Edini Likwanene Kuchihira omu Politike Si?
Eyi n’eyi omu gulu lyoshi, abantu banachihala mpu bali bakulikira Yesu banachihira omu by’epolitike bwenene. Baguma banalonza bahire-mbere amakanuni mabo m’edini n’okuntu banachiheka, omu kushigikira bakandida balebe changwa ebyama by’epolitike. Abanyapolitike nabo banakolesa emyazi ederhere gurhe abantu bakwanene bachiheke n’okuntu bakwenene babe omu milamire yabo haguma, omu kuntu abanyamadini babasime n’obashigikira. Birhali mpu bihyahya okubona omukulu w’edini yahema mpu naye bamuvote apate echeo omu guvernema. Na mu bihugo biguma, abachiyirika mpu “Bakristu” bakaba eyi barholerwe mpu ly’edini lya leta, ly’edini ly’echihugo.
Gurhe owazize? Abanafunzi ba Yesu bakwanene kuchihira omu politike si? Wakabona echishubizo omu kulola omufano gwa Yesu. Aliderhere: “Namabalekera olwiganyo, ebinabajirire, nenyu mukwanene mubijirirane.” (Yohana 13:15) Bobuno oku bilolere eby’epolitike, lwiganyo luhe Yesu alilekere?
Yesu alichihirire omu politike si?
Nanga. Yesu arhalichihirire omu bintu by’epolitike z’elila gulu.
Yesu arhaliri alonza apate echeo omu by’epolitike. Alilahire kurhegeka amarhegesi m’abantu amango Shetani amuhaga “amami m’egulu moshi.” (Matayo 4:8-10) a Mango maguma, abantu babona oku Yesu aherhe engeso zinja n’obuhashe b’okuba murhegesi mwinja, balonza bamuseze achihire omu by’epolitike. Ebiblia ebiderhereko ntya: “Naho Yesu, omu kuba amenyere oku bayinja kumufarha bamujire mwami, ashuba chigendera, aja oku musozi yenyine” (Yohana 6:15) Yesu arhayemeraga ajira eby’abantu balilonzeze ajire. S’ahubwe alahira kuchihira omu by’epolitike.
Yesu arhalishigikire olunda loshi-loshi omu by’epolitike. Omufano, omu siku za Yesu Abayahudi baligayire okubona bakahanza balipa ebitansi by’oburhegesi bwe Roma, balema babona nka lukoba balimo. Baja balonza Yesu naye achihire mubyo, aliko arhayemeraga chiro enganiro y’eby’epolitike. Arharhonderaga kujira obuhaka akaba ebyo bitansi binakwanene kulipwa changwa nanga. Ababwira: “Muhe Kaizari ebintu bya Kaizari, aliko muhe Mungu ebintu bya Mungu.” (Marko 12:13-17) Ayorha eyi nta lunda aliko omu by’epolitike, s’aliko ayerekana oku ebitansi abakulu be Roma yi bahema, bowe nka barhumwa ba Kaizari, bikwanene bilipwe. Aliko kandi ahola aba ey’amayerekana k’obukenge oku bukulu bw’elila gulu bukwanene bube bwa kadiri, arhali mpu buli choshi banaderhere chikwanene kujirwa. Omuntu arhakwanene kuha oburhegesi echintu chikwanene kuba cha Mungu, nk’okuchihaana loshi, n’obuharamye.—Matayo 4:10; 22:37, 38.
Yesu alishigikire n’okuyigiriza abandi bashigikire oburhegesi bw’embingu, k’okuderha Obwami bwa Mungu. (Luka 4:43) Arhaliyemerere achihira omu by’epolitike bulala alimenyere k’Obwami bwa Mungu bonyine bwakayeneza obulonza bwa Mungu oku gulu, s’arhali oburhegesi bw’abantu. (Matayo 6:10) Analimenyere k’Obwami bwa Mungu burhakolesa amarhegesi m’abantu s’ahubwe bwamagombola.—Danieli 2:44.
Abakristu b’omu myaka egana ya burhanzi, ka balichihebere omu by’epolitike?
Nanga. Abanafunzi ba Yesu balikengere erhegeko ‘ly’okurhaba chigabi ch’egulu’. (Yohana 15:19) Balikulikire olwiganyo lwage banayorha eyi barhali omu by’epolitike by’elila gulu chiro n’akatyu. (Yohana 17:16; 18:36) Ahali h’okuchihira omu by’epolitike by’elila gulu, baliri bakola akasi Yesu abalekeraga; k’okuderha okuhubiri n’okuyigiriza oku bilolere Obwami bwa Mungu.—Matayo 28:18-20; Matendo 10:42.
Abakristu b’omu myaka egana ya burhanzi balichihanganire, okukenga Mungu che chibage chintu ch’oburhanzi omu kalamo kabo, aliko eyi banamenyere ku bakwanene kukenga n’abakulu b’elila gulu. (Matendo 5:29; 1 Petro 2:13, 17) Balikengere amarhegeko banaliri balipa ebitansi. (Waroma 13:1, 7) Chiro akaba oku barhalichihirire omu by’epolitike, baliri bakolesa n’okuyunguka n’obulanzi burhengerere n’eby’oburhegesi bunakolera abantu.—Matendo 25:10, 11; Wafilipi 1:7.
Abakristu barhachihira omu by’epolitike na mumano mango
Ebiblia eyerekene bwinja bwinja oku, eyi Yesu, ey’abanafunzi bage, ntaye wachihirire omu by’epolitike. Che chirhumire, Abahamirizi ba Yehova b’omu gulu lyoshi, bulala bali Bakristu barhachira omu by’epolitike haba n’akatyu. Kuguma n’Abakristu b’omu myaka egana ya burhanzi, banakola akasi Yesu alihemere kakolwe—okuhubiri “eyi myazi minja y’Obwami.”—Matayo 24:14.
a Amango Yesu alahira, arhalijire buhaka ku Shetani arhaherhe oburhwali b’okuhaana chingana aho. Ahubwe buzinda aliyirikire Shetani “omurhegesi w’elila gulu.”—Yohana 14:30