SOMO LYE 11

Gurhe Wakayunguka Bwenene n’Obusomi Bwawe bwe Biblia

ZIHA

Wachigerere kuyunva ohwererwe omu kuwaza gurhe warhondera akasi kazibu-zibu si? Y’omala echola chibazo, wakakagabamo omu kuntu okakole ebigabi-bigabi biyorohere. Intyo ku binali oku bilolere okusoma Ebiblia nayo. Hali okuwakachibaza, ‘Ngahe narhonderera?’ Mu linola somo, rhwabona njira ziguma ziyorohere wakakolesa zakakurhabala oshagalukire okusoma n’okuyiga Ebiblia.

1. Bulagurhe rhukwanene kusoma Ebiblia oku kahunda?

Omuntu onasoma Ebiblia oku kahunda, changwa “erhegeko lya Yehova,” agwarha obusime n’okuyungukirwa. (Osome Zaburi 1:1-3.) Omu kurhondera, opime kurhanga yinja warhola chiro miniti migeke y’okusoma buli lusiku. Ok’oli wamenya Echinwa cha Mungu, ku wanayunva oshagalukiire obusomi bwawe bwe Biblia.

2. Bichi byakurhabala y’oyunguka n’obusomi bwawe bwe Biblia?

Yirhuyunguka n’obusomi bwerhu bwe Biblia, bihemere rhwanayinja rhwarhanga kuyimanga, rhwanawaza okubirhuli rhwasoma. Rhukwanene rhubisome ‘rhunabikengeere ko.’ (Yoshua 1:8, amahugulo m’eshishi) Ok’oli wasoma, ochibaze ebibazo nka: ‘Bichi ebila binyigirize oku bilolere Yehova Mungu? Gurhe nakabikolesa omu kalamo kani? Gurhe nakakolesa amala mandiko omu kurhabala abandi?’

3. Gurhe wakabona ebisanzi by’okusoma Ebiblia?

Ka binakukomerera okubona ebisanzi by’okusoma Ebiblia? Binabeera banene mu rhwewe ntyo. Ochihangane “kukolesa ebisanzi byawe bwinja.” (Waefeso 5:16) Wakajira ntyo omu kuchihebera h’akasanzi kamenyikene k’okusoma Ebiblia buli lusiku. Bantu baguma banarhola akasanzi k’okusoma Ebiblia emiseke. Abandi banarhola akasanzi k’ezuba, nkabaga amango m’okulya akalyo k’ezuba. Hali n’abandi banasoma Ebiblia ebudufu embere balyame. Woyo si, kasanzi kahe kakakubeera kenja?

HUMBA BWENENE

Lolaga gurhe wakajira obusomi bwawe bwe Biblia busimise loshi; na gurhe wakarheganya bwinja omu kuntu efunzo lyawe lye Biblia lijire echi lyakumalira.

Nka kula rhwakanachikoomeza kusima ebilyo rhurhaliyinji, intyo kon’oko kurhwakanachikoomeza kushagalukira kusoma Ebiblia

4. Okuntu wakashagalukira okusoma Ebiblia

Byakaba birhayorohere okurhondera kusoma Ebiblia. Aliko ‘rhwakachikoomeza omu kugenderera’ kuyisoma, nka kulala omuntu analuha ey’anakoomere kulya ebilyo arhaliza lyako. Osome 1 Petro 2:2, muje mwaganira kw’echila chibazo:

Owazize oku nk’ohwanzize kusoma Ebiblia buli lusiku, chakazinda chanaba chintu oshagalukiire, n’okuyinja wakumbula kuyisoma si?

Ziha EVIDEO olole gurhe bantu baguma barhonderaga kushagalukira okusoma Ebiblia. Muje mwaganira kw’ebila bibazo.

VIDEO: Emisole Yiyayiga Kusima Echinwa cha Mungu (5:33)

Mw’eyila video, bibazo bihe emisole enalwisa?
Bichi byabarhabere bagendereze omuhigo gwabo g’okusoma Ebiblia?
Gurhe bajirire y’obusomi bwabo bwe Biblia buba eyi busimisize bwenene?

Tala gurhe wakarhondera:

Ochishoge etafsiri yakachizerwa, enakoleseze olulimi lwa buno. Opime kukolesa e Biblia–Tafsiri ya Ulimwengu Mupya akaba ekala eliho omu lulimi lwawe, awo omu lwindi-lwindi wakayunva bwinja.
Orhangirire oku bigabi obwene bikusimisize bwenene. Y’obona amandi mawazo makakurhabala, osome echigabi “Siimira Okuhwanza Soma Ebiblia.”
Ohebe echimenyeso okubiwamalire kusoma. Okolese echigabi “Obusomi Bwani bwe Biblia” chili mu chinola chitabu.
Okolese e aplikasiyo JW Library^®. Bulala nk’oyiherhe, wakasoma onayunvirize obusomi bwe Biblia hoshi-hoshi wakaba, omu kukolesa etelefone egwerhe obuhashe, changwa echindi-chindi chikoleso.
Okolese apandise zili omu Tafsiri ya Ulimwengu Mupya. Mw’ezola apandise muli amakarte, amafoto, n’emichoro yakajira obusomi bwawe bwe Biblia busimise.

5. Orheganye efunzo lyawe lye Biblia

Osome Zaburi 119:34, muje mwaganira kw’echila chibazo:

Bulagurhe kuli kwinja okusalira embere y’okusoma Ebiblia, awo okurheganya efunzo lyawe lye Bbiblia?

Gurhe wakayunguka bwenene na buli kuyiga? Ok’oli warheganya buli funzo, opime kukulikira ezila mpanulo:

Osome ebifungo (paragraphes) birhanzi by’esomo.
Olonze onasome amandiko, onachihangane kuyunva nka gurhe mafarhene n’eby’oli wayiga.
Osulinye ebinwa bikulu changwa echishubizo cha buli chibazo; okujira ntyo kwakurhabala nj’ogale kuganira na mwalimu wawe bwinja kw’elyola somo.

Walimenyere si?

Abahamirizi ba Yehova bakoleseze etafsiri zinene ze Biblia. Aliko, rhusima ahanene kukolesa e Biblia–Tafsiri ya Ulimwengu Mupya bulala eli m’obukweri boshi, eyunvikene, enakoleseze ezino lya Mungu.—Lola omwazi guli oku jw.org “Abahamirizi ba Yehova Bajira Eyabo Biblia Si?”

HALI ABANTU BANADERHA: “Okuyiga Ebibalia kali kasi kanene. Nta misi na nta bisanzi ngwerhe.”