SOMO LYA 31

Obwami bwa Mungu Bili Bichi?

ZIHA

Omwazi gukulu Ebiblia eba ederheere, buli Bwami bwa Mungu. Yehova nji akolesa obola Bwami omu kuyeneza omuhigo gwage gwa burhanzi oku bilolere egulu. Obwami bwa Mungu che chichi? Bichi birhuyerekere oku buli bwarhegeka mu mano mango? Bichi bwayeneze kugera zene? Na bichi bwayeneza omu mango mayinjire? Rhwabona ebishubizo by’ebila bibazo mu linola somo na mu mandi mabiri makulikireho.

1. Obwami bwa Mungu che chichi, na nde ye Mwami wabo?

Obola bwami buli burhegesi bushimikirwe na Yehova Mungu. Omwami wabo, Yesu Kristu ali arhegeka ey’ali embingu. (Matayo 4:17; Yohana 18:36) Ebiblia ederhere oku Yesu “arhegeka nka mwami esiku n’amango.” (Luka 1:32, 33) Yewe nka Mwani w’Obwami bwa Mungu, Yesu nji arhegeka buli muntu oku gulu.

2. Yesu nji arhegeka haguma na nde?

Yesu arhali yenyine ye murhegesi w’Obwami. Abantu barhengerere mu “buli buko, olulimi, n’eshanja . . . nji barhegeka egulu eyi bali bami.” (Ufunuo 5:9, 10) Banga nji barhegeka haguma na Yesu? Gurhenga amango Yesu ayinja hanola gulu, amamiliyoni m’abantu babere banafunzi bage. Aliko mw’abola bantu boshi, 144 000 bonyine babanaja embingu. Nji barhegeka haguma na Yesu. (Osome Ufunuo 14:1-4.) Abandi Bakristu nji baba ngabo z’Obwami oku gulu.—Zaburi 37:29.

3. Bulagurhe Obwami bwa Mungu bulushire oburhegesi bw’abantu?

Chiro haba abarhegesi benja b’abantu balonzeze kujira ebinja, barhaherhe obuhashe b’okujira byoshi balonzeze. Byakashobokana bagombolwe n’abandi barhegesi barhalagire oku bantu. Aliko omurhegesi w’Obwami bwa Mungu, Yesu, arhakafa agombwerwe n’owindi yeshi-yeshi. Mungu “ashimikire obwami burhakalimbulwa haba n’eliguma.” (Danieli 2:44) Yesu nji arhegeka egulu lyoshi arhakanagwarha kalondole. Ajira obuzigire, aba mwinja, w’okunali, nji anayigiriza abantu bayinje bakolera abandi oko konʼokola; k’okuderha n’obuzigire, oku bwinja, n’okunali.—Osome Isaya 11:9.

HUMBA BWENENE

Lola bulagurhe Obwami bwa Mungu bulushire oburhegesi bw’abantu boshi bwakabaho.

4. Oburhegesi buherhe emisi nji bwarhegeka egulu lyoshi

Yesu Kristu aherhe obuhashe b’okurhegeka bwinja kulusha abandi barhegesi boshi babereho. Osome Matayo 28:18, muje mwaganira kw’echila chibazo:

Bulagurhe oburhwali bwa Yesu bulushire obw’abantu boshi-boshi?

Oburhegesi bw’abantu bunahindamuka, na buli buguma bunarhegeka ku kabole kageke k’egulu. Gurhe oku bilolere Obwami bwa Mungu bowe? Osome Danieli 7:14, muje mwaganira kw’ebila bibazo:

Bulagurhe okuba Obwami bwa Mungu “burhakalimbulwa haba n’eliguma” kuli kwinja bwenene?
Bulagurhe okuba nji bwarhegeka egulu lyoshi nako kuli kwinja?

5. Oburhegesi bw’abantu bukwanene bugombolwe

Bulagurhe Obwami bwa Mungu bukwanene bugombole oburhegesi bw’abantu? Ziha EVIDEO, muje mwaganira kw’echila chibazo.

VIDEO: Obwami bwa Mungu Bili Bichi?—Akachira (1:41)

Bichi oburhegesi bw’abantu bwalerhere?

Osome Muhubiri 8:9, muje mwaganira kw’ebila bibazo:

Owazize ok’Obwami bwa Mungu bukwanene bugombole oburhegesi bw’abantu si? Bulagurhe?

6. Obwami bwa Mungu buherhe abarhegesi barhumenyere bwinja

Bulala Omwami werhu, Yesu alilamire nka muntu, ‘akayunvira obuzamba bwerhu obonjo.’ (Waebrania 4:15) Abola balume n’abakazi 144 000 Yehova achishogere baje kurhegeka haguma na Yesu, barhengerere “mu buli buko, olulimi, n’eshanja.”—Ufunuo 5:9.

Owazize oku bihirire omurhima okubona oku Yesu n’abanji barhegeka haguma naye boshi, baba bamenyere okuntu akalamo k’omuntu kaba si? Bulagurhe?

Yehova achishogere abalume n’abakazi barhengerere omu ngambo zoshi z’egulu barhegeke haguma na Yesu

7. Obwami bwa Mungu buherhe esheriya zinja bwenene kulusha zoshi z’oburhegesi bw’abantu

Oburhegesi bunahira h’esheriya zikwanene zilerhere abantu enyungu, n’okubalanga. Obwami bwa Mungu nabo buherhe esheriya engabo zabo zikwanene zikulikire. Osome 1 Wakorinto 6:9-11, muje mwaganira kw’ebila bibazo:

Gurhe owazize egulu nji lyaba amango abantu boshi nji bakulikira amarhegeko ma Mungu m’okuchiheka? a
Owazize oku biyunvikene okubona Mungu akanihira engabo z’Obwami zikenge amala marhegeko? Bulagurhe?
Bichi biyerekene oku abantu barhakenga amala marhegeko bakahindamuka? (Olole omustari gwe 11.)

Amarhegesi manahira h’amarhegeko makwanene malerhere abantu babo enyungu n’okubalanga. Obwami bwa Mungu buherhe amarhegeko menja bwenene m’okulerhera engabo zabo enyungu n’okuzilanga

HALI OWAKABAZA: “Obwami bwa Mungu che chichi?”