SOMO LYA 39
Okuntu Mungu Anabona Eshagama
Eshagama eli ya ngombwa oku kalamo. Buzira yowe ntaye wakalama. Bulala Mungu ye Mulemi werhu, aherhe ehaki y’okurhubwira gurhe rhwakakolesa eshagama. Bichi aderhere oku bilolere eshagama? Yakalibwa si changwa bayichomeke omuntu omu misi? Gurhe wakarhola esimikiro zinja oku bilolere eshagama?
1. Gurhe Yehova anabona eshagama?
Yehova alibwirire abakozi bage b’omu mango Ebiblia yayandikwaga: “Akalamo ka buli buko b’omubiri eli shagama yago.” (Walawi 17:14) Emwa Yehova, eshagama eba eshushanyize akalamo. Bulala akalamo kali k’akamaro bwenene, kali kachesibwa, intyo k’onako n’eshagama nayo.
2. Kukolesa eshagama kuhe Yehova alahize?
Yehova alihere abakozi bage b’embere Yesu ayinje, erhegeko ku barhakwanene kulya eshagama. (Osome Mwanzo 9:4 na Walawi 17:10.) ashuba kuseza elyola rhegeko amango ebaraza lirhambwire libwira Abakristu mpu “Mugenderere kuchilanga . . . n’eshagama.”—Osome Matendo 15:28, 29.
Okuchilanga n’eshagama k’okuderha gurhe? Nka dogutere akubwirire ok’ochilange ne alikole, orhakanywa amavu mali mw’alikole. Bobuno si wakaja walya ebilyo bili mw’alikole, changwa oyemere bakuchomekeyo omu misi? Biyunvikene oku nanga. Konakuguma, erhegeko lya Mungu liderhere ku rhuchilange n’eshagama, liyerekene ku rhurhakwanene kunywa eshagama changwa okulya enyamafu. Rhurhakanalya ebilyo byoshi-byoshi bayongeze m’omwamba.
Gurhe si oku bilolere okukolesa eshagama omu by’okubukwa? Njira ziguma z’okubuka zinagera enyuma w’amarhegeko ma Mungu. Ziheberwe m’okuchomeka omuntu eshagama eyenere, changwa chiguma omu bigabi byayo bikulu—egulobile z’omuduku, egulobile z’omweru, e plaquette (ebinagisa eshagama), ne plasma (menji maba omu shagama manazungulusya orhuntingu rhoshi rh’omu shagama aharhukenerwe). Aliko hali ezindi njira zibonekene nka zirhavire zavuna amarhegeko ma Mungu. Omufano, baguma banakolesa orhugabi rhutyu-rhutyu rhurhengere mu chiguma mw’ebyola bigabi bikulu bine. Ezindi njira ziheberwe m’okuntu eshagama ya muntu yewe yenyine yakoleswa. Omu bili nk’ebyola buli muguma akwanene kuchishoga yenyine ech’ajira. a—Wagalatia 6:5.
HUMBA BWENENE
Lola gurhe wakarhola esimikiro oku bilolere okukolesa eshagama omu by’okubukwa.
3. Orhole esimikiro zisimisize Yehova omu by’okubukwa
Omu by’okubukwa, gurhe wakarhola esimikiro zipatene n’okuntu Yehova anabona eshagama? Ziha EVIDEO, muje mwaganira oku bilolere akamaro k’okukulikira amahano mayerekenwe ahala shishi.
-
Oheme obwengehe omu sala.—Yakobo 1:5.
-
Olonze amakanuni me Biblia n’okulola gurhe wakamakolesa.—Mezali 13:16.
-
Olole amawazo abantu bajira ah’olamire.
-
Olole mahe mumo orhakayemera chiro.
-
Ochihangane kurhola esimikiro yarhuma wayorhana ezamiri echere.—Matendo 24:16. b
-
Omenye oku ntaye n’omuguma chiro—abe balo awo mukawe, abe mushamuka, abe mwalimu wawe we Biblia—okwanene kukurholera esimikiro omu bintu bilolere ezamiri.—Waroma 14:12.
-
Oyandike esimikiro warholere.
4. Abahamirizi ba Yehova banalonza babukwe bwinja bwenene
Byakashobokana omuntu abukwe bwinja buzira shagama anakenge erhegeko lya Mungu oku bilolere eshagama. Ziha EVIDEO.
Osome Tito 3:2, muje mwaganira kw’echila chibazo:
-
Bulagurhe rhukwanene kuchirhonda n’okuganira bwinja n’abanganga?
|
Omukristu arhakayemera |
Omukristu yenyine akarhola esimikiro |
|---|---|
|
A. E plasma y’omu shagama |
Orhugabi rhutyu-rhutyu rh’omu plasma |
|
B. Egulobile z’omweru |
Orhugabi rhutyu-rhutyu rh’omu gulobile z’omweru |
|
C. Ebinagisa eshagama |
Orhugabi rhutyu-rhutyu rh’omu binagisa eshagama |
|
D. Egulobile z’omuduku |
Orhugabi rhutyu-rhutyu rh’omu gulobile z’omuduku |
5. Nka byamaba m’okukolesa orhugabi rhutyu-rhutyu rhw’omu shagama
Eshagama eba ekolerwe na bigabi bine bikulu—egu- lobile z’omuduku, egulobile z’omweru, ebinagisa eshagama, ne plasma. Ebyo bigabi nabyo biba m’orhugabi rhutyu-rhutyu rhuyirikwa fractions du sang. c Rhuguma mw’orhola rhugabi rhunakoleswa omu chinganga omu kurhabala omubiri kulwisa obulwalwa, changwa omu kuyimanzya eshagama yaliri yadwa.
Oku bilolere orhugabi rhutyu-rhutyu rh’omu shagama, buli Mukristu akwanene kurhola esimikiro eyimangire oku zamiri yage yakoomezwe ne Biblia. Hali abakachishoga kulahira enjira zoshi-zoshi z’okubukwa zikoleseze orhugabi rhutyu-rhutyu rhw’omu shagama. Abandi banachiyunva nk’ezamiri yabo erhabalahize kuyemera.
Amango okala rhola esimikiro ochibaze ntya:
-
Gurhe nakafasiriya dogutere bulagurhe indahire, changwa bulagurhe inyemerere orhugabi rhutyu-rhutyu rh’omu shagama?
HALI OWAKABAZA: “Hayi obubi buli nk’omuntu ayemerere bamuchomeke mw’eshagama?”
-
Gurhe owazize?
OKU BUGEKE
Yehova alonzeze rhuchiyase okukolesa eshagama kubi.
Rhuchiyibusye
-
Bulagurhe Yehova anabona eshagama oku eli nchesibwa?
-
Bichi birhuyerekere oku erhegeko lya Mungu ly’okuchilanga n’eshagama liheberwe mu n’okuyichomeka omuntu?
-
Gurhe wakarhola esimikiro nyinja oku bilolere okukolesa eshagama omu by’okubukwa?
EYINDI MYAZI
Bichi okwanene kuwazako embere orhole esimikiro akaba wayemera awo walahira obufundi bw’echinganga b’okukolesa eshagama yawe woyo wenyine?
“Ebibazo by’Abanasoma Ebitabu Byerhu” (Omunara g’Omulanzi, Siku 15, Mwezi gwe 10, 2000)
Bichi okwanene kuwazako embere ochishoge akaba wabukwa n’ebihirirwe mw’orhugabi rhutyu-rhutyu rhw’omu shagama?
“Ebibazo by’Abanasoma Ebitabu Byerhu” ( Omunara g’Omulanzi, Siku 15, Mwezi gwa 6, 2004)
Bichi byarhabalaga dogutere muguma ayemere amawazo ma Mungu oku bilolere eshagama?
“Nava Nayemera Amawazo ma Mungu Malolere Eshagama” (Amuka!, Siku 8, Mwezi gwe 12, 2003)
Lola gurhe abashamuka banakola omu Komite y’Obunvikane n’Ebitaro banarhabala bene-berhu na bali-berhu.
a Olole Somo lya 35, “Okuntu Wakarhola Esimikiro Zinja.”
b Olole engingo ya 5, “Nka Byamaba m’Okukolesa Orhugabi Rhutyu-rhutyu rhw’omu Shagama” n ’Amahugulo ma 3, “Enjira z’Okubukwa Zihirirwe mw’Eshagama”; na Huduma yetu ya Ufalme ya Mwezi gwe 11, 2006, Bukurasa bwa 3-6
c Hali ba dogtere banabona nk’ebyola bigabi bikulu bine by’eshagama byenabiguma n’orhola rhwindi rhugabi rhutyu-rhutyu. Chechirhumire, bikuhemere woyo wenyine ofasiriye munganga esimikiro yawe oku bilolere okuhirwa mw’eshagama eyenere, changwa egulobile z’omuduku, egulobile z’omweru, ebinagisa eshagama, ne plasma.
