MUYORHE EYI MUMENYERE EBILI BYABA!
Abanyapolitike Balalikire Mpu Armagedoni Yayinjire—Bichi Ebiblia Ebiderhereko?
Esezi lya Lwakwanza Siku 10, Mwezi gwe 10, 2022, e Russie yashurhire amabombe kamama mu mavile manene me Ukraine omu kuchiholera oku mabombe mangana e Ukraine yabaga yabalikize mu siku ebiri embere w’aho, mpaka mahombola echilalo chifarhisize e Russie ne Crimee. Ebyajaga byakulikiraho byarhuma abanyapolitike baguma balalika okwe Armagedoni ye yayinjire lero.
“Kurhenga oku lwa prezida we Etats-Unis John Kennedy, amango bashurha amabombe kamama omu Cuba, rhurhasaga kuba omu hali yakarhugeza oku Armagedoni nk’eyi rhulimo zene. . . . Ntenji akaba hali amayeri moshi-moshi rhwakajira, yi rhukolesa amabombe nikleyere buzira kuchula Armagedoni.”— Joe Biden President we Etats-Unis, Siku 6, Mwezi gwe 10, 2022.
“Inyinji bwinja kw’ebila byahumukira oku Armagedoni, bulala byalerha obuhanya oku gulu lyoshi.”— President we Ukraine Volodymyr Zelensky, amango bamubaza oku bilolere engaruka zakalerhwa n’okukolesa amabombe nikleyere, BBC News, Siku 8, Mwezi gwe 10, 2022.
Okukolesa amabombe nikleyere, kweri si kwakalerha Armagedoni? Bichi Ebiblia ebiderhereko?
Amabombe nikleyere makalerha Armagedoni si?
Nanga. Echinwa “Armagedoni” chiba chiyandikirwe liguma lyonyine omu Biblia omu Ufunuo 16:16. Chirhaba chiderheere Evita ahakagarhi k’amashanja s’ahubwe Evita ahakagarhi ka Mungu ‘n’abami b’egulu lyoshi lilamirweko.’ (Ufunuo 16:14) Armagedoni lili vita Mungu nji akolesa omu kumala oburhegesi bwa mwene-omuntu.—Danieli 2:44.
Y’omenye binene oku bilolere bichi Armagedoni nji yakola oku gulu, osome omwazi Vita vya Har-Magedoni Ni Nini? (Evita lye Armagedoni bye Bichi?)
Amabombe nikleyere maharabisa egulu n’abantu boshi balamireko si?
Nanga. Chiro akaba k’omu mango mayinjire hali okuntu abarhegesi b’elila gulu bakakolesa amabombe nikleyere, Mungu arhakayemera egulu lyaharabiswa. Ebiblia ederhere:
“Egulu lyarhulaho esiku n’amango.”—Muhubiri 1:4.
“Abanyakunali nji bashokola egulu, nji banalilamako esiku n’amango.”—Zaburi 37:29.
Aliko chiro akaba ntyo, obulebi bwe Biblia n’ebirhuli rhwachibonera biyerekene oku hali bintu binene bili hofi kuhindamuka omu kalamo k’abantu oku gulu. (Matayo 24:3-7; 2 Timoteo 3:1-5) Wakamenya binene oku bilolere ebye Biblia ederhere byaba amango mayinjire kugerera omupango gwerhu g’okuyiga Ebiblia omu kuganira.