SOMO LYA 57
Gurhe Byakaba nka Wamajira Echaha Chikomere?
Chiro akaba ok’ozigire Yehova bwenene onali wachihangana olekane na byoshi byakamugayisa, hali amango maguma-maguma wayinja wajira amagosa. Chiro akaba ntyo, hali ebyaha biba bikomere bwenene kulusha ebindi. (1 Wakorinto 6:9, 10) Nk’ojirire echaha chikomere, oyibuke oku Yehova arhaza leka kukuzigira; Alonzeze akubabalire n’okukurhabala.
1. Bichi rhukwanene kujira yi Yehova arhubabalira?
Abanazigira Yehova banayunva bababere bwenene eyi barhegera oku bajirire echaha chikomere. Aliko Yehova anabarhuliriza kugerera echilagane ahere abantu bage: “Chiro ebyaha byenyu byaba nka muduku gubumbugulire, byajirwa by’omweru nka lubula.” (Isaya 1:18) Nka rhuhungamire n’omurhima goshi, Yehova akarhubabalira loshi-loshi. Nka gurhe rhwakahunguma? Omuntu wahungama anayunva ababere bwenene n’amaligo ajirire, anamaleka, n’okulakirira Yehova amubabalire. Anachihangana bwenene akabulire amawazo mabi, alekane n’engeso zibi zamugezaga kw’echola chaha, n’okulwisa kandi alame omu kukulikiza amakanuni ma Yehova m’okuchiheka bwinja.—Osome Isaya 55:6, 7.
2. Gurhe Yehova anakolesa abashamuka omu kurhurhabala amango rhwajirire echaha?
Nk’omuntu ajirire echaha chikomere, Yehova arhubwirire oku “ahamagale abashamuka b’echibaga.” (Osome Yakobo 5:14, 15.) Abola balume bashimikirwe baba bazigire Yehova n’entama zage. Bayigirizwe bwinja okuntu bakarhurhabala rhushube rhuyirhule obwira bwerhu haguma na Yehova.—Wagalatia 6:1.
Gurhe abashamuka banarhurhabala nka rhwajirire echaha? Babiri changwa basharhu mubo, banarhugosora omu kukolesa Amandiko. Banashuba kurhuha empanulo rhwakakolesa zakarhurhabala rhurhachirhogeraga omu chaha rhwajirire. Byakagera amango barhubuza kukola makasi maguma-maguma omu chibaga, kugera amango rhwashuba kugwarha amagala menja m’ekiroho. Nk’omuntu ajirire echaha chikomere aliko arhahungamire, abashamuka banamucha omu chibaga y’arhayahukiza abandi.
HUMBA BWENENE
Yunva echakarhuma wagwarha eshukrani enene oku mipango Yehova ahebereho y’okurhurhabala amango rhwajirire echaha chikomere.
3. Okuhungama kunarhurhabala rhuyirhule obwira na Yehova
Buli chaha rhunajira chinababaza Yehova, bobuno bihemere rhuhungame bwinja emunda ali. Osome Zaburi 32:1-5, muje mwaganira kw’echila chibazo:
-
Bulagurhe kuli kwinja oku hungama ebyaha byerhu emwa Yehova ahali h’okulonza kubibisha?
Eyi rhumala kuhungama ebyaha byerhu emwa Yehova, bihemere rhwanaja rhwahema abashamuka barhurhabale yi rhuchiyunva bwinja. Ziha EVIDEO, muje mwaganira kw’echila chibazo.
-
Mw’eyila video, nka gurhe abashamuka balirhabere Canon agalukire Yehova?
Bihemere rhufungulire abashamuka omurhima buzira kubabisha chintu bulala baliho omu kurhurhabala. Osome Yakobo 5:16, muje mwaganira kw’echila chibazo:
-
Bulagurhe okubwira abashamuka byoshi buzira kubabisha kwakarhuma byayoroha barhurhabale?
Ohungame echaha chawe, intacho obishage abashamuka, oyemere n’oburhabale bwa Yehova
4. Okucha omuntu omu chibaga kuherhe enyungu
Nk’omuntu amajira echaha chikomere akanalahira kukulikiza amakanuni ma Yehova, arhakachiyorha omu chibaga. Anachibwa, omu kuntu rhurhakachikomerana naye rhurhakanachiderha naye. Osome 1 Wakorinto 5:6, 11 na 2 Yohana 9-11, muje mwaganira kw’echila chibazo:
-
Nka kulala engezo enarhundisa epate y’emigati yoshi, nka gurhe okukomerana n’omunyabyaha orhahungamire kwakayanduza echibaga?
Banene bachibirwe, banashuba kugaluka omu chibaga. Bulagurhe? Okuchibwa kunarhuma bachiyunva kubi, aliko kandi kunarhuma barhegera amagosa mabo. (Zaburi 141:5) Ziha EVIDEO, muje mwaganira kw’echila chibazo.
-
Mw’eyila video, nka gurhe okuchibwa omu chibaga kwalirhabere Sonja?
Nka gurhe omupango g’okucha omuntu omu chibaga . . .
-
gulerhere Yehova olukengo?
-
guyerekene oku Yehova anahaana obuhane bukwanene bunali b’obuzigire?
5. Yehova anarhubabalira amango rhwamahungama
Yesu alihaanire omufano guyerekene gurhe Yehova anachiyunva ey’omuntu ahungama. Osome Luka 15:1-7, muje mwaganira kw’echila chibazo:
-
Bichi eyila ngani ekuyigirize oku bilolere Yehova?
Osome Ezekieli 33:11, muje mwaganira kw’echila chibazo:
-
Chintu chihe ch’akamaro omuntu akwanene ajire omu kuyerekana ku kweri ahungamire?
Kuguma n’omungeri, Yehova analaga bwenene oku ntama zage
HALI ABANTU BANADERHA: “Indi nayubaha oku nkabwira abashamuka echaha najirire banancha omu chibaga.”
-
Bichi wakabwira omuntu oherhe amawazo mali nk’amola?
OKU BUGEKE
Nka rhujirere echaha chikomere, aliko rhukababala bwenene, rhukanahigirira kuleka kukola amabi, Yehova anarhubabalira.
Rhuchiyibusye
-
Bulagurhe kuli kwinja okuhungama ebyaha byerhu emwa Yehova?
-
Bichi rhukwanene kujira yi Yehova ababalira ebyaha byerhu?
-
Nka rhujirire echaha chikomere, bulagurhe rhukwanene kubwira abashamuka barhurhabale?
EYINDI MYAZI
Lola gurhe mulume muguma achiboneraga olukogo lwa Yehova luderherwe omu Isaya 1:18.
Nyungu zichi okucha omuntu omu chibaga kunalerhera buli muguma?
“Bulagurhe Okucha Omuntu Guli Mupango g’Obuzigire” (Omunara g’Omulanzi, Siku 15, Mwezi gwa 4, 2015)
Lola gurhe wakafasiriya omuntu orhali Muhamirizi omupango g’okucha omuntu omu chibaga.
“Abahamirizi ba Yehova, ka Banakabulira Abantu Baliri omu Dini Lyabo?” (Mwazi guli oku jw.org)
Omu ngani ederhere “Nalikenere Ngalukire Yehova,” lola echarhumaga mulume muguma abona nka Yehova yamukulula ashube amugalukire.
“Ebiblia Enahindamula Akalamo k’Abantu” (Omunara g’Omulanzi, Lusiku 1, Mwezi gwa 4, 2012)
