1, 2. a) Okumenya ezino ly’omuntu omenyikene konyine, k’okumumenya bwinja si? Oderhe nka gurhe. b) Bichi abantu banaderha kuyerekera Yesu?

OMU gulu mubonekene bantu banene bamenyikene. Nkabaga wakamenya ezino ly’omuntu muguma omenyikene. S’aliko, arhali okuba omenyere ezino lyage, k’okumumenya bwinja. Binene orhamenyere eju y’akalamo kage, orhanamenyere aba muntu muchi.

² Hamagera myaka 2 000, Yesu Kristu alamire oku gulu; (olole amahugulo me 12, bukurasa bwa 211). Wachigerere kuyunva baderha kumuyerekera. S’aliko bantu banene barhenji aliri nde. N’abandi banaderha okw’aliri muntu mwinja konyine. Abandi banaderha okw’aliri mulebi. Kandi abandi banawaza okw’aba Mungu. Nawe si, gurhe onawaza?

3. Bulagurhe bili by’akamaro omenye Yehova na Yesu?

³ Okumenya okunali eju ya Yesu, kuherhe akamaro. Bulagurhe? Ebiblia eshubize ntya: “Akalamo k’esiku n’amango k’akanola; bagenderere kukumenya woyo, Mungu muguma w’okuli, n’olala warhumaga Yesu kristu.” (Yohana 17:3) Okamenya okuli eju ya Yehova na Yesu, nji wanalama esiku n’amango uku gulu omu Paradizo. (Yohana 14:6) Kandi, okumenya Yesu kukuherhere akamaro mu zinola siku. Yesu alirhuyerekere gurhe rhwakalama, na gurhe rhwakajirira abandi. Anali  lwiganyo lwinja l’okuyiga. (Yohana 13:34, 35) Omu sura yo 1, rhwayigire okuli eju ya Mungu. Mw’enola yindi, rhwayiga ebye Biblia eyigirize eju ya Yesu.

4. “Masiya” na “Kristu,” k’okuderha gurhe?

⁴ Yehova ali alaganyize oku akarhumire Masiya changwa Kristu oku gulu, myaka minene embere Yesu aburhwe. “Masiya” chili chinwa chirhengerere omu lulimi lw’echiebraniya na “Kristu” chili chinwa chirhengerere omu lulimi lw’echigiriki. Amala mazino k’okuderha “mushigwa,” k’okuderha olala Mungu achishogere akole akasi karhakakolwa na buliyeshi. Kugerera Masiya, ebilagane bya Yehova byoshi nji byayenera.

5. Abanafunzi ba Yesu baliyemerere oku ali Masiya si?

⁵ Abanafunzi ba Yesu, baliyemerere oku Yesu ali Masiya. (Yohana 1:41) Omufano, entumwa Petro yamubwiraga ntya: “Oli Kristu.” (Matayo 16:16) Gurhe nerhu rhwakayemera oku Yesu ali Masiya?

6. Gurhe Yehova arhabere abantu b’emirhima minja okumenya Masiya?

⁶ Embere Yesu aburhwe, abalebi ba Mungu balibere baderha binene eju ya Masiya, y’abantu nji bamumenya. Rhurhole omufano: Bakubwire ok’oje kulinga omuntu orhasaga kubonako oku poro wala oku parkinge. Nka bakubwirire bwinja gurhe oyola muntu ali, wakamumenya. Konakuguma, Yehova alikoleseze abalebi bage, yi rhumenya oku bunene ebi Masiya akakolere n’ebyaka muhikire. Okuyenezwa kw’amola malebi moshi, kwarhabere abantu b’emirhima minja, okuyemera oku Yesu ali Masiya.

7. Oderhe malebi mabiri (2) mayerekene oku Yesu ali Masiya.

 ⁷ Rhulolage malebi mabiri (2) maganirire eju ya Masiya: 1) Omulebi Mika alimenyeseze embere ya myaka 700, oku Masiya akaburhirwe omu vile ngeke ye Betelehemu. (Mika 5:2) N’omola mu Yesu anaburhirwaga! (Matayo 2:1, 3-9) 2) Omulebi Daniyeli alimenyeseze oku Masiya akayinjire omu mwaka gwa 29. (Danieli 9:25); (olole amahugulo me 13, bukurasa bwa 211). Kuguma n’amandi malebi, amola mabiri (2) mayerekene oku Yesu ali Masiya walaganywaga.

8, 9. Amango Yesu abatizwa, gurhe byalibere? Na bichi ebyola biyerekene?

⁸ Yehova arhuyerekere bwinja oku Yesu ali Masiya. Alilaganyize Yohana mubatiza oku nj’amuyereka echimenyeso ch’okumenya Masiya. Amango m’okubatizwa kwa Yesu, Yohana abona echola chimenyeso. Omu mwaka gwa 29, Yesu abwira Yohana amubatize omu lwinji lunene, Yordani. Ebiblia erhubwirire ebyaligerere olola lusiku: “Enyuma y’okubatizwa na Yohana, Yesu ayubuluka omu menji; n’ahola, abona embingu zafunguka, na Yohana abona Eroho lya Mungu lyayandagala omu shusho ly’enguuku, lyayinja lyaja enyanya za Yesu. Abona! Haba [. . .] omulenge gurhengerere embingu guderhere ntya: ‘Oyula ali Mwana wani, muzigirwa nyemerere.’” (Matayo 3:16, 17) Amango Yohana ayunvaga n’okubona echola chimenyeso, ayemera oku Yesu aliri Masiya. (Yohana 1:32-34) Olola lusiku, amango  Yehova ayandagazaga Eroho lyage ku Yesu, Yesu aba Masiya. Aliri olala Yehova alichishogere oku abe Muhabuzi na Mwami.​—Isaya 55:4.

⁹ Amalebi Yehova alilebere omu Biblia, eby’aderhaga n’echimenyeso ahanaga amango Yesu abatizwa, biyerekene oku Yesu ali Masiya. Aliko si, ngahe Yesu arhengaga? Aliri muntu muchi? Rhulole ebye Biblia ederhere.

10. Ngahe Yesu alilamire embere ayinje oku gulu?

¹⁰ Ebiblia eyigirize okw’embere Yesu ayinje oku gulu, abaga alamire myaka minene omu mbingu. Mika aderhaga oku Masiya aliriho “kurhenga ebihe bya mira.” (Mika 5:2) Kandi Yesu aliderhere kanene, oku alilamire omu mbingu embere abe mwene omuntu kunola gulu. (Osome Yohana 3:13; 6:38, 62; 17:4, 5.) Embere Yesu agere oku gulu alilamire na Yehova, okola kulama haguma, kwarhuma obwira bwabo bwakomera.

11. Bulagurhe Yehova asima Yesu bwenene?

¹¹ Yehova asima Yesu bwenene bulala y’arhangaga kulema. Che chirhuma Yesu ayirikwa “muburhwa murhanzi w’ebilemwa byoshi.” (Wakolosai 1:15) Okubwindi, Yehova asima Yesu bwenene bulala yenyine y’alemaga oku maboko mage. Che chirhuma Yesu ayirikwa “Mwana w’echinege.” * (Yohana 3:16) Kandi, Yesu yenyine yi Yehova akolesaga omu kulema ebindi bintu byoshi. (Wakolosai 1:16) Yenyine ye yirikirwe “Kanwa.” Ayirikirwe ntyo, bulala yi Yehova akolesaga omu kuheka oburhumwa n’enyigirizo oku bamalayika n’oku bantu.​—Yohana 1:14.

12. Nka gurhe rhumenyere oku Yesu na Mungu, barhali muntu muguma?

¹² Bantu baguma banawaza oku Yesu na Mungu baba muntu muguma; (olole amahugulo me 14, bukurasa bwa 213). S’aliko arhali ntyo kwe Biblia eyigirize.  Ederhere oku Yesu alemwaga. Biyerekene oku aherhe omurhondero. S’aliko Mungu walemaga byoshi arhajira murhondero. (Zaburi 90:2) Yesu Mwana wa Mungu, arhageraga pima kuchiheba ahali h’eshe. Nk’oku Ebiblia ederhere, Darha ali mukulu kulusha Omugala. (Osome Yohana 14:28; 1 Wakorinto 11:3.) Yehova yenyine ye “Mungu Ogala Byoshi.” (Mwanzo 17:1) Ali muntu w’akamaro bwenene, na munya misi oku gulu.

13. Bulagurhe Ebiblia eyirikire Yesu “shusho lya Mungu orhabonekana”?

¹³ Yehova na Yesu bakolere haguma emiliyare y’emyaka, embere embingu n’egulu bilemwe. Amola mango, obuzigire bwabo bwagenderera kukula, banasimana bwenene! (Yohana 3:35; 14:31) Yesu aliyiganyize bwinja engeso z’Eshe, che chirhumire Ebiblia emuyirikire “shusho lya Mungu orhabonekana.”​—Wakolosai 1:15.

14. Gurhe Yesu ayinjaga kuba mwene omuntu?

¹⁴ Yesu aliyemerere okurhenga omu mbigu, ayinja kuba mwene omuntu. Nka gurhe byagalikanaga? Yehova ajira echisomerene; ahamisa obuguma-guma b’Omugala omunda y’omubikira oyirikirwe Mariya. Biyerekene oku Yesu arh’alilagirire bwenene okugwarhwa eshe w’omwene omuntu. Mariya aburha omwana oshinganene. Amuyirika Yesu.​—Luka 1:30-35.

15. Gurhe wakamenya Yehova bwinja?

¹⁵ Matayo, Marko, Luka na Yohana, biyirikwa bitabu bye Injili. Omu kubisoma, wamenya binene eju ya Yesu, akalamo kage n’oborhere bwage. Yesu aliderhere ntya: “Owambwene ey’anabwene Darha.” (Yohana 14:9) Yesu aderhaga ntyo, bulala alishushire Eshe  bwenene. Ebi wasoma oku bilolere Yesu byakurhabala omenye Yehova bwinja.

16. a) Bichi Yesu aliyigirize? b) Ebi Yesu aliri ayigiriza, ngahe byaliri byarhenga?

¹⁶ Bantu banene bakazaga yirika Yesu “Mwalimu.” (Yohana 1:38; 13:13) “Emyazi minja y’Obwami,” eli omu biguma by’akamaro Yesu aliyigirize. Obola Bwami che chichi? Buli burhegesi buli embingu, Mungu nj’akolesa omu kurhegeka egulu. Obola burhegesi, nji bwalerhera balala bali bakenga Mungu ebinja. (Matayo 4:23) Byoshi Yesu aliri ayigiriza byaliri byarhenga emwa Yehova. Yesu aliderhere ntya: “Eb’indi nayigiriza birhali byani, s’aliko by’olala wantumaga.” (Yohana 7:16) Alimenyere oku Yehova asimire abantu bayunve gunola mwazi gwinja guderhere ntya: Obwami bwa Mungu nji bwarhegeka egulu.

17. a) Ngahe Yesu akazaga kuyigiriza? b) Bichi byarhumaga Yesu achihangana omu kuyigiriza abantu?

¹⁷ Ngahe Yesu akazaga yigiriza? Ngasi hoshi abuganire abantu: emwababo, omu mavile, omu lugo, omu masoko n’ahantu h’okuharamiza. Arhakazaga lindira abantu bamushimane ah’ayikere. Oku bunene akazaga bashimba emunda bali. (Marko 6:56; Luka 19:5, 6) Yesu alijirire okw’agalire koshi y’abayigiriza. Analigezeze bisanzi binene omu kuhubiri. Bulagurhe? Bulala alimenyere oku bi Yehova asimire na bulala akazaga kenga Eshe. (Yohana 8:28, 29) Kandi, bulala aliherhe olukogo oku bantu, che chakazaga rhuma aja kubayigiriza. (Osome Matayo 9:35, 36.) Aliri abona okw’abakulu b’amadini barhaliri bayigiriza okuli oku bilolere Mungu n’Obwami bwage. Analilonzeze abantu banene bayunve omwazi gwinja.

18. Borhere buhe bwa Yesu bukusimisize bwenenene?

 ¹⁸ Yesu akazaga sima abantu n’oku bahangayikira. Aliri mwirhonzi, birhanalikomere okumuyegera. Chiro n’abana badorho bakazaga sima okuba haguma naye. (Marko 10:13-16) Yesu aliri akola omu kunali esiku zoshi. Akazaga gaya ebituliyo n’omulyagane. (Matayo 21:12, 13) Amango mage, abakazi barhakazaga kengwa, barhanaliherhe ech’okuderha. S’aliko Yesu akazaga bakenga esiku zoshi. (Yohana 4:9, 27) Yesu akazaga kuchihiba eshishi. Omufano, golo liguma ashuka entumwa zage amagulu. N’obola kaliri kasi k’abaja.​—Yohana 13:2-5, 12-17.

19. Mufano guhe guyerekene oku Yesu alilonzeze okurhabala abantu?

¹⁹ Yesu alimenyere eby’abantu balikenere, analilonzeze okubarhabala. Ebyola byalibonekene amango alemaga akolesa emisi ya Mungu omu kubafumya. (Matayo 14:14) Omufano, lusiku luguma omubenzi-benzi abwira Yesu ntya: “Akaba olonzeze, wakanfumya.” Omu kubona gurhe ahangayikire, amuyunvira obonjo analonza okw’amurhabale. Amuhumako, anamubwira ntya: “Imbi lonzeze. Ofume.” N’oyola mubenzi-benzi afuma! (Marko 1:40-42) Wakaba nka wawaza gurhe alichiyunvirhe si?

20, 21. Bichi byakarhuma rhwaderha oku Yesu luli lwiganyo lwinja bwenene l’okukenga Mungu?

²⁰ Yesu luli lwiganyo lwinja l’okukenga Mungu. N’amango aliri omu bihe bikomere changwa amango abashombanyi bage baliri bamujira kubi, aliyorhere mwimana embere z’Eshe. Omufano, amango ageregezwaga  na Shetani, arhakolaga echaha. (Matayo 4:1-11) Omu mulala gwage, mwaliri baguma barhaliyemerere okw’aliri Masiya. Balema baderha okw’asirehere. S’aliko, Yesu agenderera kujira ebi Mungu asimire. (Marko 3:21) Amango abashombanyi bage baliri bamulibuza, aliyorhere mwimana embere za Mungu, arhanabajiraga kubi.​—1 Petro 2:21-23.

²¹ Embere Yesu afe, alilibukire bwenene. S’aliko ayorha mwimana embere za Yehova. (Osome Wafilipi 2:8.) Owaze oku byoshi alilembere olusiku l’okufa kwage. Alishwekerwe, n’abantu bamubeshera okw’asuzagwire Mungu. Bahemba abazuzi yi bamuhana. Bantu banene bamushekera. Abasoda bamulibuza bwenene, banamubamba oku murhi. Embere afe, ayama ntya  oku mulenge: “Byamayenera!” (Yohana 19:30) S’aliko, enyuma wa siku esharhu (3), Yehova afula Yesu anamuha omubiri gw’eroho, k’okuderha omubiri guli nka gwa bamalayika. (1 Petro 3:18) Enyuma y’amaboso mageke, Yesu agaluka embingu “anayikala omu kulyo kwa Mungu.” Nantyo alinga gurhe Mungu amujira Mwami.​—Waebrania 10:12, 13.

22. Bulala Yesu aliyorhere mwimana embere z’Eshe, bushobozi buhe rhuherhe mu zinola siku?

²² Bulala Yesu aliyorhere mwimana embere z’Eshe, rhuherhe obushobozi b’okulama esiku n’amango omu Paradizo oku gulu. Ku Yehova alonzeze. Omu sura ekulikireho, nji rhwabona bulagurhe olufu lwa Yesu lurhuhere obushobozi b’okulama esiku n’amango.