwanene, Yehova Mungu werhu okuhabwa obukuze, obukenge n’emisi, bulala we walemaga ebintu byoshi, n’oku bulonza bwawe byabereho byana lemwa.” “Mulemi” k’okuderha gurhe? Oku Yehova ye walemaga byoshi; bamalayika, enyenyezi, amalehe, enyama n’ebindi byoshi!

18. Bulagurhe baguma banawaza oku ntako bakaba bera ba Mungu? Na bichi Ebiblia ederhere kw’echola chibazo?

¹⁸ Eyi baguma basoma oku bilolere oborhere bwa Yehova, banachibwira ntya: ‘Mungu ali we misi bwenene, mukulu bwenene, anali hale bwenene. Gurhe akaj’andagako?’ Yehova asimire owaze ntyo si? Nanga! Asimire abe mwira wawe. Asimire akuyegere. Ebiblia ederhere okw’arhali “hale nerhu.” (Matendo 17:27) Anasimire omuyegere. Alaganyize oku okamuyegera, “naye akuyegera.”​—Yakobo 4:8.

19. a) Gurhe wakaba mwira wa Mungu? b) Borhere buhe bwa Mungu onasima bwenene?

¹⁹ Gurhe wakaba mwira wa Mungu? Yesu aliderhere ntya: “Akalamo k’esiku n’amango kakanola: bahikire kukumenya woyo, Mungu muguma w’okuli, n’olala warhumaga, Yesu Kristu.” (Yohana 17:3) Ogenderere okuyiga eju ya Yehova na Yesu Kristu. Nji wanabona akalamo k’esiku n’amango; k’okuderha, kulama esiku zoshi. Wamalire kumenya oku “Mungu buba buzigire.” (1 Yohana 4:16) S’aliko ajira obwindi borhere. Ebiblia ederhere oku aba “mubabale, Arhagaya juba-juba, anaba ayunjulirene obwinja b’omurhima n’okunali.” (Kutoka 34:6) Aba “mwinja, anababalira juba-juba.” (Zaburi 86:5) Alembera anaba mwimana. (2 Petro 3:9; Ufunuo 15:4) Y’omenya binene eju ya Mungu n’oborhere bwage, ogenderere okuyiga Ebiblia.

20, 21. Gurhe wakaba mwira wa Mungu chiro akaba orhamubonako?

²⁰ Gurhe wakaba mwira wa Mungu chiro akaba orhamubonako? (Yohana 1:18; 4:24; 1 Timoteo 1:17) Ogenderere okuyiga Ebiblia y’omenya Mungu  bwinja. (Zaburi 27:4; Waroma 1:20) N’ok’oliwagenderera okuyiga binene eju ya Mungu, ku wanamusima n’obwira bwawe haguma naye bwakomera bwenene.

²¹ Nji wamenya oku Yehova ali Darha; arhuhere obuguma-guma, anasimire rhupate akalamo kenja. (Matayo 6:9) Ku buli muzere osima abana bage anaba. (Zaburi 36:9) Ebiblia eyigirize oku wakaba mwira Mungu. (Yakobo 2:23) Yehova, Mulemi w’ebintu byoshi, asimire obe mwira wage!

22. Gurhe wakajira nk’abantu baguma balonzenze ok’orhachiyigaga Ebiblia?

²² Bantu baguma bakasima oleke kuyiga Ebiblia. Nkabaga bana yubaha oku warhenga omu dini lyawe. S’aliko, omenye wakayemera omuntu n’omuguma arhuma waleka obwira bwawe haguma na Yehova. Yehova ye Mwira mwinja okwanene kugwarha.

23, 24. a) Bulagurhe okwanene okugenderera kubaza ebibazo? b) Bichi esura ya 2 yaganirira?

²³ Hali biguma orhayunva amango oliwayiga Ebiblia. S’aliko omenye eshoni zarhuma orhabaza changwa orhahema oburhabale. Yesu aderhaga oku rhukwanene okuba kuguma n’abana badorho. (Matayo 18:2-4) Abana barhayunva burhe amango balibabaza ebibazo. Mungu asimire opate ebishubizo. K’okuderha ok’oyige Ebiblia na murhima muguma y’omenya akaba eby’oliwayiga bili by’okuli.​—Osome Matendo 17:11.

²⁴ Okuyiga Ebiblia, ye njira nyinja y’okumenya Yehova. Omu sura ya kabiri, wamenya bulagurhe Ebiblia erhali kuguma n’ebindi bitabu.