Yesu aliderhere oku Abakristu bakwanene babatizwe. (Osome Matayo 28:19, 20.) Aliko si obubatizo che chichi? Na bichi omuntu akwanene ajire y’ahikira ogola muhigo?

1. Obubatizo che chichi?

Echinwa “bubatizo” chirhengere oku chinwa che Chigriki chiderhere “kudubika” omu menji. Amango Yesu abatizwa aliyubizwe omu Lwinji lwe Yordani, naho “ayubuluka omu menji.” (Marko 1:9, 10) Konakuguma, Abakristu b’okuli, banabatizwa omu kudubika omuntu yeshi, changwa okumuyubiza omu menji.

2. Bichi obubatizo buba buyerekene?

Ey’omuntu abatizwa, ey’amayerekana oku achihaanire emwa Yehova Mungu. Gurhe omuntu anachihaana? Embere y’obubatizo, omuntu anasalira esala lya yenyine bwihunze, anabwira Yehova oku alonzeze amukolere esiku n’amango. Analaganya Yehova oku yewe yenyine y’akolera, n’okujira obulonza bwage che chaba chintu ch’akamaro bwenene omu kalamo kage. Anachishoga “okuchilahira yewe yenyine . . . n’okugenderera kukulikira” enyigirizo za Yesu n’olwiganyo lwage. (Matayo 16:24) Okola kuchihaana n’okubatizwa kunarhuma omuntu agwarha obwira bwa hofi-hofi na Yehova, n’abandi banamuharamya.

3. Gurhe omuntu akajira y’ahikira obubatizo?

Wakachirheganya oku bubatizo omu kuyiga oku bilolere Yehova n’okukomeza obwemere bwawe muye. (Osome Waebrania 11:6.) Ok’obumenyi n’obwemere bwawe mu Yehova bwagenderera kukula, ku wanamuzigira bwenene. Nta ngangane, wayunva osimire okuhubiri oku bimulolere, n’okulama omu kukulikiza amakanuni mage. (2 Timoteo 4:2; 1 Yohana 5:3) Amango omuntu akala alamire “omu bulyo bukwanene embere za Yehova y’amusimisa loshi-loshi,” ahola ey’akala akachishoga kuhaana akalamo kage emwa Mungu n’okubatizwa.​—Wakolosai 1:9, 10. a

 HUMBA BWENENE

4. Obubatizo bwa Yesu bwakarhuyigiriza

Osome Matayo 3:13-17 oyunve byoshi biderherwe mo oku bilolere obubatizo bwa Yesu; muje mwaganira kw’ebila bibazo:

• Ka Yesu aliri mwana amango abatizwaga?

• Gurhe abatizwaga? Bafaga chakumushukiza amenji si?

Yesu arhonderaga akasi k’akamaro bwenene Mungu alimuhere akole oku gulu, amango abatizwa. Osome Luka 3:21-23 na Yohana 6:38, muje mwaganira kw’echila chibazo:

• Amango Yesu ayusa kubatizwa, kasi kahe alihirire oku fasi y’oburhanzi omu kalamo kage?

5. Obubatizo guli muhigo omuntu akahikira

Ewazo ly’okuchihaana n’okubatizwa lyakarhanga kushusha nka bintu bichubukire omuntu. Chiro akaba ntyo, wakajira amajambere kugera ahawahwanza kuchiyunva nta ngangane zichikulimo, omu kuntu wanagala kuchirhuma kujira echintu ch’akamaro chili nk’echola. Y’obona bantu baguma bajirire ntyo, ziha EVIDEO.

Osome Yohana 17:3 na Yakobo 1:5, muje mwaganira kw’echila chibazo:

• Bichi byakarhabala omuntu abe tayari kubatizwa?

1. Rhunachihaana emwa Yehova omu kumubwira oku rhulonzeze rhumukolere esiku n’amango

2. Oku bubatizo bwerhu rhunayereka abantu boshi bali balola oku rhwachihaanire emwa Mungu

 6. Amango rhwamabatizwa rhwanaba baguma b’omu mulala gwa Yehova

Eyi rhwabatizwa rhwanaba baguma b’omu mulala gwa Yehova g’omu gulu lyoshi guherhe obuguma. Chiro akaba oku rhurharhengerere efasi zili kuguma rhurhanalembwaga kuguma, rhweshi rhujira buyemere buguma, rhunalamire omu kukulikiza makanuni maguma m’okuchiheka. Osome Zaburi 25:14 na 1 Petro 2:17, muje mwaganira kw’echila chibazo:

• Bichi obubatizo bwakajira omu bwira b’omuntu haguma na Yehova n’abandi banamuharamya?

 OKU BUGEKE

Yesu aliyigirize oku Abakristu bakwanene babatizwe. Y’omuntu ahikira ogola muhigo, akwanene akomeze obwemere bwage mu Yehova, alame omu kukulikiza amakanuni mage, n’okuchihaana.

Rhuchiyibusye

• Obubatizo che chichi, na bulagurhe buli bw’akamaro?

• Bichi obubatizo buba buyerekene?

• Bichi omuntu akwanene ajire embere achihaane emwa Yehova n’okubatizwa?