MUYORHE EYI MUMENYERE EBILI BYABA!
E Coupe du Monde Kweri Yakanahira Abantu Haguma Si?
Rhuwazize oku hofi bantu miliyare erhano nji balola amache m’e coupe du monde magera kurhangira Siku 20, Mwezi gwe 11 kugera Siku 18, Mwezi gwe 12, 2022. Banene banawaza oku ebihe by’amache bili nk’ebyola biherhe eyindi nyungu olekere okugusha haguma abantu bajaga kulola amache.
“Esporo eherhe obuhashe b’okuhindamula egulu. Enarhuma abantu bachiyunva bwinja n’okugwarha amawazo menja. Eherhe obuhashe b’okugusha abantu haguma omu njira eli kwago-kwago.”—Nelson Mandela, prezida wa mira we Afrique du Sud.
“Akabumbu . . . kanagusha abantu haguma bulala kanarhuma bachiyunva baherhe obunihire, obusime, banashagaluka haguma, banayerekana oku bazigire abandi, nʼoku baherhe echintu bashangirire.”—Gianni Infantino, prezida we FIFA. a
E Coupe du Monde changwa amandi-mandi masharha me sporo makayeneza ebintu binja bili nk’ebila si? Hali obunihire b’okulama omu buguma n’omu murhula si
Akabumbu kakalerha obuguma si?
E Coupe du Monde ya gunola mwaka, yarhumire abantu bawaza oku bindi-bindi bintu olekere akabumbu konyine. Amasharha mazusize emitingi oku bilolere ebibazo by’epolitike n’emilamire y’abantu bihirirwe mw’ehaki z’abantu, akabolo k’erangi ly’omubiri, n’okurhagwarha obuchire kuguma.
Chiro akaba ntyo, bantu banene banabona oku kuli kwinja oku chisimisa n’ebihe by’esporo nk’E Coupe du Monde. Aliko, chiro akaba oku bantu banene baba balonzeze ntyo, ebyola bihe birhalerha obuguma bugenderere. Ahali h’okujira ntyo, binalerha ebijiro by’akavulindi, ebye Biblia yabaga yalebere oku byakabere chimenyiso che chihe chiyirikirwe “siku zizinda.”—2 Timoteo 3:1-5.
Obulangalire b’okuli oku bilolere obuguma bw’egulu
Omu Biblia muli obulangalire b’okuli oku bilolere obuguma bw’egulu. Elaganyize oku abantu nji balama omu buguma oku gulu eshishi we guvernema y’embingu eyirikirwe “Bwami bwa Mungu.”—Luka 4:43; Matayo 6:10.
Mwami w’obola Bwami, Yesu Kristu, nj’ajira okwage koshi yi haba omurhula omu gulu lyoshi. E Biblia ederhere:
“Abanyakunali nji bashishagira n’omurhula nji gwaba gunene.”—Zaburi 72:7.
“Nj’ayokola omukene oli walaka bamurhabale . . . nji abachungula oku bali babarhindibuza n’okubalibuza.”—Zaburi 72:12, 14.
Chiro na zene, enyigirizo za Yesu zahebere haguma amamiliyoni m’abantu mu bihugo 239. Abantu bayigire okulekana n’omujinya. Y’omenya binene, osome emyazi y’enkulikirane ederhere “Mambo ya Kufanya Juu ya Kuachana na Chuki.” (Ebi Rhwakajira yi Rhumala Olushombo)
a Fédération Internationale de Football Association, ekomite eyimangire amasharha m’akabumbu omu gulu lyoshi.