Surasak Suwanmake/Moment via Getty Images
MUYORHE EYI MUMENYERE EBILI BYABA!
Echuka Chichubwisye Olugero omu Gulu Lyoshi omu Mwaka gwa 2023—Bichi Ebiblia Ebiderhereko?
Abantu oku gulu lyoshi bali balembera echukuka chikalihire bwenene kulusha amandi mango moshi moshi buzira kuyibirira n’ebinjira binalerhwa n’ehali ebihire y’ehewa. Yunva okuntu ezila ziderhere:
“Echuka chinene chahwanzaga kuderhwako oku gulu myaka 174 egerere, aliko mw’agola mango moshi, Mwezi gwa 6 gwa gunola mwaka nji gwaliri mwezi gw’echuka chinene kulusha amandi mango moshi.”—Eorganizasiyo (Agence américaine d’observation océanique et atmosphérique [NOAA], États-Unis, département du Commerce, Siku 13 Mwezi gwa 7, 2023).
“Ebihugo nke Italie, Espagne, e France, Allemagne, ne Pologne byali hurene n’echuka chinene bwenene, chaliri hofi kuhika oku chipimo cha degre Selisiyuse 48, oku chizimba che Sicile n’eche Sardaigne, bibonekene oku kw’ebyola bizimba bye byaligwerhe chuka chinene bwenene chirhasagala kubaho omu Bulaya yoshi.”—Agence américaine d’observation, Siku 13, Mwezi gwa 7, 2023.
“Amango echuka chamagenderera kuluga oku planete yerhu (egulu), rhwanachizera oku nvula zinene zarhoga oku gulu n’oku zarhuma haba mahindule manene.”—Stefan Uhlenbrook, (directeur de l’hydrologie, de l’eau et de la cryosphère à l’Organisation météorologique mondiale, Siku 17, Mwezi gwa 7, 2023.
Amango wamayunva ezila raporo z’okuchiyongera kw’echuka chinene binakuyubahisa si? Lola ebye Biblia ederhere oku bilolere echola chibazo chiyubahisize.
K’okuhindamuka kw’ehali y’ehewa kukabizye kuli kwayeneza obulebi bwe Biblia?
Nechi. Okuchiyongera kw’echuka chinene omu gulu lyoshi, n’ebindi bibazo birhengene n’ehali ebihire y’ehewa, bili bintu biguma omu by’Ebiblia yabaga yalebere byakarhengerere mu zinola siku zerhu. Omufano, Yesu alilebere oku rhwakabwene “ebintu biyubahisize,” changwa “ebintu birhasaga kubaho by’okushalamya.” (Luka 21:11; Union Version) Okuchiyongera kw’echuka chinene omu gulu lyoshi, kwarhumire bantu banene bagwarha obuba oku abantu barhuma egulu lyaba hantu harhakalamwa.
K’egulu nji lyaba hantu harhakachilamwa si?
Nanga. Mungu alemaga egulu y’abantu balilamako esiku n’amango; arhakayemerera abantu balilimbula. (Zaburi 115:16; Muhubiri 1:4) Kweri, Mungu alaganyize oku “nj’alimbula balala boshi bali balimbula egulu.”—Ufunuo 11:18.
Ebiblia ederhere oku Mungu agwerhe obuhashe n’obulonza b’okulanga egulu limenye lyaharabiswa n’ebinjira bilerherwe n’ehali zibi z’ehewa.
Mungu agwerhe obuhashe b’okurhuleza ehali y’ehewa. Agwerhe obuhashe b’okumala ebibazo by’okuharabika kw’egulu bilerherwe n’ehali zibi z’ehewa zili zalibuza abantu.
Y’omenya binene oku bilolere echilagane ch’Ebiblia ch’okushuba kujira egulu libe linja bwenene, olole omwazi “Ni Nani Atakayeiokoa Dunia?” (Inde Wayokola Egulu)