“Alfa na Omega” amango biderherwe biba biyerekeze oku Yehova Mungu ye mugala byoshi. Ogu mwazi gubonekana omu Biblia kali gasharhu.—Ufunuo 1:8; 21:6; 22:13. *

Alfa na omega zili herufi z’oburhanzi nezobuzinda omu Kigiriki, kokuderha olulimi lwakolesezwe omu kuyandika ecilagano cihyahya kokuderha ahali ecitabu ca Ufunuo. Ololere aha ezi herufi zili, biyerekene oku Yehova ye w’oburhanzi n’obuzinda. (Ufunuo 21:6) Aliri mugala byoshi mira n’amango kandi nj’agenderera kuba mugalabyoshi esiku n’amango. Yenyine yi walamaga “kurhenga esiku n’amango kugeza esiku n’amango.”—Zaburi 90:2.

Ebiblia ekolesa ogu mwazi yayerekeza oku Yehova Mungu n’omwana wage Yesu aliko omu bulyo burhali kuguma. Lora emifano ebiri.

• Omu Isaya 44:6, Yehova anaderha intya: “Ndi w’oburhanzi kandi Ndi n’owobuzinda. Nta mwazi Mungu gulimo hano, halimo Ndi.” Ahala Yehova anaderha oku Ye Mungu w’okuli tena ntawindi obaho. (Kumbukumbu 4:35, 39) Ahala omwazi “ow’oburhanzi n’owobuzinda” biderhere kuguma na “Alfa na Omega.”

• Ecindi kandi “ow’Oburhanzi [pro’tos, arhali alfa] n’Owobuzinda [e’skha·tos, arhali omega]” bibonekana omu Ufunuo 1:17, 18 na 2:8. Mweyi misitari, ebilimo biyerekene ok’omuntu oderherwemo afire enyuma afuka. Ebi biyerekene okw’arhali Mungu oderherwemo bulala yewe arhakafa. (Habakuki 1:12) Aliko Yesu yewe afire anafuka. (Matendo 3:13-15) Ali w’oburhanzi omu bantu wafukire abona omubiri g’omuka aja embingu, aha zene alamire “esiku n’amango.” (Ufunuwo 1:18; Wakolosai 1:18) Abandi boshi bafuka bafulwa naye. (Yohana 6:40, 44) Yesu abere w’Obuzinda wafulirwe na Yehova. (Matendo 10:40) Kugerera ebi Yesu akayirikwa “ow’Oburhanzi n’Owobuzinda.”

Nanga. Oli waderhwa omu Ufunuo 22:13 arhayinjwi, kandi bali bantu banene baderherwe mwecila cicira. Profeseri William Barclay ayandikire intya okubili omu Ufunuo: “Ebintu bayandikirwe oku musitari; . . . Byanava byakomera kumenya oli waderha.” (The Revelation of John, Volume 2, Revised Edition, page 223) Kokuderha oku “Alfaha na Omega” oderherwe omu Ufunuo 22:13 ali muguma n’oderhwa omu Ufunuo​—kokuderha Yehova Mungu.