Yesu alokolaga abantu amango ahana akalamo kage nka ncungu. (Matayo 20:28) Cecirhuma Ebibliya eyirika Yesu “Mucunguzi w’egulu.” (1 Yohana 4:14) Kandi enaderha: “Ntawindi wakalokola abantu kwabulala ntalindi zino rhwahabirwe hano oku igulu rhwakaboneramo akalamo.”—Matendo 4:12.

Yesu afiraga ngasi yeshi onayemera eyo ncungu. (Waebraniya 2:9; Yohana 3:16) Enyuma “Mungo amufulire omu bafire” ava ashubira embingu eyali malayika. (Matendo 3:15) Ahola, Yesu agwerhe obushobozi “bw’okulokola bala boshi banayegera Mungo kugerera Yesu, kwabulala ngasi mango aba ali abashengera.”—Waebraniya 7:25.

Kwabula bici rhukenere Yesu kusudi arhushengere?

Rhweshi rhuli banyabyaha. (Waroma 3:23) Ecaha cahebere omupaka ahagarhi yerhu na Mungo, kandi ebyo biganisa uku lufu. (Waroma 6:23) Aliko Yesu “anasambira” bala boshi banayemera encungu. (1 Yohana 2:1, ebiderherwe ahashi) Anarhushengera, ahuna Mungo mpu ayunve oku shenga kwabo kandi abababalire ebyaha byabo kugerera oku ncungu ya Yesu. (Matayo 1:21; Waroma 8:34) Mungu ashubiza amasala ma Yesu kwa bulala mali bwinja bwinja nk’oku Mungo alonzeze. Mungo amulikire hanola oku igulu “yalicungula.”—Yohana 3:17.

Okuyemera Yesu birhukenere byonyine yi rhucunguka?

Nanga. Naciro okuyemera Yesu byakarhulerhera akalamo, Hali ecindi rwakakola. (Matendo 16:30, 31) Ebibiliya ederhere: “Nkok’omubiri buzira muka guba gufire, ntyo ku n’obuyemere buzira bijirwa buba bufire.” (Yakobo 2:26) Yi rhulokoka, rhu kwanene:

• Rhuyige ebiyerekere Yesu haguma n’eshe Yehova.—Yohana 17:3.

• Rhubayemere.—Yohana 12:44; 14:1.

• Rhuyerekane obuyemere bwerhu rhwakenga amarhegeko mabo. (Luka 6:46; 1 Yohana 2:17) Yesu aderhere mpu arhali ngasi yeshi wali wamubwira mpu “Mwami” wali walokoka aliko ola yenyine“onakola obulonza bw’Eshe oli embingu.”—Matayo 7:21.

• Rhugenderere kuyerekana obuyemere bwerhu naciro rhwakaba rhuli omu bibazo. Yesu abiyerekene amango aderha k’: “Owagenderera kucihangana kugeza oku buzinda oyola yi nji walokoka”—Matayo 24:13.