“Mwalikwanene kuba balimu.” (Ebr. 5:12) Ba nka wawaza! Yehova​—omwalimu mwinja bwenene omu mahanga moshi—​ali arhuhamagala rhwabo rhuyigirize abandi oku bimulolere! Engabane Yoshi rhwakahaabwa y’okuyigiriza abandi oku bilolere Yehova​—omu mulala, omu chibaga, changwa omu mahubiri—​luli lukengo lunene bwenene, kanali kasi kalemerere. Gurhe si rhwakaja rhwagala kukakola?

Echishubizo chili omu binwa entumwa Paulo ayandikiraga Timoteo: “Ochihanganire okusoma embere z’abantu, okuhira abandi omurhima, n’okuyigiriza.” Paulo ashuba kuyongera: “Omu kujira ntyo wachichungula woyo wenyine n’abali bakuyunviriza.” (1 Ti. 4:13, 16) Oherhe oburhumwa b’okuchungula abandi bikuhemere obabwire. Che chirhumire chili chintu ch’akamaro bwenene okuchihangana ojire amajambere menja omu kuntu onasoma n’okuyigiriza. Enola bronshire erheganyizwe yekugwasa kujira ntyo. Ba nka walola bugeke gurhe ekolerwe.

Yehova ye “Mwigiriza Mukulu.” (Isa. 30:20) Chiro akaba oku kanola katabu kakurhabala ogwarhe amayeri manene omu kusoma n’okuyigiriza, orhahira okayibagira k’oburhumwa bwerhu buba burhengere emwa Yehova, na yewe yenyine yenakulula abantu emund’ali. (Yoh. 6:44) Chechirhumire, amango moshi ogende wahema eroho lichesibwa omu sala. Okolese Echinwa cha Mungu kanene-kanene. Ogende waseza obwenge bwawe n’obwabandi ku Yehova s’arhali ku woyo wenyine. Olwise omu kuntu okuze obuzigire bunene ku Yehova, omu mirhima y’abonviriza bawe.

Wahamagerwe nawe oyigirize oburhumwa bw’akamaro bwenene kulusha obwindi boshi abantu bachigerere kuhaabwa. Rhuchizerere k’okagenderera kulangalira “emisi Mungu anahaana,” wagala.​—1 Pet. 4:11.

Rhwabo benyu balimu,

Baraza Lirhambwire ly’Abahamirizi ba Yehova