MUYORHE EYI MUMENYERE EBILI BYABA!
Amarhegesi Makachihira Haguma Magale Kubuza Ebinjira Bili Byalerhwa n’Okuhindamuka kw’Ehali y’Ehewa Si?—Bichi Ebiblia Ebiderhereko?
Embuganano y’Obuguma bw’Amashanja oku Bilolere Okuhindamuka kw’Ehali y’Ehewa k’okuderha COP27 yahwaga Lwamungu, Siku 20, Mwezi gwe 11, 2022. Chiro akaba oku boshi baliyunvikene oku bihemere okuhaana efuranga z’okurhabala ebihugo bili byahurana ebibazo bilerherwe n’okuhindamuka kw’ehali y’ehewa, banene balirhegerere oku arhali b’obufumu bw’echibazo kanuni.
“Insimire okubona rhwachishogere oku rhukotize efuranga z’okuhanza zarhabala abali bahurana ebyago bilerherwe n’okuhindamuka kw’ehali y’ehewa, aliko omu bukweri okujira ntyo kurhaba eyi kwamamala echibazo . . . Egulu lyerhu lili omu buhanya bwenene” Binwa António Guterres, secretaire generale w’Obuguma bw’Amashanja aderhaga omu Siku 19, Mwezi gwe 11, 2022.
“Byakashobokana oku hanola hofi egulu lyahurana n’ebibazo bikomere nk’okuhindamuka kw’ehali y’ehewa.”—Binwa Mary Robinson presidente we Irlande ya mira na Haut-Commissaire wa mira w’Obuguma bw’Amashanja oku Haki z’Abantu aderhaga omu Siku 20, Mwezi gwe 11, 2022.
Emisole ahanene eli yachibaza gurhe akalamo kaba oku gulu omu mango mayinjire. Aliko si, amashanja makanagala kweri kuchihangana boshi haguma kuyeneza echilagane chabo ch’okulwisa echibazo ch’okuhindamuka kw’ehali y’ehewa? Bichi Ebiblia ederhere?
Amashanja machiheba haguma n’okuhima echola chibazo si?
Ebiblia erhubwirire oku chiro amashanja majira chintu chilebe omu kulwisa echibazo ch’okuhindamuka kw’ehali y’ehewa, marhagala kuchimala. Rhulole mpanvu ebire:
“Echintu chigondamire chirhakagororwa.”—Muhubiri 1:15.
Amafasiriyo: Amaguvernema marhakagala kujira buli chintu balonzeze kujira bulala abantu barhakagala kuchirhegeka bowe bonyine. (Yeremia 10:23) Chiro amashanja machihira haguma, marhakagala haba n’akatyu kumala ebibazo by’omu gulu, chiro majira gurhe.
“Bulala abantu nji baba bekazize, basimire efuranga, . . . barhalonzeze obunvikane chiro.”—2 Timoteo 3:2, 3.
Amafasiriyo: Ebiblia yali lebere ok’omu siku zerhu bantu banene bakabere bekazize barhanalonzeze obunvikane oku nyungu z’abandi.
Empanvu y’okulangalira
Che cherhumire, amango mayinjire ma linola gulu marhayimangiire oku bilagane amaguvernerma m’abantu banahaana. Mungu ahaanire Omurhegesi w’egulu okwanene, yekala Yesu Kristu. Oku bimulolere, Ebiblia ederhere:
“Oburhegesi nji bwayorha oku chirhugo chage. Ayirikwa Muhanuzi okomere, Mungu oherhe emisi, Darha w’esiku n’amango, Murhwali w’omurhula.”—Isaya 9:6, mahugulo m’eshishi.
Yesu ye Mwami w’Obwami bwa Mungu changwa oburhegesi bw’embingu. (Matayo 6:10) Agwerhe obuhashe, obwengehe, n’enyorha y’okushishikala egulu lyerhu n’abantu balamiremo. (Zaburi 72:12, 16) Eshishi y’obwerekezi bwage, obula burhegesi bw’embingu bwalimbula balala boshi bali “baharabisa egulu” n’okukwiza bwinja egulu.—Ufunuo 11:18, mahugulo m’eshishi; Isaya 35:1, 7.
Y’omenya binene oku bilolere echi nji chamala echibazo ch’okuhindamuka kw’ehali y’ehewa, osome omwazi “Biblia Inasema Nini juu ya Mabadiliko ya Hali ya Hewa na Wakati Wetu Wenye Kuya.” (Bichi Ebiblia Ederhere oku Bilolere Okuhindamuka kw’Ehali y’Ehewa n’Amango Mayinjire)