Amango obuhanya bwamarhengerera rhunazigana kuyunva abantu bachibaza, “Bulagurhe?” Rhugwerhe busime bunene okubona Ebiblia ehaanire ebishubizo biyunvikene bwinja kw’echola chibazo!

1. Gurhe Shetani alerhaga obubi oku gulu?

Shetani Ibilisi achihenwire ku Mungu. Alilonzeze arhegeke abandi, n’echola charhuma ashumika abantu ba burhanzi Adamu na Eva bachihire omu buhangange bwage. Shetani ajiraga ntyo omu kurhebeka Eva. (Mwanzo 3:1-5) Arhuma arhondera kuwaza oku hali echintu chinja Yehova amubishire. Ayerekana oku abantu bakagwarha busime bunene nka barhakengere Mungu. Shetani aderhaga obubeshi b’oburhanzi omu kubwira Eva oku arhafa chiro. Chechirhumire, Ebiblia eyirikire Shetani “mubeshi n’eshe w’obubeshi.”​—Yohana 8:44.

2. Bichi Adamu na Eva balichishogere kujira?

Ntacho Yehova aliyimire Adamu na Eva. Alibwirirebo oku balye ku buli murhi guli omu bustani ye Edeni, olekere muguma gonyine. (Mwanzo 2:15-17) Aliko bachishoga okulya elehe ly’okumurhi babuzagabo. Eva “arhondera kucha oku malehe mago n’okumalya.” Enyuma waho, Adamu naye “amalyako.” (Mwanzo 3:6) Bombi babula kukenga Mungu. Bulala Adamu na Eva baliri bashinganyanya, birhalihemere mpu bashibe bachihangana yi bagala kukola ebinja. Aliko babona oku barhakenga Mungu, bajira echaha, balahira n’oburhegesi bwage. Okuchishoga kujira ntyo, kwalerherabo malibuko manene.​—Mwanzo 3:16-19.

3. Nka gurhe ebi Adamu na Eva bachishogaga kujira byarhuhumireko nerhu?

Amango Adamu na Eva bajira echaha, baba eyi barhachili bashinganyanya, bayahukiza n’oluburho lwabo loshi okurhashinganana. Ebiblia ederhere ntya oku bilolere Adamu: “Kugerera muntu muguma echaha chaja omu gulu, n’olufu kugerera echaha, nantyo olufu lwayenera oku bantu boshi.”​—Waroma 5:12.

Hali mpanvu zinene zili zarhuma rhwalibuka. Hali amango rhunalibuka eju y’ebirhwachishogere kukola. Hali n’amango rhunalibuka eju y’amabi abandi nabo bachishogere kukola. N’amandi mango rhunalibuka bulala rhuli ahantu habi omu kasanzi kabihire.​—Osome Muhubiri 9:11.

 HUMBA BWENENE

4. Owarhumire rhwaba omu malibuko

Bantu banene banawaza oku Mungu yerhegekere egulu lyoshi. Kubinali si? Ziha EVIDEO.

Osome Yakobo 1:13 na 1 Yohana 5:19, muje mwaganira kw’echila chibazo:

• Mungu ye ntangiriro y’amaligo n’amalibuko merhu si?

5. Lola eby’oburhegesi bwa Shetani bwalerhere

1. Adamu na Eva baliri bashinganyanya banalilamire omu paradizo. Aliko bayunviriza Shetani, nantyo, bachihenula ku Yehova

2.   Bamalire kuchihenula, egulu lyayunjula mw’echaha, amalibuko, n’olufu

3. Yehova nji amala echaha, amalibuko, n’olufu. Ahola kandi, abantu banashuba kuba bashinganyanya n’okulama omu paradizo

6. Yehova anayunva ababere ey’abona yi rhwalibuka

Yehova arhalaga n’amalibuko merhu si? Yunva ebi Mwami Daudi, n’entmwa Petro bayandikaga. Osome Zaburi 31:7 na 1 Petro 5:7, muje mwaganira kw’echila chibazo:

• Gurhe ochiyunvirhe okumenya oku Yehova y’abona amalibuko merhu, manali mamubabaza?

 OKU BUGEKE

Obubi buli omu gulu buli oku rhwe lya Shetani na bantu babiri b’oburhanzi. Amalibuko merhu manababaza Yehova bwenene na hanola hofi amamala.

Rhuchiyibusye

• Bubeshi buchi Shetani Ibilisi abwiraga Eva?

• Nka gurhe obugamba bwa Adamu na Eva bwarhuhumireko nerhu?

• Bichi birhuyemezeze oku amalibuko merhu manababaza Yehova?