MUYORHE EYI MUMENYERE EBILI BYABA!
Abantu yi Baharabisa Egulu—Bichi Ebiblia Ebiderhereko?
“Abantu yi bajira bintu binene byalerha obuhanya oku bilemwa byoshi. Amenji ji mazinda eyi mahubizye vile zinene. Echuka yi chayinja chaluga kuchubusya olugero. Hali emilaba eyubahirisize. Echibula ch’amenji chili chagenderera bwenene. Amamioliyoni m’embero z’enyama n’emirhi miguma-miguma bili hofi kusisibulizwa. Olula lurhali mpu Lugano changwa mpu binwa bihirirwe m’omunyu konyine. Ebyola by’abasomi bayerekene oku byahika akaba oburhegesi burhahindamwire enjira yi bakolesa yi haba ebintu by’okulerha omuliro nk’ekura, esanse, egaze n’ebindi.”—Intyo ku António Guterres, sekretere mukulu w’ Obuguma bw’Amashanja, (ONU), aderhere oku bilolere eraporo echigusho ch’abasomi banayiga oku bilolere okuntu Ehewa yi Yahindamuka bakulaga omu Siku 4, Mwezi gwa 4, 2022.
“Abasomi bali bagenderera kuhaana omukonge k’omu myaka ya yinjire haba ebirha binene bilerherwe n’okuntu ehewa yi yahindamuka n’okuyahuma ku parke hofi 423 zoshi z’omu Etats-Unis, zili omu hali yarhuma zagera ahazasingonyoka n’echuka chili chagenderera kuluga. Ebila bintu bibi byoshi rhuli rhwayunva bishushire n’ebye Biblia nayo ederhere: omuliro n’obuhindule, okushwanga kw’ebibale bizibu-zibu by’amagalase biba oku nyukirizo z’egulu (pôle nord na pôle sud), amenji m’enyanja okuhanza mazamuka, n’echuka chilugire kuchubusya olugero.”—“Ebinjira by’omu vile ye Yellowstone, Bimenyeso by’Obuhanya Bwayinjire,” The New York Times, Siku 15, Mwezi gwa 6, 2022.
Ebila bibazo byoshi bili byayirha aharhulamire byakabona obufumu si? Akaba nechi, inde nji wabimala? Lola ebye Biblia ebiderhereko.
Okuyirha aharhulamire kwabaga kwaleberwe
Ebiblia ederhere oku Mungu nji “aharabisa abali baharabisa egulu.” (Ufunuo 11:18) Olula lwandiko lwe Biblia lurhuyigirize bintu bisharhu:
1. Ebi abantu yi bajira byagera aha byaharabisa egulu bwenene.
2. Okuharabisa egulu kuherhe obuzinda.
3. Mungu, s’arhali abantu, yi nji wamala ebibazo by’okuyirha aharhulamire bili oku gulu lyoshi.
Amango mayinjire egulu nji lyalangwa bwinja
Ebiblia ederhere oku “egulu lyarhulaho esiku n’amango.” (Muhubiri 1:4) abantu banagenderera kulilamako amango moshi.
“Abanyakunali nji bashokola egulu, nji banalilamako esiku n’amango.”—Zaburi 37:29.
Ehali nyinja ye gulu nji yashuba kugalulwa loshi-loshi.
“Erungu n’echihugo ch’oku gasi nji byachishinga, erungu lilambukire nji lyashagaluka n’okuyasa amauwa mali nka masafra.”—Isaya 35:1.