“Ahandamire, bikomere okubuno omuntu wa myaka eli shishi wa 25 orhanywa erhabi changwa ofuuba ely’echielektronike.”​—Julia.

Ebili mu gunola mwazi

•  Eby’okwanene kumenya

•  Ebi wakajira

•  Bichi oku bilolere amarijuana?

•  Eby’eyenyu misole enaderha

 Eby’okwanene kumenya

•   Erhabi lyakakuyirha. Nicotine​—y’eba elugire omu rhabi, eba mw’esumu linarhuma omuntu asima erhabi bwenene omu kuntu arhakalileka. Nk’oku e Centre de Contrôle de Maladie et de Prévention des Etats-Unis ederhere, “okunywa erhabi eli nguma omu mpanvu zikulu zinarhuma abantu bafa juba-juba n’okulwala omu gulu lyoshi.”

   “Inankolesa amashini m’ekografi y’okupima abalwala, na bwene foto zinene ziyerekene okuntu okunywa erhabi kunaharibisa amagala m’abantu. Nagayire bwenene amango imbana nkagurhe emishipa y’abantu bananywa erhabi eli mu buchafu bunene orhaka lola. Bulala inkengere omubiri gwani bwenene, ntakanywa erhabi haba n’akatyu.”​—Theresa.

   Walimenyere si? Erhabi lili mu rhunturhuntu 7 000 ntya rhwakabihya akalamo k’abantu. Buli mwaka, erhabi linayirha emilioni y’abantu.

•   Erhabi ly’echielektronike liba m’obuntingu bwanakahya amagala. Okunywa erhabi ly’echielektronike, changwa okufuka omusi gwalyo, kunalerha amalwala m’obudiku chiro n’olufu. Kandi, kuguma n’elindi rhabi lyoshi-lyoshi erhabi ly’echielektronike liba mw’ekotine erhuma omuntu aba muja w’okunywa erhabi. Bulala omuntu akaba jubajuba muja w’okunywa erhabi, myazi miguma y’alonzezwe oku bilolere erhabi ly’’echielekronike ederhere oku enikotini “yakarhuma omusole aba muja w’amandi mufumu mw’okulalusya.”

   “Ebintu by’okufuba bigwerhe amazino nka bombo y’okumurhi n’ebindi bili mw’esukari, obununu bwabyo bwakarhuma emisole n’abana babisima bwenene. Obola bununu bwakarhuma babona nka birhakalerha obuhanya.”​—Miranda.

   Walimenyere si? Omusi g’omu rhabi ly’echielekronique gurhali musi konyine. Guli m’orhintingu rhwakabihya amagala mwerhu, orholo rhuli rhubi bwenene rhunaja kuchilunda omu mahaha mw’omuntu.

 Ebiwakajira

•   Ochihangane kumenya. Omenye wayemera buli mwazi onayunva, omufano, okunywa erhabi ly’echielektronike kurhakalerha obuhanya changwa kunarhabala omuntu achiyunve bwinja amango agwerhe emilago. Olonze emyazi wenyine, onarhole esimikiro omu kuyumangira oku myazi y’obukweri wabwene.

   Akanuni k’Ebiblia: “Echinganyi chinachizera byoshi byanaderherwe, aliko omuntu mwikenzi analolereza buli ntambu yage.”​—Mezali 14:15.

   “Amango wamawaza oku ngaruka zibi z’okunywa erhabi changwa omusi gw’erhabi ly ‘echielektronike, wanabona omu muheberwe binene olekere ‘ochiyunva osimire’ nka kulala abantu bamenyikene bwenene changwa eyenyu emisole enashusha nk’eli yachiyunva amango bali bajira ntyo.”​—Evan.

   Waza kw’echila: K’emisole enanywa erhali ly’echielektronike changwa elindi ejira obusime kweri? Ka bali tayari kulwisha emilo y’omukalamo ka zene changwa k’amango mayinjire? Ka bali bajira ebintu byakabalerhera busime bunene?

•    Olonze enjira zinja z’okulwisa emilago yawe. Enjira zinja z’okulwisa emilago kuli kujira amakasi nk’okujira esiporo, okusoma, changwa okuchisima haguma n’abera bakakuheba omurhima. Bulala ogwerhe bintu binene wakasezako obwenge, birhakuhemere ok’onywe erhabi.

   Akanuni k’Ebiblia: “Emilago erhuma omurhima gwalemerwa, aliko echinwa chinja chinagushagalusya.”​—Mezali 12:25.

   “Abantu wanawazo k’okunywa erhabi ly’echielektronike changwa elindi kunamala emilago. Aliko okuderha okuli ebyola bintu binarhuma omuntu achiyunva bwinja mu mango mageke monyine, aliko engaruka zibi ziba za kugenderera. Hali enjira zinja z’okulwisa emilago.”​—Angela.

   Waza kw’echila: Njira zihe zinja wakalwisamo bwinja emilago? Akaba okenere oburhabale, osome omu chigabi “Emisole Enabaza” omwazi “Ninaweza Kukabilianaje na Mahangaiko?” (Nka gurhe Nakalwisha Emilago Yani?)

•    Ochirheganye kulwisa akahidiko k’eyenyu misole. Kakarhengerera oku benyu banafunzi changwa kugerera ebintu by’okuchisimisa. Efilme, eprograme z’Eteleviziyo, n’esite z’Enternete z’okuganira n’abantu banene binazigana kuyerekana ok’okunywa erhabi ly’echielekronike changwa elindi kunalerha obushaluke changwa obusime.

   Akanuni k’Ebiblia: “Abantu bakulu . . . emisi yabo y’okuchirhegereza, yakomeezwe kumenya echinja n’echibi.”​—Waebrania 5:14.

   “Amango naliri oku masomo, aberhu banafunzi banene baliri bankenga bulala ntaliri nanywa erhabi ly’echielektronike changwa elindi lyoshi-shi. Amango imbayereka bwinja esimikiro yani, chiro bananderhera. Bobola, chiro abandi bakabona oku esimikiro yawe eli y’obunganyi, okuyimenyesa abandi kwaka kulanga.”​—Anna.

   Waza kw’echila: Kangana gurhe wakagala kulembera akahidiko? Wakawaza chunda zinda wachigerere kujira ntyo? Akaba okenere oburhabale y’ogala kujira ntyo, olole omwazi “Kukabiliana na Mkazo” katika sura ya 15 y’echitabu Vijana Huuliza​—Majibu Yafanyo Kazi, Volume 2.

•   Ochishoge bwinja bera bawe. Orhashumikwa juba-juba kunywa erhabi ly’echielektronike changwa elindi lindi akaba bera bawe nabo rhajira agola mawazo.

   Akanuni k’Ebiblia: “Obe mwira wa balala bayengere, nawe wayengeha. Okachishoga ebihwinja babe bera bawe, bakugeza oku bugali.”​—Mezali 13:20, Easy-to-Read Version.

   “Okujira obwira n’abantu bagwarha engeso y’ okuchigala banali beshwekerezi kunarhabala bwenene. Amango wamabona amalehe menja bali bagwarha, wanachiyunva nawe oshunikirwe kubayiganya.”​—Calvin.

   Waza kw’echila: Ka bera bawe banakurhabala ohigirire kulama akalamo kachere onagwarhe olugenzi luchere, changwa banashonda kukuvuna omurhima orhajira ntyo?

 Gurhe si oku bilolerere erumba?

 Misole minene enaderha ok’onywa erhumba kurhali kubi. Obola buli bubeshi!

•   Emisole enywa erhumba bakaluha eli babere baja b’erumba. Abasomi barhere ok’okugenderera kunywa erumba kwakaharabisa obwenge bwawe n’okupunga oku ehakiri lyawe.

•   Sosyete nguma y’omu Etats-Unis erhedere, “abana lonza bayerekene oku abantu wananywa erhumba mango manene barhayunvikana n’ abandi, barhagala masomo, barhagala kasi, barhanatosheka n’amasomo.” (Substance Abuse and Mental Health Services Administration)

   “Naliri nalonza kunywa erumba, ahanene bulala naliri nalonza kumala emilago yani. Aliko amango imbwaza oku nakaba muja walyo, efuranga nakahezeze kulyo, okuntu lyakahumire oku magala mani, narherega ok’ okunywa erhumba kwakayongerere konyine emilago yani.”​—Judah.