Nanga. Ebiblia eyerekene oku rhukwanene kusalira Mungu yenyine kugerera omu zino lya Yesu. Yesu alibwirire Abanafunzi bage ntya: “Intya kumukwanene kusalira: Darha oli omu mbingu, Ezino lyawe lichesibwe.” (Matayo 6:9, New American Bible) Arhachigeraga kubwira abanafunzi bage mpu basalire abachesibwa, bamalaika changwe owindi yeshi-yeshi olekere Mungu.

Yesu alishubire bwira abanafunzi bage ntya: “Nyono nye njira, okuli, n’akalamo. Ntaye wakayinja emwa Darha buzira kungerera ko.” (Yohana 14:6) Yesu yenyine yi Mungu ayemerere oku akarhuderhera.—Waebrania 7:25.

Lero si nkansalirire Mungu inkasalira n’Abachesibwa?

Mu liguma mu malala marhegeko ekumi Mungu aliderhere ntya: “Nyono, WALIHA, Mungu wawe, imba Mungu ojira obongwa.” (Kutoka 20:5) Mu bugenda buchi Mungu ajira “obongwa”? Amahugulo m’eshishi omu New American Bible maderhere “Omu kuhema okusengererwa bwenene.” Mungu ahemere ebijiro by’okusengerera changwe by’okuharamya, biheberwe mw’esala, byoshi biyerekezwe emunda ali.—Isaya 48:11.

Rhunagayisa Mungu nka rhusalirire owindi windi arhali yewe, babe bachesibwa changwe bamalaika. Amango Entumwa Yowane yalonzaga kuba nka yaharamya malaika, malaika amulahiza n’okumubwira: “Orhapimaga! Indi mukozi kuguma nawe na bene-benyu bali bahamiriza Yesu. Oharamye Mungu.”—Ufunuo 19:10.