Omu gulu lyoshi, bantu banene barhondere kusima bwenene kuba ba Vegan.

•   “Okuba Vegan kuli kuwaza n’okulama omu kuchiyasya kukolera enyama kubi changwa kuzilya, n’okurhayambala emishangi changwa echindi chintu choshi choshi chikolerwe omu mpu z’enyama changwa kuzikolesa omu yindi njira yoshiyoshi.”—The Vegan Society.

 Bantu baguma babere ba Vegan arhali mpu bulala baba balagire oku nyama konyine, s’aliko kandi bulala balonzenze kulanga enyama n’emizirhu, kulanga amagala mabo, changwa eju y’amawazo malebe malolere edini.

•   “Okuba Vegan arhali kuchishoga ebilyo wakalya changwa nanga s’aliko kuli kuntu omuntu anabona ebintu, s’aliko kandi eli simikiro omuntu akabona okw’eli nyinja kurhola, enali njira ya karhabala buli muntu ajire egulu libe linja bwenene.”—Britannica Academic.

 Okuba vegan k’okwakajira egulu libe linja omu mango mayinjire si? Bichi Ebiblia Ebiderhereko?

 Ebiblia eyerekene oku Omulemi werhu, Yehova Mungu, a anabona okw’abantu bali b’akamaro bwenene kulusha enyama, abahere n’oruhusa l’okuzirhegeka. (Mwanzo 1:27, 28) Naho kandi, Mungu alihere abantu oruhusa l’okulya enyama. (Mwanzo 9:3) Aliko, arhasima abantu bakakolera enyama kubi.—Mezali 12:10.

 Nk’okwe Biblia ederhere, omuntu akachishoga akaba alya enyama changwa nanga. b Arhali okulya enyama changwa okurhazilya k’okwakarhuma omuntu abonekana bwinja embere za Mungu. (1 Wakorinto 8:8) Nta muntu n’omuguma okwanene kuderha owabo kubi eju y’ebintu achishogere kulya.—Waroma 14:3.

 Ebiblia eyerekene okw’arhali okuntu rhunachishoga kulama k’okwamala ebibazo oku gulu. Bibazo binene binalerhwa n’oburhegesi bw’epolitike, okuntu abantu balamire, abachuruzi ba mu linola gulu bagwerhe obuhugu, na nta muntu n’omuguma wakamala ebyola bibazo. Ebiblia ederhere ntya:

•   “Echagondamire chirhakachinyoroswa.”—Muhubiri 1:15.

 Omulemi werhu yinji wamala ebibazo rhuli rhwahurana zene. Ebiblia ederhere omu binwa by’omufano omu kuyerekana ebintu nj’ajira omu mango mayinjire.

•   “Naho nabona egulu lihyahya n’embingu mpyahya; bulala embingu n’egulu bya mira byagerere, n’enyanja erhachiliho chiro.”—Ufunuo 21:1.

 Mungu nj’akula amarhegesi m’abantu, changwa “embingu ya mira,” anahebaho “embingu mpyahya,” k’okuderha, Obwami bwage bwe mbingu (Ufalme wake wa mbinguni) Obwami bwage nji bwakula “egulu lyamira,” k’okuderha abantu babi, kandi nji bwarhegeka “egulu lihyahya,” k’okuderha balala bali tayari kurhambulwa n’oburhegesi bwa Mungu.

 Eshishi w’oburhegesi b’Obwami bwa Mungu bonyine (utawala wa Ufalme wa Mungu) abantu nji bayiga kulama omu murhula haguma n’enyama n’okukenga ebindi byoshi birhuzungulukire.—Isaya 11:6-9.