Abakristu b’okuli baba bahigirire okurhayemera echintu choshi-choshi changwa omuntu ababuza kuharamya Yehova. Nta ngangane intyo ku nawe ochiyunvirhe. Yehova abwene obwimana bwawe ku buherhe akachiro. (Osome 1 Mambo ya Nyakati 28:9.) Hali nyabachi zakageregeza obwimana bwawe kuye, na gurhe wakazilwisa?

1. Gurhe abandi bakageregeza obwimana bwawe ku Yehova?

Hali abantu bakalonza barhubuze kuharamya Yehova. Inde wakajira echili nk’echo? Bantu baguma balekere okuli, banaderhera olubaga lwa Yehova obubeshi omu kulonza banosye obwemere bwerhu. Banayirikwa bigamba by’obwemere. Kandi, bakulu baguma b’amadini banarhuderha ku myazi minene y’obubeshi omu kulonza balala barhakengukire baleke okuli. Okujira obuhaka n’ebigamba by’obwemere, okusoma ebitabu byabo, okuja oku site zabo ze Enternete, awo okulola evideo zabo kwakarhuhanyagaza. Oku bilolere abantu banalonza bavune omurhima abali bakolera Yehova oku bwimana, Yesu aliderhere ntya: “Mubaleke. Bali barongozi bahumire. Nk’empumi erongozeze eyindi mpumi, bombi barhogera omu chishimu.”​—Matayo 15:14.

Bobuno si gurhe wakajira nka hali omuntu omenyere wamachishoga oku yewe arhachilonzeze kuba Muhamirizi wa Yehova? Byakavuna omurhima amango muchi werhu wa hofi-hofi amajira echili nk’echo. Akalonza arhuseze nerhu rhuchishoge akaba rhwaja oku lunda lwage changwa akaba rhwayorha oku lunda lwa Yehova. Rhukwanene kuhigirira kuyorha bemana ku Yehova kulusha owindi muntu yeshi-yeshi. (Matayo 10:37) Che chirhumire rhunakenga erhegeko lya Yehova liderhere oku rhurhakwanene kukomerana n’abantu bali nk’abola.​—Osome 1 Wakorinto 5:11.

2. Nka gurhe esimikiro rhunarhola zakayerekana akaba rhuli bemana ku Yehova?

Obuzigire bwerhu ku Yehova bwarhushunika rhuyake kuchihira omu chintu choshi-choshi chilolere edini ly’obubeshi. Kabe kasi kerhu, olubaga yi rhwakolamo, changwa echindi chintu choshi-choshi, birhakwanene kuba eyi hali aha bibuganene n’edini ly’obubeshi. Yehova arhuhere omukonge ntya: “Murhenge [omu Babiloni Mukulu], mwewe bantu bani.”​—Ufunuo 18:2, 4.

 HUMBA BWENENE

3. Ochilange abalimu b’obubeshi

Gurhe rhwakajira nka rhuyunvirhe emyazi mibi oku bilolere olubaga lwa Yehova? Osome Mezali 14:15, muje mwaganira kw’echila chibazo:

• Bulagurhe rhunachilanga rhurhayemera buli choshi rhwanayunvirhe?

Osome 2 Yohana 10, muje mwaganira kw’ebila bibazo:

• Gurhe rhukwanene kukolera ebigamba by’obwemere?

• Chiro rhurhabuganana n’ebigamba by’obwemere masu oku masu mpu rhuganire nabyo, ngahe rhwakazinda eyi rhwabuganire enyigirizo zabo?

• Gurhe owazize Yehova akachiyunva nka rhuli rhwayunviriza amawazo m’obubeshi bamuderhereko awo baderhere oku lubaga lwage?

4. Oyorhe mwimana ku Yehova amango hali mwene-werhu wamakola echaha

Amango rhwamarhegera oku hali omuntu wakolere echaha omu chibaga, bichi rhukwanene kujira? Lola kanuni kaguma kabonekene omu Sheriya ya Mungu ahaga Abaizraeli ba mira. Osome Walawi 5:1.

Nk’ok’olu lwandiko lurhuyerekere, nka hali omuntu rhumenyere wajirire echaha chikomere, rhukwanene kubwira abashamuka byoshi rhuyinji kucho. Aliko embere rhujire ntyo, eyi rhwarhangire kuhira omurhima owakolere echaha yewe yenyine aje kubona abashamuka ahungame echaha ajirire. Akagambwa kujira ntyo, obwimana bwerhu ku Yehova bukwanene burhushunike rhubwire abashamuka ebi rhumenyere. Nka gurhe okujira ntyo kuli kuyerekana obuzigire bwimana . . .

• ku Yehova Mungu?

• oku wajirire echaha?

• oku bandi omu chibaga?

 5. Orhahira okashubira omu Babiloni Mukulu

 OKU BUGEKE

Yi rhuyorha bemana ku Yehova rhukwanene kuleka kukomerana n’abantu barhali bemana kuye. Kandi birhuhemere rhulekane loshi-loshi n’edini ly’obubeshi.

Rhuchiyibusye

• Bulagurhe rhurhakwanene kulola, okusoma, changwa okuyunviriza amawazo m’ebigamba by’obwemere?

• Gurhe rhukwanene kukolera orhachilonzeze kuba Muhamirizi wa Yehova?

• Gurhe rhwakakenga omukonge gurhubwirire rhulibirhe edini ly’obubeshi?