1, 2. Oderhe amazino m’abera baguma ba Yehova.

INDE wakasima abe mwira wawe? Ali muntu osimire bwenene n’olala muyunvikana naye bwinja. Kandi, ali muntu oherhe obumuntu n’oborhere onasima.

² Yehova anachishoga bantu baguma babe bera bage. Omufano, Abrahamu aliri mwira wa Yehova. (Isaya 41:8; Yakobo 2:23) Yehova alisimire na Daudi. Aliderhere oku Daudi aliri “muntu okola nk’oku asimire.” (Matendo 13:22) N’omulebi Daniyeli aliri muntu “w’akachiro” omu masu ma Yehova.​—Danieli 9:23.

3. Bulagurhe Abrahamu, Daudi na Daniyeli baliri bera ba Yehova?

³ Gurhe Abrahamu, Daudi na Daniyeli babaga bera ba Yehova? Yehova alibwirire Abrahamu ntya: “Waliyunvirize omulenge gwani.” (Mwanzo 22:18) Yehova aba mwira wa balala bachiheba eshishi n’okumukenga. Akanaba mwira w’eshanja lyoshi. Alibwirire abaizraeli ntya: “Munkenge, nantyo, nani nji naba Mungu wenyu, nenyu nji mwaba lubaga lwani.” (Yeremia 7:23) Akaba kweri osimire obe mwira wa Yehova, okwanene omukenge.

4, 5. Gurhe Yehova anarhabala bera bage?

⁴ Ebiblia ederhere oku Yehova analonza enjira z’okulanga abantu bamusima n’omurhima gwabo goshi. (2 Mambo ya Nyakati 16:9) Omu lwandiko lwe Zaburi 32:8 Yehova alaganyize bera bage ntya: “Nji nakuha oburhegeezi  n’okukuyigiriza enjira okwanene kulambagiramo. Nakuhanula, ey’esu lyani lili lyakulola.”

⁵ Rhuherhe omushombanyi oherhe emisi orhanalonzeze okurhube bera ba Mungu. Aliko, Yehova asimire okurhulanga. (Osome Zaburi 55:22.) Rhunamukolera n’omurhima gwerhu goshi, bulala rhuba bera bage. Chiro akaba rhuli omu bibazo, rhunabera bimana embere zage. Rhunayemerere bwinja oku arhurhabala kuguma na Daudi, wayandikaga ntya oku bimulolere: “Bulala oli omu kulyo kwani, ntakadundwa [ntakarhoga].” (Zaburi 16:8; 63:8) Bichi Shetani anakola yi rhurhachiba bera ba Mungu?

6. Bichi Shetani ashobekere kw’abantu?

⁶ Omu sura ye 11, rhwayigire oku Shetani alishobekere (alisidakire) Yehova oku ali mubeshi. N’okubona oku Yehova arhalilekere Adamu na Eva bachishoge bowe bonyine echinja n’echibi, Shetani amushobeka oku arhali w’okunali. Echitabu cha Yubu chirhuyigirize oku Shetani anashobeka abantu balonzeze kuba bera ba Mungu. Shetani anaderha oku banakolera Mungu bulala hali echintu abaha, s’arhali bulala bamusimire. Anashuba kuderha oku akagala kujira buli yeshi aleke kukolera Mungu. Rhulolage gurhe Yehova alilangire Yubu n’ebi rhwakayiga kugerera ebyalimuhikire.

7, 8. a) Gurhe Yehova akazaga bona Yubu? b) Bichi Shetani aliderhere eju ya Yubu?

⁷ Yubu aliri nde? Aliri muntu mwinja walilamire hamagera myaka 3 600. Yehova aliderhere oku nta muntu waliri kuguma naye oku gulu mw’echola chihe. Yubu akazaga kenga Yehova bwenene, anakazaga kugaya ebibi. (Yobu 1:8) Okuderha okuli, aliri mwira wa Mungu.

 ⁸ S’aliko, Shetani aderha oku Yubu aliri akolera Mungu bulala hali ebintu alimuhere. Abwira Yehova ntya: “K’orhamuzirhiraga yewe n’enju yage na buli chintu aherhe? Wagishire akasi k’efune zage n’ebirhungano byage byayololokere omu chihugo. Y’ebintu bihindamuka, olambule efune yawe, oshurhe buli chintu aherhe, wabona oku akuvuma embere y’amasu mawe.”​—Yobu 1:10, 11.

9. Bichi Yehova alilekere Shetani akole?

⁹ Shetani alishobekere Yubu oku anakolera Yehova bulala anamugisha. Shetani anashuba kuderha oku akajirire okw’agalire koshi yi Yubu aleka kukolera Mungu. Yehova arhaliyemerere ebi Shetani aderhaga. S’aliko, alimulekere ageregeze Yubu. Ebyola byakayerekene akaba kubinali Yubu anasima Yehova.

10. a) Gurhe Shetani alirherere Yubu? b) Gurhe Yubu alijirire?

¹⁰ Ech’oburhanzi, Shetani alijirire okuntu y’ebirhungano bya Yubu byoshi biyibwa changwa biyirhwe. Kandi, ayirha banene omu bakozi bage. Yubu aheza buli chintu choshi. N’okubuzinda, Shetani akolesa omuyaga, gwayirha bana bage 10. Yubu aliyorhere mwimana chiro akaba ebyola byoshi. Arhachigeraga kushobeka Mungu oku amujirire echintu chibi.​—Yobu 1:12-19, 22.

11. a) Gurhe Shetani alishubire kurhera Yubu? b) Gurhe Yubu alijirire?

¹¹ Shetani arhalekeraga ahola. Ageregeza Mungu omu kumubwira ntya oku bilolere Yubu: “Ohume kugera oku gufa lyage n’omubiri gwage, wabona oku akuvuma.” (Yobu 2:5, 7) Nantyo, Shetani amulwaza. Chiro akaba obola bulwala bw’amalumwa manene, Yubu aligenderere kubera mwimana embere za Yehova. Aliderhere oku agenderera kuyorha mwimana kugera amango afa.​—Yobu 27:5.

12. Gurhe Yubu aliyerekene oku Shetani ali mubeshi?

 ¹² Ntacho Yubu alimenyere oku bi Shetani ashobekaga, arhanalimenyere bulagurhe ali alibuka ntyo. Aliri awaza oku ebyola bibazo byaliri byarhenga emwa Yehova. (Yobu 6:4; 16:11-14) Aliko, anagenderera kubera mwimana embere zage. Kurhangira ahola, harhachibaga engangane; Yubu arhaliri akolera Yehova bulala hali ebyamuha. Aliri mwira wa Mungu bulala alimusimire. Ebi Shetani ashobekaga byoshi byaliri bya bubeshi!

13. Bichi obwimana bwa Yubu bwalimulerhere?

¹³ Chiro akaba Yubu arhalimenyere ebyaliri byajirika omu mbingu, aliyorhere mwimana embere za Mungu, anayerekana oku Shetani ali mubi. Yehova aligishire mwira wage bulala aliyorhere mwimana.—Yobu 42:12-17.

14, 15. Bichi Shetani anashobekera kw’abantu boshi?

¹⁴ Ebyalihikire Yubu byakarhuyigiriza bintu binene by’akamaro. Zene, Shetani ali arhushobeka oku rhunakolera Yehova bulala hali echintu akarhuha. Shetani aliderhere ntya omu mango ma Yubu: “Buli chintu choshi omuntu aherhe nj’achigurana obuguma-guma bwage.” (Yobu 2:4) Shetani arhashobekaga Yubu yenyine; ashobekere oku abantu boshi banakolera Yehova bulala hali echabaha. Myaka minene Yubu afire, Shetani agenderera kuduka Yehova n’okushobeka abakozi bage. Ebirhuyemezeze bili omu lwandiko lwa Mezali 27:11, aha Mungu aderhere ntya: “Mwana wani, okole n’obwenge, n’okusimisa omurhima gwani, yi mbona oku nashubiza oli wampalalira.”

¹⁵ Wakachishoga okukenga Yehova, okuba mwira wage n’okubera mwimana embere zage. Nantyo, wanayerekana oku Shetani ali mubeshi. Chiro akaba oku hali binene wahindamula y’oba mwira wa Mungu, echola che  chintu ch’akamaro bwenene wakachishoga okukola. Shetani anaderha oku amango oherhe ebibazo, orhakayorha mwimana embere za Mungu. Njira zichi anakolesa okubunene, y’ahigirira kurhushumika rhuvune obwimana bwerhu haguma na Mungu?

16. a) Njira zihe Shetani anakolesa omu kubuza abantu barhakoleraga Yehova? b) Gurhe Ibilisi akahiga okukubuza oleke okukolera Yehova?

¹⁶ Shetani anakolesa njira zinene omu kuvuna obwira bwerhu haguma na Mungu. Anarhurhera “kuguma na nyalukala oli waluluma” y’arhushashanyula. (1 Petro 5:8) Orhasomerhwaga okubona bera bawe, abantu b’omulala gwawe changwa abandi bantu bakahiga okukubuza okuyiga Ebiblia n’okukola ebintu binja. Nkabaga wakachiyunva obulire “omurhula.” * (Yohana 15:19, 20) Ahanene, Shetani anachihindamula mu “malaika w’obumoleke,” omu kuhigirira arhushumike rhuleke okukenga Yehova. (2 Wakorinto 11:14) N’oku buzinda, anarhujira rhuwaze oku rhurhakwanene embere za Yehova yi rhuleka okumukolera.​—Mezali 24:10.

17. Bichi birhurhabala okukenga Yehova?

¹⁷ Omu kukenga Yehova, rhwayerekana oku Shetani ali mubeshi. Bichi byarhurhabala rhumukenge? Ebiblia ederhere ntya: “Okwanene osime Mungu wawe n’omurhima gwawe goshi, n’obuguma-guma bwawe boshi, n’emisi yawe yoshi.” (Kumbukumbu la Torati 6:5) Rhunakenga Yehova bulala rhumusima. N’oku rhuli  rhwagenderera kumusima, kurhwanagenderera kuba n’enyorha y’okukola eby’arhuhemere. Entumwa Yohana yaliyandikire ntya: “Okuzigira Mungu k’okuderha, oku rhukenge amarhegeko mage. N’amarhegeko mage marhalemerere.”​—1 Yohana 5:3.

18, 19. a) Bintu bihe Yehova aderhere oku bili bibi? b) Gurhe rhumenyere oku Yehova arharhuhemere rhukole ebintu rhurhakagala?

¹⁸ Bintu bihe Yehova aderhere oku bili bibi? Echisanduku chiherhe erhwe liderhere “ Ogaye ebi Yehova anagaya” chiderhere biguma mubyo. Oku murhondero, nkabaga wakawaza oku biguma mw’ebyola bintu birhavire byakomera. S’aliko, osome amandiko mayerekenwe, onarhole ebisanzi by’okumawazako. Wanamenyerera oku bili by’obwenge okukenga amarhegeko ma Yehova. N’oku buzinda, nkabaga wanabona oku wakahindamukire omu kalamo kawe. Okajira ntyo, wagwarha omurhula  n’obusime abera ba Mungu banayunva. (Isaya 48:17, 18) Bichi byakarhuyemeza oku rhwakagala kuhindamula akalamo kerhu, chiro akaba birhayolohere?

¹⁹ Yehova arharhuhemere rhukole ebintu rhurhakagala. (Kumbukumbu la Torati 30:11-14) Ali mwira mwinja anarhumenyere kulusha nk’okurhuchimenyere. Ab’amenyere oborhere bwerhu bwinja n’obufe bwerhu. (Zaburi 103:14) Entumwa Paulo erhuhebere omurhima ntya: “Mungu aba mwimana, arhakanayemera mwageregezwa kurhalusa oku mwakagala kulembera, n’amango echigeregezo chamabaho, anarheganya enjira y’okurhengerera yi mugala kuchilembera.” (1 Wakorinto 10:13) Rhwakayemera oku Yehova arhuha emisi y’okugenderera kukola ebinja. Nj’akuha “emisi erhalwise ey’oherhe,” k’okuderha, emisi yakurhabala olembere ebibazo bikomere. (2 Wakorinto 4:7) Paulo alibwene oburhabale bwa Yehova amango aliri omu bibazo. Che charhumaga  aderha ntya: “Ingwerhe emisi kugerera olala onampa emisi.”​—Wafilipi 4:13.

20. Borhere buhe rhukwanene okugwarha? Na bulagurhe?

²⁰ Y’oba mwira wa Yehova, bihemere oleke okukola ebintu anagaya. Aliko arhali ebyola byonyine birhwakakola. (Waroma 12:9) Abera ba Mungu banasima ebi Mungu asima. Biyerekenwe omu lwandiko lwe Zaburi 15:1-5. (Osome.) Banayiganya Yehova omu kugwarha “obuzigire, obusime, omurhula, okulindira, olukogo, obwinja b’omurhima, obwemere, obwirhonzi n’okuchigala.”​—Wagalatia 5:22, 23.

21. Bichi byakakurhabala ogenderere okukuza oborhere Mungu asima?

²¹ Bichi byakakurhabala ogwarhe obola borhere? Okwanene omenye ebi Yehova asima omu kusoma n’okuyiga Ebiblia buli lusiku (oku kahunda). (Isaya 30:20, 21) Okajira ebyola, wanashuba sima Yehova bwenene. N’okoli wamusima bwenene, kuwanagwarha enyorha y’okumukenga.

22. Bichi nji wabona omu kukenga Yehova?

²² Okuhindamuka omu kalamo kerhu, kuli kuguma n’okuwakahogola emyambaro eshajire, n’okuyambala emyambaro mihyahya. Ebiblia ederhere oku rhukwanene okuhogola “obumuntu bwa mira” n’okuyambala “obumuntu buhyahya.” (Wakolosai 3:9, 10) Chiro akaba birhayolohere, rhukahindamuka ntyo na rhukakenga Yehova, nj’arhuha “migisho minene.” (Zaburi 19:11) By’analaganyize. Ochishoge okukenga Yehova n’okuyerekana oku Shetani ali mubeshi! Okolere Yehova bulala omusimire, s’aliko arhali okuba nj’akugisha. Nantyo, wanaba mwira wa Mungu!