Aliko Si Hali Amango Eterorizime Nji Yanahwa?
Amango wamayusa kubona bateroriste barhera ahantu olamire, ebibazo byakachilerha omu bwenge mpu: ‘Obosi Mungu anarhulagireko? Nka gurhe ebili ntya byakampikira? Aliko si hali amango eterorizime a nji yanahwa? Gurhe nakagala kulama na buba bungan’aha nyunvirhe?’ Ebiblia ehaanire ebishubizo bisimisize kw’ebyola bibazo.
Gurhe Mungu anachiyunva ey’abona eterorizime?
Mungu ashomba obubandi n’eterorizime. (Zaburi 11:5; Mezali 6:16, 17) Haba na Yesu, murhumwa wa Mungu, alikalihire entumwa zage amango balonza kujira eby’obubandi omu kuchilwako. (Matayo 26:50-52) Chiro akaba oku hali abanachihala mpw’eby’eterorizime bali bajira yi babikola omu zino lya Mungu, yewe arhayemerere haba n’akatyu ebili ntyo. Kwanza, arhayunviriza n’amasala mabo.—Isaya 1:15.
Mungu alagire ku bala boshi bali balibuka, bahirirwe mu n’abali ahaba teroriste barherere.—Isaya 60:18.
Bichi birhumire hali eterorizime
Ebiblia eyerekene empanvu nkulu y’eterorizime: “Omuntu ayinjire arhegeka owindi omu kumubabaza.” (Muhubiri 8:9) Kurhenga mira, abantu baherhe oburhwali, bakoleseze eterorizime omu kurhindibuza abandi. Omu kuja balonza bachilweko, abandi nabo banagalula eterorizime oku yindi.—Muhubiri 7:7.
Obufumu bw’eterorizime
Mungu alaganyize oku amala obuba n’eterorizime n’okujira omurhula oku gulu. (Isaya 32:18; Mika 4:3, 4)
Amala ebinarhuma haba eterorizime. Mungu agombola oburhegesi bw’abantu, n’obwage burhegesi bwarhegeka egulu lyoshi. Omurhegesi w’obola burhegesi, Yesu Kristu nji akolera buli muntu nk’oku bihemere, anamala eby’okurhindibuzwa n’obubandi. (Zaburi 72:2, 14) Mw’agola mango ntaye nji wachiwaza okw’akajira eby’eterorizime. Abantu “nji banagwarha omwishingo nyinenyine omu murhula gunene.”—Zaburi 37:10, 11.
Amala ebyago byalerherwe n’eterorizime. Mungu nji abuka enkovu n’amalumwa moshi malerherwe n’eterorizime, mabe m’omubiri changwa m’omu bwenge awo m’omurhima. (Isaya 65:17; Ufunuo 21:3, 4) Kwanza alaganyize oku nji afula n’abafire, balame omu gulu ly’omurhula.—Yohana 5:28, 29.
Ebiblia erhuhere empanvu zakarhuma rhwachizera oku Mungu ajira ebyola byoshi hano hofi. Aliko hali oku wakachibaza, ‘Bula gurhe Mungu arhavire amala eterorizime liguma na liguma?’ Y’obona echishubizo, lola evideo Bulagurhe Mungu Alekerere Amalibuko?
a “Eterorizime” biba bijiro by’obubandi—ahanene binakolerwa basivile—omu kulerha obuba bunene y’abali babikola bahikira emihigo yabo y’epolitike, y’eby’edini, changwa y’echeo balonza omu milamire y’abantu. Aliko, hali echijiro chakakolwa, bantu baguma banabona nka terorizime sy’abandi banabona nka nanga erhaza ba yowe.
