Kweri, osimire oyula munyere changwa oyula musole bwenene, onamenyere oku naye intyo kanako. Olekere n’echo munayandikirana amamesaje esa zoshi, muzigana kuba haguma ahamwanashimanene . . . , na mesaje ziguma omu z’agurhumire zalibonekene oku zabere zijire hale.

 Nantyo wanabona ok’obaze ngahe obwira bushushire oku buli bwagana, y’omenya akaba munachili ku bande nguma. Okwa shubiza! Mpu “Inankubona konyine nka mwira hoshaho​—Ntachindi.”

•  Okuntu binaluma

•  Bichi bibilerha

•  Ebiwakajira

 “Naliyunvirhe oburhe bwenene​—oburhe kuye, na kunani nyenyine! Rhwaliri rhwayandikirana buli lusiku, analiri ayerekana oku kweri asimisizwe nani. Nk’okubinaba, nayunva nani namufirire.”​—Jasmine.

 “Nyono n’oyula munyere rhwaliri baherekeza b’owindi musole n’omunyere. Mango maguma byahwanza shusha nka rhuli rhwashambazana. Okurhuli babiri rhwalema rhwaganira bwenene, rhwahwanza kurhumirana n’amamesaje bwenene. Byalikomere bwenene okuyemera amango ambwira mpu anambona nka mwira konyine, nanchija narhegera oku ali ashambazana n’owindi.”​—Richard.

 “Hali omusole waliri wanyandikira emesaje buli lusiku, na mango maguma maguma rhwaliri ‘rhwasimirana oku by’okushambazana.’Aliko nabere namubwira gurhe yinachiyunva eju yage, asheka kisha ambwira, ‘intasimire kushambaza muntu bunola!’ Nabanda endulu bichanchi binene.”​—Tamara.

 Amakanuni m’okukulikira: Amango owazize oku muli omu bwira bukomere haguma n’omuntu, aliko wanabugana amalahira eby’okushambazana, ntachibuze okwanene kuyunva oburhe, kuchiyunva kubi, n’okuyunva nka wahakanirwe. “Naliyunvirhe nahwererwe amango byamberaga, n’okuderha okuli byalindumire oku murhima bwenene,” Steven oyola. “Haligerere echihe okuderha oku nshube mbe eyi nakalangalira omuntu bikala bikomere.”

 Okuyandikiraana emesaje n’okubwirana oku myazi oku enternete kwakarhuma wayunva wahwanzize kusimiswa n’omuntu aliko eyi yewe arhayunvirhe kadundo kakarhuma aderha mpu mushammbazane. Lola ebi misole miguma yaderhere.

 “Hali omuntu wakahanza ayandikirana nawe omukufa kuheza ebichanchi, aliko woyo wanawaza mpu bulala akusimire. Nankahanzize akuyandikira buli mango, ahola wanachibesha mpu nkabaga akubwene k’oli w’akamaro bwenene.”​—Jennifer.

 “Omuntu akaba eyi kweri ayunvirhe afirire owindi eyi anasezeze, aliko eyi owindi yewe alonzeze afi kufi kugwarha ow’okuganira naye, w’okurhuma afi chiyunvisa konyine.”​—James.

 “Okufa kuderha mpu ‘budufu bwinja’ omu mesaje kwakarholwa nka hali mw’echindi, aliko yakaba eyi yarhumwaga n’omurhima gwinja konyine nka kula omuchuruzi w’okutelefone akanalegereza omuntu tu.​—Hailey.

 “Emoticone ( kokuderha bila bimenyeso by’okuhira oku mesaje by’okuyerekana gurhe yi wachiyunva), yakaba eyi ederhere mpu ‘indi sawa’ konyine changwa mpu ‘indi nakusimira.’ Sa ziguma owayi pataga yewe anayiyunva m’okusimira hoshaho.”​—Alicia.

 Eby’okwanene omenye: Orhashushanyaga okulaga oku muntu n’okumufira.

 Biyanguhire kuderha s’okubikola nanga si? Nechi! Ebiblia ederhere: “Omurhima gunarhebekana kulusha echindi chintu choshi-choshi gunali gudarhi.” (Yeremia 17:9) Kwakarhuma waba oli wasyera omu lwinji omu kugenderera kumufira, wanaja wabugana oku ntacho chili ah’oli wasyera ey’orhegera oku gasi omu mawazo mawe mubyanaliri hoshaho.

•   Omenye bichi biguma olimo. Obe nka wayimanga orhange olole bwinja obwira bwenyu. Ochibaze, ‘Aliko si inamperhe empanvu z’okuwaza ok’oyula muntu yantola nk’okw’arharhola abandi?’ Orhalekaga okuntu oli wachiyunva kwananiza “obuhashe b’okuwaza.” bwawe.”​—Waroma 12:1.

•   Ochirhegereze. Olekere ebimenyeso byoshi bili byarhuma wawaza oku murhali bera konyine si hali echindi, Owazage bwenene n’okubindi biyerekene ok’okola oli wawaza arhali kubili. Orhabirholaga mp’okwenge oyunvirhe osimire omuntu mpu k’okuderha oku naye ayunvirhe oko kon’okola.

•   Olindire. Amango moshi omuntu arhaza kukubwira bwinja-bwinja oku alonzeze mumenyane bwinja omu bugenda b’okushambazana, orhavaga wachiseza omu bwira nji orha yunva bwakuluma.

•   Obe wazi. Ebiblia ederhere oku “hali akasanzi k’okuderha.” (Muhubiri 3:7) Akaba olonzeze kumenya akaba anakubona nk’orhali mwira konyine, obiganire ko naye. “Akaba mwembi murhachiyunvirhe kuguma, kuli kwinja okuyunva byakuluma bugeke oku murhima bunola ahali h’okuderha oku nji oje wayunva byakuuma bwenene bulalaemyezi yamagera oja warhegera oku gasi kweri oy’omuntu arhakubona nka we murhanzi.” Ku munyere muguma mpu ye Valerie aderhere.

 Ebi okwanene omenye: “Olange omurhima gwawe,” ku Mezali 4:23 ederhere. Akaba ounvirhe omurhima gwawe yi gwachishwekera ku muntu mulebe, orhange olole akaba ogwage nago yi gwachikushwekerako. Okuyemera obuzigire b’okulonza kumushambaza omuherheko bwamera emizi yewe arhanaza kusima ntyo kuli nka kulonza kuzizya omwaka nk’omumbarhi okulubale lukomere.

 Nk’orhegerere ok’oyola muntu arhakusimire, aliko y’onakala okulire, oli tayari kushambaza, ahola we waja wachishoga akaba wagendereza obola bwira. Oyibuke ok’obunyumpa bukomere bunayumbakwa n’omulume n’omukazi boshi baherhe mihigo miguma y’ekiroho barhabishana chintu banali wazi buli muguma n’owindi. (1 Wakorinto 7:39) Omu kwindi, bakwanene kuba eyi bahwanzaga bali bera, banagenderere kuba bera.​—Mezali 5:18.