Eyi rhwaba rhuli haguma n’aberhu Bakristu, rhunachiyunva kuguma n’Omwami Daudi waderhaga: “Birhakwira berhu n’okusimisa ey’abaguma balama haguma omu buguma!” (Zaburi 133:1) Obuguma bwerhu burhafa chakuchilerha. Buli muguma anajira echintu omu kurhabala bugenderere.

1. Chintu chihe chisimisize chinabonekana omu bantu ba Mungu?

Nk’ojire oku mbuganano omu chindi chihugo, hali oku wakaba ey’orhali wayunva olulimi. Aliko wanachiyunva nk’onali eka. Bulagurhe? Bulala rhunayiga Ebiblia omu kukolesa ebitabu by’en’ebyo buli hoshi. Kandi rhunachihangana kuyerekana obuzigire buli muguma n’owindi. Chiro akaba rhulamire ngahe, rhweshi ‘rhunahamagala ezino lya Yehova, omu kumuharamya omu buguma.”​—Sefania 3:9, amahugulo m’eshishi

2. Bichi wakajira y’ogendereza obuguma?

“Muzigirane buli muguma n’owindi bwenene kurhenga oku murhima.” (1 Petro 1:22) Gurhe wakakolesa eyola mpanulo? Ahali h’okuhanza walola amagosa n’okurhashinganana kw’abandi, wakachiseza oku ngeso zabo zinja. Ahali h’okukomerana na balala banasima ebi nawe osima bonyine, wakachihangana kumenyana na bene-berhu na bali-berhu barhengerere omu micho erhali kuguma n’eyawe. Kandi rhwakachihangana kushigula omuzi gw’akabolo goshi gwakaba guli omu murhima gwerhu.​—Osome 1 Petro 2:17. a

3. Bichi wakajira nka byamagera amango orhachiyunvikene n’owenyu Mukristu?

Rhuli omu buguma, aliko rhurhashinganene. Hali amango rhwakavunana omurhima, awo rhugayisanye. Che chirhumire Echinwa cha Mungu chirhubwirire: “Mugenderere . . . kubabalirana buli muguma n’owindi.” Chishubire kuyongera: “Nk’oku Yehova abababalire oku bulonza, intyo k’onokola ku nenyu mubabaliranage.” (Osome Wakolosai 3:13.) Rhwagoseze Yehova akarhakaganjwa, aliko agenderere kurhubabalira. Bobuno naye alonzeze rhubabalire bene-berhu. Nk’orhegerere oku hali omuntu wababeze, orhole entambu y’okulola gurhe mwakamala echola chibazo.—Osome Matayo 5:23, 24. b

 HUMBA BWENENE

4. Ohime akalondole

Rhulonzeze rhuzigire bene-berhu boshi. Aliko hali oku byakarhuhema rhulwise bwenene yi rhugala kuyunvikana na muntu mulebe bishushire oku rhurhali kuguma. Bichi byakarhurhabala? Osome Matendo 10:34, 35, muje mwaganira kw’ebila bibazo:

• Yehova anayemera abantu ba buli buko babe Bahamirizi bage. Gurhe nawe wakamuyiganya oku bilolere okuntu onabona abantu barhengerere omu micho erhali kuguma n’eyawe?

• Kalondole nyabachi abantu bajira emunda olamire woyo olonzeze olekane nako?

Osome 2 Wakorinto 6:11-13, muje mwaganira kw’echila chibazo:

• Gurhe owazize wakajira y’oyegera bene-berhu na bali-berhu barhengerere omu yindi micho?

5. Obabalire oku bulonza n’okujira omurhula

Yehova anarhubabalira oku bulonza n’obola nta mango yewe nji akenera mpu rhumubabalire. Osome Zaburi 86:5, muje mwaganira kw’ebila bibazo:

• Kangana gurhe Yehova anababalira?

• Bulagurhe oherhe eshukrani oku bubabale bwa Yehova?

• Hali zihe zakarhuma byarhukomerera kugendereza omurhula haguma n’abandi?

Gurhe rhwakayiganya Yehova n’okuyorha omu buguma na bene-berhu na bali-berhu? Osome Mezali 19:11, muje mwaganira kw’echila chibazo:

• Nka hali omuntu wamakugayisa, changwa amakushula oburhe, gurhe wakajira y’ebintu bigenda bwinja?

 Hali amango rhunagoseza abandi. Nka byamahika, gurhe rhwakajira? Ziha EVIDEO, muje mwaganira kw’echila chibazo.

• Bichi mwali-werhu alikolere omu kujira omurhula?

 OKU BUGEKE

Wakarhabala kulerha obuguma omu chibaga amango oli wababalira, n’okuzigira bene-benyu na bali-benyu boshi.

Rhuchiyibusye

• Gurhe wakaleka akalondole?

• Gurhe wakajira amango murhayunvikene n’owenyu Mukristu?

• Bulagurhe olonzeze kuyiganya Yehova omu kubabalira abandi?